Read Uzbek Muqaddas Kitob Yoshua 14 Bible Online

Yoshua 14 - Uzbek Muqaddas Kitob bible

Yoshua 14

¹Iordan daryosining gʻarbidagi Kan’on yurti yerlaridan Isroil xalqining qolgan qabilalari mulk oldilar. Ruhoniy Elazar[113], Nun oʻgʻli Yoshua va Isroil qabilalarining boshliqlari bu yerlarni qabilalarga boʻlib berishdi.

²Iordan daryosining gʻarbida mana shu toʻqqiz qabila va bitta qabila yarmining ulushlari, Musoga Egamiz buyurganday, qur’a tashlab belgilandi[114].

³Iordanning sharqida esa Muso ikki qabilaga va bitta qabilaning yarmiga ulush berib boʻlgandi. Yusufning ikkala oʻgʻli — Manashe va Efrayimdan ikki qabila kelib chiqqan edi. Ammo Isroil qabilalari orasida Levi qabilasi hech qanday ulush olmadi[115]. Ularga faqat oʻzlari yashashi uchun shaharlar va qoʻy — mollarini boqish uchun shaharlar atrofidagi yaylovlar berildi.

⁵Shunday qilib, Egamiz Musoga buyurganday, Isroil xalqi yerlarni boʻlib oldilar.

⁶Bir kuni Yahudo qabilasidan bir necha kishi Yoshuaning oldiga keldi. Isroil xalqining hammasi hali ham Gilgaldagi qarorgohda edi. Xanaz urugʻidan boʻlgan Yafunax oʻgʻli Xolib[116] oʻsha kishilar orasida edi. U Yoshuaga shunday dedi: — Kadesh — Barna shahrida boʻlganimizda, Xudoning odami Muso siz va men haqimizda nima deganini bilasiz. Muso Egamiz nomidan gapirgan edi.

⁷Egamizning quli Muso meni Kadesh — Barnadan mana shu yerlarni tekshirib kelish uchun yuborganda qirq yoshda edim. Men qaytib kelib, unga bor haqiqatni aytgan edim.

⁸Men bilan borib kelganlar xalqimizni vahimaga solgan boʻlsa ham, men Egam Xudoga sodiq qoldim.

⁹Oʻsha kuni Muso qasam ichib menga shunday degan edi[117]: “Kan’on yurtida qadaming yetgan yerlar senga va avlodingga abadiy mulk qilib beriladi, chunki sen Egam Xudoga sodiq qolding.”

¹⁰Mana koʻrib turganingizdek, Egamiz Musoga shunday deb gapirganiga qirq besh yil boʻldi. Oʻsha paytda Isroil xalqi sahroda yurgan edi. Egam Oʻzi aytganday oʻshandan beri jonimni saqlab kelyapti. Mana hozir sakson besh yoshdaman.

¹¹Muso meni yuborgan kunda qanday baquvvat boʻlgan boʻlsam, hozir ham shundayman. Haligacha jangga ham, qolgan barcha ishlarga ham quvvatim yetadi.

¹²Endi Egamiz oʻsha kuni va’da qilgan qirlarni[118] menga bering. Oʻsha kuni aygʻoqchilarning: “Onoq avlodi[119] u yerda oʻzlarining katta, mustahkam shaharlarida yasharkan” degan gaplarini oʻzingiz eshitdingiz. Ammo Egamiz men bilan birga boʻlsa, Egamizning Oʻzi aytganday, men ularni bu yurtdan haydab chiqaraman.

¹³Shundan keyin Yoshua Xolibni duo qilib, Xevron shahrini[120] unga mulk qilib berdi.

¹⁴Shunday qilib, Xolib Isroil xalqining Xudosiga — Egamizga sodiq qolgani uchun Xevron shahri uning va avlodining mulki boʻlib qoldi.

¹⁵Xevronning eski nomi Xirat — Arba[121] edi. Arba Onoq avlodi orasida eng mashhur kishi boʻlgan edi. Endi yurtda tinchlik barqaror boʻldi.