Read Uzbek Muqaddas Kitob 1 Timo‘tiy 1 Bible Online

1 Timo‘tiy 1 - Uzbek Muqaddas Kitob bible

1 Timo‘tiy 1

¹Najotkorimiz Xudoning va biz umid bogʻlagan Iso Masihning amriga koʻra, Masihning havoriysi etib tayinlangan men — Pavlusdan

²imondagi sodiq oʻgʻlim Timoʻtiyga[1] salom! Otamiz Xudo va Rabbimiz Iso Masih senga inoyat, marhamat va tinchlik ato qilsin.

³Men Makedoniyaga ketayotganimda, senga tayinlaganimday, Efes shahrida qol. U yerdagi ba’zi kishilar soxta ta’limotni oʻrgatayotgan ekanlar. Ularning bu qilmishlariga barham ber.

⁴Ularga, afsonalar va shajaralar[2] xususidagi bema’ni bahslar bilan band boʻlmanglar, deb buyur. Axir, bunday bahslar faqat janjallarga sabab boʻladi. Odamlar Xudoning najot rejasini anglashlariga bular yordam bermaydi. Zero, inson Xudoning najotini imon orqaligina anglab oladi.

⁵Men bu nasihatim bilan sizlarda mehr — muhabbat uygʻotmoqchiman. Mehr — muhabbat sof yurakdan, toza vijdondan, xolis imondan hosil boʻladi.

⁶Orangizdagi ba’zi odamlar esa bulardan yuz oʻgirib, ahmoqona bahslarga berilib ketganlar.

⁷Ular odamlarga Xudoning qonunini[3] oʻrgatishni orzu qiladilar, qonunga tishi oʻtmasa — da, u haqda soʻzlab, ishonch bilan gapiradilar.

⁸Biz bilamizki, qonundan Xudo koʻzlaganday foydalanilsa qonun yaxshidir!

⁹Xudoning qonuni solihlar uchun emas, balki qonunsizu itoatsizlar uchun berilgani hammamizga ma’lum. Darhaqiqat, qonun betavfiqu gunohkorlar, diyonatsizu xudobezorilar, ota yoki onasini oʻldirganlar, qotillar,

¹⁰fahshbozlar, bachchabozlar, odam savdosi bilan shugʻullanuvchilar, yolgʻonchilaru soxta guvohlik beruvchilar, xullas, sogʻlom ta’limotga zid ish qilayotganlarning hammasi uchun berilgan.

¹¹Xudo menga ishonib topshirgan bu haqiqat Xushxabarda bayon qilingan. Muborak Xudoning ulugʻvorligi Xushxabarda ayon etilgan.

¹²Ishimni bajarishda menga kuch — quvvat bergan Rabbimiz Iso Masihga shukurlar aytaman. U meni ishonchli deb bilib, Oʻz xizmatiga olgani uchun gʻoyatda minnatdorman.

¹³Men ilgarilari Masihga qarshi chiqar edim, Uning izdoshlarini ta’qib etib, ularga jabr — zulm qilardim. Biroq, shularga qaramay, Xudo menga rahm qildi, axir, men Masihga ishonmaganim uchun nima qilayotganimni oʻzim ham bilmasdim.

¹⁴Rabbimiz Iso Masih menga cheksiz inoyat koʻrsatdi. Uning Oʻzi menga imon ato qilib, mehru oqibatni oʻrgatdi.

¹⁵“Iso Masih gunohkorlarni qutqarish uchun dunyoga keldi” degan gap toʻgʻri va asoslidir, har jihatdan qabul qilinishga loyiqdir. Men oʻzim oʻsha gunohkorlarning eng ashaddiysi edim!

¹⁶Ammo Iso Masih menga rahm qildi. Menga oʻxshagan oʻtaketgan gunohkorlarga nisbatan U nihoyatda sabrli ekanini koʻrsatdi, toki boshqalar ham mendan ibrat olib, Unga ishonsinlar, abadiy hayotga ega boʻlsinlar.

¹⁷Mangu Shohga hamdu sanolar boʻlsin! Oʻlmas, koʻrinmas, yagona Xudoga[4] abadulabad shon — sharaflar boʻlsin! Omin.

¹⁸Ey oʻgʻlim Timoʻtiy, sen haqingda ilgari aytilgan bashoratlarga[5] binoan senga buyuraman: oʻsha bashoratlarga tayanib, ulugʻ kurashda jang qilgin.

¹⁹Imoningni mahkam tut, vijdonli boʻl. Ba’zi odamlar vijdonini sotdilar, ularning imoni halokatga uchragan kemaday barbod boʻldi.

²⁰Xumanayos[6] va Iskandar shular jumlasidandir. Men ularni shaytonga topshirdim[7]. Bu ularga saboq boʻlib, ular Xudoga va Uning azizlariga qarshi chiqishni bas qiladilar.