Read Uzbek Muqaddas Kitob 1 Timo‘tiy 3 Bible Online

1 Timo‘tiy 3 - Uzbek Muqaddas Kitob bible

1 Timo‘tiy 3

¹“Imonlilar jamoatining yetakchisi boʻlishga intilgan inson olijanob ishni orzu qilgan boʻladi” degan gap toʻgʻri va asoslidir.

²Darhaqiqat, bunday olijanob vazifaga tayinlanadigan inson yaxshi nom chiqargan boʻlishi shart. U oʻz xotiniga vafodor[14], mulohazali, vazmin, odobli, mehmondoʻst, ta’lim berishga qobiliyatli boʻlsin.

³U mayxoʻr, jahldor, janjalkash emas, balki muloyim, pulparastlikdan yiroq,

⁴xonadonini yaxshi boshqaradigan, farzandlari unga boʻysunib hurmat qiladigan boʻlsin.

⁵Agar yetakchi oʻz xonadonini boshqara olmasa, Xudoning jamoatiga qanday gʻamxoʻrlik qila oladi?!

⁶Endigina imonga kirgan odam yetakchi boʻlmasin, tagʻin kerilib, iblisning halokatli changaliga tushib qolmasin[15].

⁷U jamoatga qarashli boʻlmagan odamlar orasida ham hurmat — e’tiborga ega boʻlsin. Shunda u malomatga qolmaydi, shaytonning tuzogʻiga tushmaydi.

⁸Imonlilar jamoatining xizmatchilari ham hurmatga sazovor, samimiy insonlar boʻlishlari lozim. Ular mayxoʻr yoki molparast boʻlmasinlar.

⁹Xudo bizga ayon etgan haqiqat boʻyicha yashab, barcha ishni vijdonan bajarsinlar.

¹⁰Ular avval sinovdan oʻtishi kerak. Agar kamchiliksiz boʻlsalar, xizmatga tayinlansinlar.

¹¹Har bir xizmatchi oʻz xotiniga vafodor[16], farzandlarini va xonadonini yaxshi boshqaradigan odam boʻlishi shart. Xizmatchi ayollar[17] ham hurmatga sazovor boʻlishlari lozim. Ular gʻiybat qilmaydigan, mayxoʻrlikka berilmagan, har narsada ishonchli boʻlsinlar.

¹³Jamoatdagi oʻz xizmatini yaxshi bajarganlar el orasida taniladilar. Ular Iso Masihga boʻlgan imonda yuksak jasoratga ega boʻladilar.

¹⁴Men yaqin orada oldingga boraman degan umiddaman. Bordi — yu, kechiksam, Xudoning xonadonida odamlar oʻzlarini qanday tutishlari kerakligini bilishing uchun bularni senga yozdim. Zero, jamoat barhayot Xudoga tegishlidir, jamoat haqiqatning poydevori va ustunidir.

¹⁶Darhaqiqat, Xudo bizga ayon etgan haqiqat buyukdir. Asl xudojoʻylikning manbayi boʻlmish bu haqiqat quyidagichadir[18]: Masih[19] yer yuziga inson boʻlib keldi. Yangi, ulugʻvor hayot uchun oʻlikdan tirilib, Xudoning Oʻgʻli deb tasdiqlandi[20]. U zohir boʻldi farishtalarga[21]. U haqdagi Xushxabar e’lon etildi xalqlarga, Dunyo boʻylab odamlar Unga imon keltirdi. Ulugʻvorlikka burkanib U samoga yuksaldi.