Read Uzbek Muqaddas Kitob Titus 3 Bible Online

Titus 3 - Uzbek Muqaddas Kitob bible

Titus 3

¹Sen jamoatdagilarga eslatib tur: ular davlat boshliqlariyu hokimlarga boʻysunsinlar, itoat etib, har qanday xayrli ishga tayyor boʻlsinlar.

²Hech kimni yomonlamasinlar, janjallashmasinlar, boshqalarga nisbatan doim muloyim va mehribon boʻlsinlar.

³Bir vaqtlar bizlar ham fahmsiz, itoatsiz, adashgan odamlar edik, har xil zavqu ehtiroslarning quli boʻlib, gina — kudurat va hasadgoʻylik bilan kun kechirardik, bir — birimizdan nafratlanadigan razil odamlar edik.

⁴Ammo najotkorimiz Xudo bizga boʻlgan ezguligi va mehr — muhabbatini koʻrsatdi.

⁵Savob ishlarimiz tufayli emas, balki Oʻzining rahm — shafqati tufayli U bizni qutqardi. Muqaddas Ruh orqali gunohlarimizni yuvdi, bizni yangidan tugʻdirib, yangi hayot ato etdi.

⁶Najotkorimiz Iso Masih orqali Xudo bizning ustimizga Muqaddas Ruhini moʻl — koʻl qilib yogʻdirdi.

⁷Biz Isoning inoyati bilan oqlandik, endi abadiy hayotga umid bogʻlab, Xudo va’da qilgan barakalardan bahramand boʻla olamiz.

⁸Bu gaplarning hammasi toʻgʻri va asoslidir. Ushbu ta’limotning foydasi katta. Jamoatdagilarga yaxshilab uqtir, ular oʻrgatganlarimning hammasiga rioya qilsinlar. Xudoga ishonganlar xayrli ishlarga astoydil bel bogʻlasinlar.

⁹Sen esa ahmoqona bahslardan, shajaralar[5] hamda Tavrot qonunlari borasidagi munozarayu janjallardan oʻzingni olib qoch[6]. Bular foydasiz va behudadir.

¹⁰Orangizga nizo urugʻini sepayotgan odamni bir — ikki marta ogohlantir, agar gapingga kirmasa, u bilan aloqani uz.

¹¹Oʻzing bilasan — ku, bunday odamning fikri buzuq. Uning qilayotgan gunohlari oʻzini mahkum etadi.

¹²Artemas yoki Tixikusni sening yoningga yuborganimdan keyin, Nikopolis shahriga[7], mening oldimga tezroq kelishga harakat qil. Chunki men qishni shu yerda oʻtkazishga qaror qildim.

¹³Qoʻlingizdan kelgancha qonunshunos Zinas va Apollosga[8] yordam qilinglar, safarga chiqishlari uchun kerakli hamma narsani ularga bekamu koʻst qilib yetkazib beringlar.

¹⁴Toki jamoatdagilar ham xayrli ishlarga astoydil bel bogʻlashga odatlansinlar, boshqalarning zaruriy ehtiyojlarini qondirsinlar, shunda hayotlari samarasiz boʻlmaydi.

¹⁵Yonimdagilarning hammasi senga salom yoʻllayaptilar. Bizni yaxshi koʻradigan imondagi birodarlarimizga salom aytgin. Xudoning inoyati hammangizga yor boʻlsin[9].