Read Uzbek Muqaddas Kitob 2 Salonikaliklar 3 Bible Online

2 Salonikaliklar 3 - Uzbek Muqaddas Kitob bible

2 Salonikaliklar 3

¹Ey birodarlar, xatimiz ham nihoyasiga yetib qoldi. Biz uchun ibodat qilinglar, xuddi sizlarning orangizda boʻlgani kabi, Rabbimiz Iso haqidagi Xushxabar tarqalaversin va izzat — hurmat bilan qabul qilinsin.

²Xudo bizni yomon va yovuz odamlardan qutqarishi uchun ham ibodat qilinglar, chunki hamma ham imonli emas.

³Ammo Rabbimiz Iso sadoqatlidir. U sizlarni kuchga toʻldirib, yovuz shaytondan himoya qiladi.

⁴Siz haqingizda Rabbimiz bizda ishonch hosil qildi. Biz aminmizki, buyurganlarimizni bajaryapsizlar va bajarishda davom etasizlar.

⁵Rabbimiz Iso Masih yuraklaringizni Unga sodiq boʻlishga va Xudoni sevishga yoʻnaltirsin.

⁶Birodarlar, Rabbimiz Iso Masih nomi bilan sizlarga buyuramiz: dangasalik qilayotgan, biz bergan ta’limotlarga koʻra yashamayotgan birodarlardan uzoqroq yuring.

⁷Bizdan qanday oʻrnak olishingiz kerakligini oʻzingiz bilasiz. Sizlarning orangizda boʻlganimizda dangasalik qilmadik.

⁸Birovning nonini bekorga yemadik. Aksincha, boshqalarga ogʻirligimiz tushmasin deb, kechayu kunduz ishladik. Mashaqqat bilan mehnat qildik.

⁹Albatta, sizlardan biror narsa talab qilishga haqimiz yoʻqligi uchun emas, balki sizlarga namuna boʻlish uchun shunday qildik.

¹⁰Axir, sizlar bilan boʻlganimizda: “Ishlamagan tishlamaydi!” deb aytgan edik — ku!

¹¹Eshitishimizcha, ba’zi birlaringiz yalqovlik qilayotgan ekansiz. Boshqalarning ishlariga aralashishdan boshqa narsani bilmas emishsiz.

¹²Mana shunday odamlarga Iso Masih nomi bilan buyurib aytamizki, tinchgina oʻz ishlaringiz bilan mashgʻul boʻling, nonni peshana teringiz bilan topib yeng.

¹³Sizlar esa, birodarlar, hech qachon yaxshilik qilishdan charchamanglar.

¹⁴Ushbu xatimizdagi yoʻl — yoʻriqlarga quloq solmaganlarni koʻz ostingizga olib qoʻying. Bunday odamlarni uyaltirish uchun ular bilan aloqada boʻlmang.

¹⁵Ularni dushman hisoblamang, balki birodar sifatida ogohlantiring.

¹⁶Tinchlik manbayi boʻlgan Rabbimiz Isoning Oʻzi sizlarga har doim va har yoʻsinda tinchlik bersin. Rabbimiz hammangizga yor boʻlsin.

¹⁷Men, Pavlus, mana shu maktubning yakunini oʻz qoʻlim bilan yozyapman[2]. Har bir yozgan maktubimning oʻziga xos belgisi shudir.

¹⁸Rabbimiz Iso Masihning inoyati hammangizga yor boʻlsin![3]