Read Uzbek Muqaddas Kitob 2 Timo‘tiy 1 Bible Online

2 Timo‘tiy 1 - Uzbek Muqaddas Kitob bible

2 Timo‘tiy 1

¹Xudoning irodasi bilan Iso Masihning havoriysi boʻlgan men — Pavlusdan sevimli oʻgʻlim Timoʻtiyga[2] salom! Xudo abadiy hayotni e’lon qilishim uchun meni yubordi. U va’da qilgan bu hayotga Iso Masihga boʻlgan imon orqali erishiladi. Oʻgʻlim Timoʻtiy, senga Otamiz Xudo va Rabbimiz Iso Masih inoyat, marhamat va tinchlik ato qilsin.

³Timoʻtiy, boringga shukur! Men, ota — bobolarim kabi, Xudoga vijdonan xizmat qilib, kechayu kunduz sen uchun ibodat qilaman.

⁴Seni juda sogʻinganman, koʻz yosh toʻkkanlaring hamon yodimda. Qaniydi, diydoringni koʻrsam — u, qalbim quvonchga toʻlsa, deyman.

⁵Sening samimiy imoningni doim eslayman. Avvaldan buving Loida hamda onang Evnika oʻz qalblariga jo etgan oʻsha imon endi senda ham ravnaq topayotganiga aminman.

⁶Shu sababdan, yodingda boʻlsin: men ustingga qoʻllarimni qoʻyib duo qilganimda[3], sen Xudodan Muqaddas Ruhni in’om[4] qilib olgansan. Ichingdagi oʻsha Muqaddas Ruh in’omini alangalatib tur.

⁷Zero, Xudo bergan Ruh qalbimizga qoʻrquv solmaydi, aksincha, bizga kuch, muhabbat va aqli rasolikni ato qiladi.

⁸Shunday ekan, Rabbimiz Iso haqida shohidlik berishdan or qilma, men Rabbimiz tufayli zanjirband boʻlganimdan ham uyalma. Mendan ibrat olib, Xushxabar tufayli azob chekishga tayyor turgin, buning uchun Xudoning bergan kuchiga tayangin.

⁹Axir, Xudo bizga najot berdi, Xushxabar aytish kabi muqaddas xizmatga bizni da’vat etdi. Bunga bizning savob ishlarimiz emas, aksincha, Xudoning murod — maqsadiyu inoyati sabab boʻldi. Xudo azaldanoq Iso Masih orqali bizga inoyat koʻrsatishga qaror qilgan edi.

¹⁰Mana endi bu inoyat najotkorimiz Iso Masihning olamga kelishi bilan yaqqol namoyon boʻldi. Masih oʻlim kuchini yoʻq qildi. U mangu hayotga eltuvchi yoʻlni bizga Xushxabar orqali yoritib berdi.

¹¹Xudo meni bu Xushxabarni turli xalqlarga yetkazuvchi voiz, havoriy va muallim qilib tayinladi.

¹²Shu sababdan ham bu azoblarni tortyapman. Biroq men bundan or qilmayman, chunki Kimga e’tiqod qilganimni yaxshi bilaman. Ishonchim komilki, Xudo menga topshirgan Xushxabarni qiyomat kunigacha Uning Oʻzi toʻligʻicha saqlashga qodir[5].

¹³Sen mendan eshitgan bu sogʻlom ta’limotdan namuna olgin, uni asragin. Iso Masihga tegishli boʻlgan inson sifatida imon va muhabbatga toʻla hayot kechirgin.

¹⁴Senga ishonib topshirilgan bu ezgu ta’limotni ichimizda yashayotgan Muqaddas Ruh yordamida avaylab — asragin.

¹⁵Asiya viloyatidagi barcha birodarlar, shu jumladan, Figelus bilan Hermogenes mendan yuz oʻgirganlarini bilasan.

¹⁶Onisiforus baraka topsin, Rabbimiz Iso uning xonadoniga marhamat qilsin. Onisiforus bir necha marta kelib, mening koʻnglimni koʻtardi. Zanjirbandligimdan[6] or qilmay,

¹⁷Rimga kelishi bilanoq, meni astoydil qidirib, oxiri topdi.

¹⁸U menga Efes shahrida ham qanchalar xizmat qilganini oʻzing yaxshi bilasan. Yo Rabbim Iso, qiyomat kunida Oʻz marhamatingni Onisiforusdan darigʻ tutmagin!