Read Uzbek Muqaddas Kitob 1 Timo‘tiy 4 Bible Online

1 Timo‘tiy 4 - Uzbek Muqaddas Kitob bible

1 Timo‘tiy 4

¹Xudoning Ruhi yaqqol aytyaptiki, oxirgi zamonlarda ba’zi odamlar imondan qaytadilar. Ular yolgʻonchi ruhlarga va jinlar ta’limotiga quloq soladilar.

²Bunday ta’limotni tarqatgan odamlar riyokor va yolgʻonchidirlar. Ularning vijdoni oʻlgan, goʻyo qizdirilgan temir bilan kuydirilib yoʻq qilingan.

³Ular uylanishni va erga tegishni man etadilar, ma’lum ovqatlarni taqiqlaydilar. Holbuki, bu ovqatlarni Xudo bergan. Haqiqatni bilib olgan imonlilar Unga shukrona aytib, yeyishlari uchun yaratgan.

⁴Chunki Xudo yaratgan har bir narsa yaxshidir. Biz hech bir taomni taqiqlamay, shukrona aytib, hammasini yeyishimiz lozim.

⁵Biz ovqatimiz uchun Xudoga shukurlar aytganimizda, Xudo barcha ozuqani halol deb e’lon qilganini e’tirof etgan boʻlamiz.

⁶Sen bu nasihatlarimni birodarlaringga oʻrgatsang, Iso Masihning layoqatli xizmatkori boʻlasan. Oʻzing rioya qilayotgan sogʻlom ta’limotni va imonimizning aqidalarini oʻzlashtirib, ruhan oziqlanib borasan.

⁷Safsataboz kampirlarga xos bema’ni afsonalardan[22] yuz oʻgir. Xudojoʻy boʻlishga astoydil harakat qil.

⁸Axir, shunday bir maqol bor — ku: “Jismoniy mashq tana uchun foyda berar, xudojoʻylik esa har tomonlama foyda keltirar, u dunyoyu bu dunyoda hayot baxsh etar.”

⁹Bu gap toʻgʻri va asoslidir, u har jihatdan qabul qilinishga loyiqdir.

¹⁰Odamlar abadiy hayotga ega boʻlishlari uchun biz jon — jahdimiz bilan xizmat qilyapmiz[23]. Barhayot Xudoga umid bogʻlaganmiz. U barcha insonlarning, ayniqsa imonlilarning Najotkoridir[24].

¹¹Sen birodarlarga ta’lim bergin, bu oʻgitlarga rioya qilishlarini ularga oʻrgatgin.

¹²Yoshsan deb, hech kim seni kamsitmasin. Aksincha, hammaning hurmatini qozonish uchun sen soʻzda, yurish — turishda, mehr — oqibatda, imonda va axloqda imonlilarga oʻrnak boʻlgin.

¹³Men oldingga borgunimcha jamoatda Muqaddas bitiklarni ovoz chiqarib oʻqishga[25], nasihat va ta’lim berishga vaqtingni bagʻishla.

¹⁴Oʻzingga berilgan in’omga[26] e’tiborli boʻl, uni ishga sol. Axir, sen bu in’omingni aytilgan bashoratlar va oqsoqollar ustingga qoʻl qoʻyib qilgan duolari natijasida olgansan.

¹⁵Aytganlarimning hammasini amalda qoʻlla. Oʻzingni bu vazifaga sidqidildan bagʻishla, shunda sen Xudoning yoʻlida shaxdam qadam bilan, ildamlab borayotganingni hamma koʻradi.

¹⁶Hayot tarzingga, nimalar oʻrgatayotganingga e’tibor qil. Bu faoliyatingni astoydil davom ettir, shunday qilsang, oʻzingni ham, tinglovchilaringni ham qutqarasan.