Read Uzbek Muqaddas Kitob 2 Timo‘tiy 4 Bible Online

2 Timo‘tiy 4 - Uzbek Muqaddas Kitob bible

2 Timo‘tiy 4

¹Xudo huzurida hamda tirigu oʻliklarni hukm qiladigan Iso Masih huzurida, Uning kelishi va hukmronligi haqi, senga qat’iy buyuraman:

²Xudoning kalomini targʻib qil. “Hozir buning vaqtimi, vaqti emasmi?” demay, uni astoydil e’lon qil. Odamlarga ta’lim berib, ularni toʻgʻri yoʻlga sol, tanbeh ber, nasihat qil. Hammasini sabr — toqat bilan bajar.

³Chunki shunday vaqt keladiki, odamlar sogʻlom ta’limotga toqat qilmaydigan boʻladilar, ular atrofiga oʻzlariga mos, quloqlariga yoqimli soʻzlar aytadigan muallimlar toʻplaydilar.

⁴Ular haqiqatdan yuz oʻgirib, afsonalarga berilib ketadilar.

⁵Ammo sen har qanday sharoitda aql bilan ish tut, azoblarga chida, Xushxabarni targʻib qil, oʻz xizmatingni toʻliq bajargin.

⁶Men hademay bu dunyodan oʻtib ketaman[12], jonim Xudoga qurbon[13].

⁷Men ulugʻ kurashda jang qildim, zimmamdagi vazifani oxiriga yetkazdim, Xushxabarga sodiq qoldim.

⁸Meni solihlik toji kutmoqda. Odil Hakam — Rabbimiz Iso kelgan kunda oʻsha tojni menga Oʻzi beradi. Bunday toj faqat menga emas, balki Uning kelishini intizorlik bilan kutayotganlarning hammasiga nasib boʻladi.

⁹Mening oldimga tezroq kelishga harakat qil.

¹⁰Chunki Dimas bu dunyoga koʻngil bogʻlab, meni tark etdi. U Salonika shahriga ketdi. Kriskes Galatiya viloyatiga, Titus[14] Dalmatiya viloyatiga[15] ketdi. Yonimda faqat Luqo[16] bor.

¹¹Markni[17] oʻzing bilan birga olib kel, u xizmatimda menga yordam beradi.

¹²Men Tixikusni Efes shahriga yubordim.

¹³Kelayotganingda oʻzing bilan toʻnimni olib kel, men uni Troas shahridagi Karpusnikida qoldirganman. Qoʻlyozmalarni[18] ham, ayniqsa, charmga yozilganlarini olib kel.

¹⁴Temirchi Iskandar menga koʻp yomonlik qildi. Rabbimiz Iso uni qilmishiga yarasha jazolaydi.

¹⁵Sen Iskandardan ehtiyot boʻl, chunki u bizning ta’limotimizga qattiq qarshilik koʻrsatdi.

¹⁶Meni birinchi marta mahkamaga olib borishganda, hech kim meni yoqlamadi. Hamma meni tashlab ketdi. Xudo bu aybni ularning boʻyniga qoʻymasin!

¹⁷Ammo Rabbim Iso yonimda turdi, Xushxabarni toʻligʻicha barcha xalqlarga yetkazishim uchun Uning Oʻzi menga kuch berdi. U meni oʻlim changalidan[19] qutqardi.

¹⁸Rabbim meni bundan keyin ham har qanday yomonlikdan xalos qiladi va Oʻzining samoviy Shohligiga sogʻ — salomat yetkazadi. Unga abadulabad shon — sharaflar boʻlsin! Omin.

¹⁹Priskilla bilan Akilga[20] va Onisiforusning xonadoniga salom aytib qoʻy.

²⁰Erastus Korinf shahrida qoldi. Trofimus esa kasal boʻlgani uchun, uni Mileytus shahrida qoldirdim.

²¹Qish boshlanmasdan oldin[21] kelishga harakat qil. Ebulus, Pudes, Linus, Klavdiya va bu yerdagi hamma imonlilar senga salom yoʻllayaptilar.

²²Rabbimiz Iso senga hamroh boʻlsin. Uning inoyati hammangizga yor boʻlsin[22].