Read Uzbek Muqaddas Kitob 2 Timo‘tiy 2 Bible Online

2 Timo‘tiy 2 - Uzbek Muqaddas Kitob bible

2 Timo‘tiy 2

¹Timoʻtiy oʻgʻlim, bardam boʻl. Buning uchun Iso Masih orqali koʻrsatilgan Xudoning inoyatiga tayangin.

²Sen koʻp shohidlar huzurida Xushxabar haqida ta’lim berganimni eshitgansan. Endi bu ta’limotni boshqalarga ham oʻrgatishga qobiliyati bor, ishonchli odamlarga topshirgin.

³Iso Masihning yaxshi bir askari kabi, men bilan birga azob chekishga tayyor turgin.

⁴Harbiy xizmatdagi askar tirikchilik ishlari bilan band boʻlmaydi, chunki qoʻmondonini mamnun qilishni istaydi.

⁵Shuningdek, musobaqada qatnashgan kishi qoidaga rioya qilmasa, gʻalaba tojini kiymaydi.

⁶Mehnat qilgan dehqon olgan hosilidan birinchi boʻlib bahramand boʻlishi lozim.

⁷Aytganlarim haqida mulohaza qil, bularni tushunib olishingga Rabbimiz Iso senga yordam beradi.

⁸Dovud naslidan boʻlgan Iso Masih oʻlikdan tirilganini doimo yodingda tut! Men targʻib qilayotgan Xushxabar shudir!

⁹Ana shu Xushxabar uchun men azoblarga duchor boʻlyapman, hatto jinoyatchiday zanjirband qilindim[7]. Ammo Xudoning kalomini zanjirlab boʻlmaydi!

¹⁰Shunday ekan, Xudoning tanlagan odamlari Iso Masih bergan najotdan bahramand boʻlsinlar, abadiy ulugʻvorlikka erishsinlar deb, men hamma narsaga chidab kelyapman.

¹¹Quyidagi gap toʻgʻri va asoslidir: “Agar biz Masih bilan birga oʻlgan boʻlsak, U bilan birga ham yashaymiz.

¹²Agar qiyinchiliklarga chidasak, U bilan birga hukmronlik qilamiz. Bordi — yu, Uni rad etsak, U ham bizni rad etadi.

¹³Sodiq boʻlmasak ham, Masih sodiq boʻlib qolaveradi, Axir, U Oʻz tabiatiga qarshi chiqa olmaydi.”

¹⁴Bu gaplarni imonlilarga eslatib tur, ularga Xudoning nomidan qat’iy buyur: mayda — chuyda gaplar yuzasidan bahslashmasinlar. Bunday bahslar befoyda, tinglovchilarga faqat zarar yetkazadi, xolos.

¹⁵Xudoning oldida yorugʻ yuz bilan tura olishing uchun astoydil mehnat qil. Oʻz ishidan uyalmaydigan, haqiqat kalomini toʻgʻri oʻrgatadigan xizmatchi boʻlgin.

¹⁶Xudodan uzoqlashtiradigan quruq gaplardan qoch. Bunday gaplarga berilgan odamlar tobora betavfiq boʻlib boradi.

¹⁷Ularning bu ta’limoti oʻlat kabi yoyiladi. Mana, Xumanayos[8] bilan Filitus ham shunday odamlar jumlasidan.

¹⁸Ular toʻgʻri yoʻldan ozganlar. Biz allaqachon oʻlikdan tirildik[9], deb ba’zilarni imonidan qaytaryaptilar.

¹⁹Ammo Xudo asos solgan poydevor mustahkam turibdi. Bu poydevor ustiga shunday soʻzlar bitilgan: “Egamiz Oʻzinikilarni biladi” va “Egamizning nomini tilga olgan har bir odam yomonlikdan uzoqlashsin.”

²⁰Katta bir uyda nafaqat oltin va kumush idishlar, balki yogʻoch va sopol idishlar ham bor. Oltin va kumush idishlar xoʻjayinga sharaf keltiradi, qadrsiz idishlar esa uning obroʻyini toʻkadi.

²¹Kim oʻzini men aytgan yomonliklardan poklasa, Egasi uchun sharaf keltiradigan idishday boʻladi. Bunday odam Egasiga xizmat qilishga bagʻishlangan, har bir yaxshi ish qilishga tayyor boʻladi.

²²Oʻgʻlim, yoshlik ehtiroslaridan qoch. Chin yurakdan Rabbimiz Isoga iltijo qilgan odamlar bilan birga solihlik, imon, mehr — muhabbat va tinchlik payida boʻlgin.

²³Ahmoqona, bema’ni bahslardan uzoqlash. Oʻzing bilasan — ku, bular faqat janjal keltirib chiqaradi.

²⁴Rabbimiz Isoning quli esa janjalkash boʻlmasligi kerak. Aksincha, u hammaga mehribon, ta’lim berishga qobiliyatli, sabr — toqatli boʻlishi lozim.

²⁵U oʻz raqiblarini muloyimlik bilan yoʻlga solsin. Kim bilsin, balki Xudo ularni tavbaga olib kelar?! Shunda ular haqiqatni bilib,

²⁶oʻzlariga kelarlar, iblisning tuzogʻidan qutulib qolarlar. Axir, iblis ularni asir qilib, oʻziga tobe qilib olgan.