Read Uzbek Muqaddas Kitob Yoshua 12 Bible Online

Yoshua 12 - Uzbek Muqaddas Kitob bible

Yoshua 12

¹Muso boshchiligida Isroil xalqi Iordan daryosining sharqida boʻlgan shohlarni magʻlub qilib, ularning yerlarini egallab olgan edi. Bu shohlar janubdagi Arnon soyligidan shimoldagi Xermon togʻigacha boʻlgan yerlarda hukmronlik qilgan edi. Ularning yerlari Iordan vodiysining[89] sharqidagi barcha yerlarni oʻz ichiga olar edi.

²Isroil xalqi magʻlub qilgan shohlardan biri Amor xalqining shohi Sixoʻn[90] edi. U Xashbon shahrida yashagan edi. Uning shohligi Arnon soyligining chetida joylashgan Aror shahrini va oʻsha soylikning oʻrtasidan to Yavoq daryosigacha choʻzilgan joylarni, ya’ni Giladning yarmini oʻz ichiga olar edi. Yavoq daryosi Ommon xalqi yerining chegarasi edi.

³Sixoʻn Iordan vodiysining sharq tomonida ham hukmronlik qilgan edi. Bu hudud shimol tomonda Jalila koʻlining[91] gʻarbiy qirgʻoqlarigacha, janub tomonda Oʻlik dengizgacha[92], Bayt — Yashimoʻtdan Fisgax togʻ tizmasining yon bagʻirlarigacha boʻlgan joylarni oʻz ichiga olar edi.

⁴Magʻlub boʻlgan Bashan shohi Oʻg[93] oʻz shaharlari Ashtaroʻt va Edreyda yashardi. U Rafa xalqining[94] omon qolganlaridan biri edi.

⁵Uning shohligi shimoldagi Xermon togʻigacha, sharqdagi Salko shahrigacha choʻzilib, gʻarbdagi Gashur va Maxo shohliklarining chegaralarigacha yetib borgan Bashan oʻlkasini ham oʻz ichiga olgan edi. Bu shohlik yana Giladning shimoliy yarmini ham oʻz ichiga olib, Xashbon shohi Sixoʻn hududi chegarasigacha yetib borardi.

⁶Egamizning quli Muso va Isroil xalqi mana shu ikki shohni magʻlub qilib, ularning yerlarini egallab olishgan edi. Muso shu yerlarni Ruben, Gad qabilalari va Manashe qabilasining yarmiga mulk qilib bergan edi.

⁷Iordanning gʻarbida — shimoldagi Lubnon vodiysida joylashgan Baal — Gaddan tortib, janubdagi Seir[95] yonida joylashgan Xalak togʻigacha boʻlgan joylarda yashagan shohlarni Isroil xalqi Yoshua boshchiligida magʻlub qildi. Oʻsha shohlarning yerlarini Yoshua Isroil qabilalariga mulk qilib boʻlib berdi.

⁸Qirlarni, gʻarbdagi qir etaklarini, Iordan vodiysini, uning gʻarbidagi qir yon bagʻirlarini, Yahudo adirlaridagi va Nagav choʻlidagi[96] yerlarni boʻlib berdi. Bu yerlarda Xet, Amor, Kan’on, Pariz, Xiv va Yobus xalqlari yashashardi. Isroil xalqi magʻlub qilgan shohlar quyidagilardir:

⁹Yerixo shohi, Baytilning yonidagi Ay shohi,

¹⁰Quddus shohi, Xevron shohi,

¹¹Yarmut shohi, Laxish shohi,

¹²Eglon shohi, Gezer shohi,

¹³Davir shohi, Geder shohi,

¹⁴Xoʻrmax shohi, Arod shohi,

¹⁵Libna shohi, Adullam shohi,

¹⁶Makkedo shohi, Baytil shohi,

¹⁷Tappux shohi, Xafer shohi,

¹⁸Ofoq shohi, Sharon shohi,

¹⁹Madon shohi, Xazor shohi,

²⁰Shimron — Maron shohi, Axshof shohi,

²¹Tanax shohi, Magidoʻ shohi,

²²Kedesh shohi, Karmildagi Yoxnayom shohi,

²³Nafoʻt — Doʻrdagi[97] Doʻr shohi, Gilgaldagi[98] Goʻyim shohi,

²⁴Tirza shohi. Isroil xalqi hammasi boʻlib oʻttiz bitta shohni magʻlub qildi.