Read Uzbek Muqaddas Kitob 1 Timo‘tiy 6 Bible Online

1 Timo‘tiy 6 - Uzbek Muqaddas Kitob bible

1 Timo‘tiy 6

¹Qullik boʻyinturugʻi ostida boʻlganlar oʻz xoʻjayinlarini kamoli ehtiromga loyiq hisoblasinlar. Toki, hech kim Xudoning nomini va ta’limotini haqoratlamasin.

²Xoʻjayinlari imonli boʻlgan qullar, “bir — birimizga birodarmiz”, deb xoʻjayinlariga hurmatsizlik qilmasinlar. Aksincha, yanada koʻproq tirishib, ularga xizmat etsinlar. Chunki aziz birodarlari boʻlmish xoʻjayinlari oʻz qullarining farovonligini koʻzlab, nonini but qilyaptilar. Ana shu barcha koʻrsatmalarim haqida ta’lim berib, nasihat qil.

³Agar kim begona ta’limotni yoysa va Rabbimiz Iso Masihning haqiqiy kalomiga qarshi chiqib, xudojoʻylikka chorlovchi ta’limotimizni rad etsa,

⁴u bosar — tusarini bilmay qolgan nodondir. Bunday odam biror masala borasida talashish va ikir — chikir gaplar haqida bahslashish kasaliga yoʻliqqan, uning gʻalamisona gaplari hasad, janjal, tuhmat, tuban gumonlar

⁵va toʻpolonlarga sabab boʻladi. Fikri buzuq bunday odamlar haqiqatdan mahrumdirlar. Ular soxta xudojoʻyligini foyda manbayi deb biladilar[35].

⁶Toʻgʻri, xudojoʻylikdan foyda katta, qachonki biz bori bilan qanoatlansak.

⁷Axir, biz bu dunyoga hech narsa olib kelmadik va undan hech narsa olib keta olmaymiz.

⁸Qornimiz toʻq, ustimiz but boʻlsa, shular bilan qanoat qilaylik.

⁹Boylikka oʻch boʻlganlar esa vasvasa tuzogʻiga tushadilar, ular koʻp bema’ni va zararli havaslarga berilib, halokat girdobiga gʻarq boʻladilar.

¹⁰Pulparastlik har qanday yomonlikning negizidir. Mana, ba’zilar boylik ketidan quvib, imondan qaytib ketdilar va oʻzlarini koʻpgina azoblarga duchor qildilar.

¹¹Ey Xudoning quli Timoʻtiy, sen esa oʻzingni bu illatlardan olib qoch. Solihlik, xudojoʻylik, imon, sevgi, sabr — toqat va muloyimlikning payida boʻl.

¹²Abadiy hayotga erishish maqsadida, imon uchun boʻladigan ulugʻ kurashda jang qil. Axir, Xudo seni abadiy hayotga da’vat etgan. Sen bu hayotga ega boʻlish uchun koʻp guvohlar oldida Iso Masihga boʻlgan imoningni mardlarcha tan olgansan.

¹³Poʻntiy Pilat[36] qoshida haqiqatni mardlarcha tan olgan Iso Masih huzurida va butun borliqqa hayot bagʻishlagan Xudo huzurida senga buyuraman:

¹⁴zimmangdagi xizmatingni halollik bilan bajar. Rabbimiz Iso Masih keladigan kungacha oʻzingni gap tegmaydigan qilib tut.

¹⁵Yagona muborak Hokim boʻlgan Xudo Oʻzi belgilagan paytda Iso Masihni yuboradi. Xudo shohlarning Shohi, hukmdorlarning Hukmdoridir.

¹⁶U yagona mangu Xudodir. U yaqinlashib boʻlmaydigan nurda yashaydi, Uni hech bir inson koʻrmagan hamda koʻrishi mumkin emas. Abadiy saltanat Sohibi boʻlgan Xudoga shon — sharaflar boʻlsin! Omin.

¹⁷Bu dunyoda boylik topgan birodarlarga ayt, magʻrurlanmasinlar, bevafo boylikka umid qilmasinlar. Aksincha, umidini Xudoga bogʻlasinlar. Xudo bizga hamma narsani xursand boʻlishimiz uchun saxovat bilan beradi.

¹⁸Ularga buyur, yaxshilik qilsinlar, xayrli ishlarga boy, saxiy, ochiq qoʻl boʻlsinlar.

¹⁹Shunda ular asl xazina toʻplab, kelgusi dunyo uchun oʻzlariga mustahkam zamin yaratgan boʻladilar, haqiqiy hayotga erishadilar.

²⁰Ey Timoʻtiy, senga ishonib topshirilgan Xushxabarni[37] asragin. Xudodan uzoqlashtiradigan quruq gaplaru haqiqatga zid boʻlgan ta’limotlardan qochgin. Ba’zi odamlar adashib, bularni “bilim” deb ataydilar.

²¹Bunday “bilim”ga tayangan ba’zilar haq yoʻldan ozdilar. Xudoning inoyati sizlarga yor boʻlsin[38].