Read Uzbek Muqaddas Kitob Yoshua 22 Bible Online

Yoshua 22 - Uzbek Muqaddas Kitob bible

Yoshua 22

¹Yoshua Iordan daryosining sharq tomonida ulush olgan Ruben, Gad qabilalarini va Manashe qabilasining yarmini chaqirib,

²shunday dedi: “Egamizning quli Muso nima amr qilgan boʻlsa, hammasini bajardingiz. Men buyurganlarimning hammasiga itoat qildingiz.

³Yurtni egallashga shuncha uzoq vaqt ketgan boʻlsa ham, siz oʻz birodarlaringizni tark etmadingiz, Egangiz Xudo qoʻygan talablarni bitta qoldirmay bajardingiz.

⁴Egangiz Xudo Oʻzi va’da qilganday, birodarlaringizga tinchlik berdi. Egamizning quli Muso sizlarga Iordanning sharq tomonidan ulush bergandi. Endi oʻsha yerlardagi uylaringizga qaytinglar.

⁵Egamizning quli Muso sizlarga buyurgan amr va qonunlarni bitta qoldirmay bajaringlar. Egangiz Xudoni sevinglar, Uning yoʻlidan yurib, amrlarini bajarib, Unga sodiq boʻlinglar, Unga butun qalbingiz bilan, jonu dilingiz bilan xizmat qilinglar.”

⁶Yoshua ularni duo qilib, oʻz yerlariga yubordi. Ular oʻz chodirlariga qaytib ketishdi.

⁷Manashe qabilasining yarmiga Muso Bashan oʻlkasini ulush qilib bergan edi, ikkinchi yarmiga esa Yoshua qolgan Isroil qabilalari bilan birga Iordanning gʻarbidan yer bergan edi. Yoshua duo qilib, ularni oʻz chodirlariga yuborayotganda,

⁸shunday degan edi: “Oʻz chodirlaringizga koʻp boylik bilan, nihoyatda koʻp mol — qoʻy, kumush, oltin, bronza, temir, koʻp kiyim — kechaklar bilan qaytib ketyapsizlar. Dushmanlaringizdan olgan oʻsha oʻljalarni birodarlaringiz bilan boʻlishib olinglar.”

⁹Shunday qilib, Ruben, Gad qabilalari va Manashe qabilasining yarmi oʻz uylariga qaytib ketishdi. Ularning hududi Iordan daryosining sharqida joylashgan edi. Egamiz Oʻz quli Muso orqali ularga amr qilib: “Mana shu yerlarni egallab olib, shu yerda joylashinglar”, degan edi. Isroil xalqining qolgan qabilalari Kan’on yurtidagi Shiloʻda[194] qoldi.

¹⁰Ruben, Gad qabilalari va Manashe qabilasining yarmi hali ham Kan’on yurtida ekanlar, Iordan daryosidan oʻtishdan oldin, daryoning yonidagi Geliloʻt degan joyda juda katta qurbongoh qurishdi.

¹¹Qolgan Isroil xalqiga: “Iordanning sharqidan ulush olgan Ruben, Gad qabilalari va Manashe qabilasining yarmi biz tomonda, Kan’on yurtining chegarasida, Geliloʻtda qurbongoh quribdi” degan xabar keldi.

¹²Isroil xalqining jamoasi buni eshitib, Manashe qabilasining yarmi, Ruben va Gad qabilalariga qarshi jang qilish uchun Shiloʻda yigʻildi.

¹³Ammo avval ular Giladga — Manashe qabilasining yarmi va Ruben, Gad qabilalarining oldiga ruhoniy Elazar[195] oʻgʻli Finxazni yuborishdi.

¹⁴Iordanning gʻarbidagi qabilalarning har biridan bir kishi — oʻz qabilasining boshligʻi boʻlgan oʻn kishi ham Finxaz bilan birga bordi.

¹⁵Ular Iordan daryosidan oʻtib, Giladga bordilar. Oʻsha yerda Finxaz va u bilan kelganlar Ruben, Gad qabilalari va Manashe qabilasining yarmiga shunday dedilar:

¹⁶— Biz Egamiz jamoasi nomidan gapiryapmiz. Nima uchun Isroil xalqining Xudosiga xiyonat qildingiz? Qanday qilib Egamizdan yuz oʻgirib, Unga qarshi bosh koʻtarib, oʻzingizga qurbongoh qurdingiz?[196]

¹⁷Piyor togʻida qilgan gunohimiz[197] yetmasmidi?! Oʻsha gunoh tufayli Egamizning butun jamoasi boshiga ofat keldi — ku. Biz hali ham oʻsha gunohdan butunlay poklanganimiz yoʻq.

¹⁸Sizlar esa yana Egamizdan yuz oʻgiryapsiz?! Sizlar bugun Egamizga qarshi bosh koʻtargan boʻlsangiz, ertaga U butun Isroil jamoasidan gʻazablanadi.

¹⁹Yeringiz Egamizga sajda qilishga mos kelmaydigan joy boʻlsa, daryoning narigi tomoniga — Egamizning Muqaddas chodiri tikilgan joyga oʻtib, bizning oramizda oʻzingizga biror yerni mulk qilib olinglar. Ammo Egamiz Xudoning qurbongohidan tashqari yana boshqa qurbongoh qurib olib, Egamizga yoki bizga qarshi bosh koʻtarmanglar[198].

²⁰Zerax oʻgʻli Oxun Egamizga xiyonat qilib[199], bagʻishlangan narsalardan[200] oʻgʻirlagan edi. Shu tufayli butun Isroil xalqining boshiga kulfat tushdi — ku! Oʻsha gunoh dastidan yolgʻiz uning oʻzi halok boʻlmadi — ku!

²¹Shunda Ruben, Gad qabilalari va Manashe qabilasining yarmi Isroil qabilalarining boshliqlariga shunday javob berishdi:

²²— Xudolar Xudosi Egamizdir! Xudolar Xudosi Egamizdir! Uning Oʻzi guvohimiz boʻlsin. Egamizning Oʻzi biladi. Butun Isroil xalqi ham bilsin. Biz qurbongohni Egamizga qarshi bosh koʻtarib yoki Unga xiyonat qilib qurganimiz yoʻq. Agar shu niyatda qurbongoh qurgan boʻlsak, endi bizni ayamanglar.

²³Biz bu qurbongohni Egamizdan yuz oʻgirganimiz uchun emas, hatto shu qurbongoh ustida kuydiriladigan qurbonliklaru don nazrlari va tinchlik qurbonliklari keltirish uchun ham qurganimiz yoʻq. Agar shu niyatda qurbongoh qurgan boʻlsak, Egamizning Oʻzi bizni jazolasin.

²⁴Biz qoʻrqqanimizdan shunday qildik. Vaqti kelib, sizlarning avlodlaringiz bizning avlodimizga shunday deb qolishi mumkin: “Isroil xalqining Xudosi — Egamiz bilan sizlarning nima ishingiz bor?!

²⁵Egamiz sizlar — Ruben va Gad qabilalari bilan bizning oramizda Iordan daryosini chegara qilib qoʻydi, Egamizda sizning hech haqingiz yoʻq.” Sizlarning avlodingiz shunday deb bizning avlodlarimizni Egamizga sajda qilishdan toʻxtatib qoʻyishi mumkin.

²⁶Shuning uchun biz shunday dedik: “Kelinglar, qurbongoh quraylik, bu qurbongoh kuydiriladigan qurbonliklaru boshqa har xil qurbonliklar keltirish uchun ishlatilmaydi.”

²⁷Biz bu qurbongohni siz bilan bizning oramizda, bizdan keyingi avlodlar orasida guvoh boʻlsin, deb qurdik. Biz ham, sizlar qatori, Egamizning Muqaddas chodiri oldida Egamizga sajda qilib, oʻsha yerda kuydiriladigan qurbonliklar, don nazrlari va tinchlik qurbonliklari keltirishga haqli ekanimizni mana shu qurbongoh koʻrsatadi. Shunda sizlarning avlodlaringiz bizning avlodlarimizga hech qachon: “Egamizda sizlarning haqingiz yoʻq”, — demaydi.

²⁸Bordi — yu, shunday deb aytishsa, biz yoki avlodlarimiz quyidagiday javob bera olamiz: “Mana, Egamiz qurbongohining nusxasiga qaranglar. Bizning ajdodlarimiz uni kuydiriladigan qurbonliklar va boshqa har xil qurbonliklar keltirish uchun emas, balki siz bilan bizning oʻrtamizda guvoh boʻlishi uchun qurishgan.”

²⁹Faqat Egamiz Xudoning Chodiri oldida turgan qurbongohdagina Unga atab kuydiriladigan qurbonliklar, don nazrlari va boshqa qurbonliklar keltirish mumkin. Egamizga qarshi bosh koʻtarishdan, Undan yuz oʻgirishdan Uning Oʻzi bizni saqlasin. Biz qurbonliklar keltirish uchun qurbongoh qurmaymiz.

³⁰Ruben, Gad qabilalari va Manashe qabilasining yarmi aytgan bu gaplarni eshitib, ruhoniy Finxaz va u bilan birga kelgan Isroil xalqining boshliqlari juda mamnun boʻlishdi.

³¹Ruben, Gad qabilalariga va Manashe qabilasining yarmiga Elazar shunday dedi: — Egamiz biz bilan birga ekanligiga bugun amin boʻldik. Sizlar Egamizga xiyonat qilmay, butun Isroil xalqini Uning gʻazabidan saqlab qoldingiz.

³²Keyin Elazar va Isroil xalqi boshliqlari Giladdan Kan’on yurtiga, Isroil xalqining oldiga qaytib kelib nima boʻlganini aytib berishdi.

³³Ular olib kelgan xabar Isroil xalqini mamnun qildi. Isroil xalqi Xudoga hamdu sano aytib, Ruben va Gad qabilalariga qarshi jang qilish va ularning yerlarini vayron qilish haqida boshqa ogʻiz ochmadi.

³⁴Ruben va Gad qabilalari qurbongohga Guvoh degan nom berishdi[201], chunki ular: “Egamiz — Xudo ekanligini bu qurbongoh hammamizga eslatib turadi”, deb aytishgan edi.