Read Uzbek Muqaddas Kitob Filimo‘n 1 Bible Online

Filimo‘n 1 - Uzbek Muqaddas Kitob bible

Filimo‘n 1

¹Iso Masihga qilgan xizmatim tufayli qamoqda boʻlgan[2] men — Pavlusdan hamda birodarimiz Timoʻtiydan[3] sevikli hamkorimiz Filimoʻnga salom!

²Singlimiz[4] Affiya bilan safdoshimiz Arxippusga, shuningdek, xonadoningda yigʻilib turadigan imonlilar jamoatiga ham salom yoʻllaymiz.

³Otamiz Xudo va Rabbimiz Iso Masih sizlarga inoyat va tinchlik ato qilsin.

⁴Ey Filimoʻn, men ibodat qilganimda seni eslab, har doim Xudoyimga shukur aytaman.

⁵Chunki sening Rabbimiz Isoga boʻlgan imoning va barcha aziz birodarlarga boʻlgan muhabbating haqida eshitib turibman.

⁶Ibodatim shuki, birgalikda baham koʻrayotgan imonimiz sening hayotingda samara bersin. Iso Masih uchun qilishimiz kerak boʻlgan yaxshiliklarni chuqurroq tushunishingga olib kelsin.

⁷Birodarim, sen tufayli birodarlarning koʻngli tinch. Sening mehr — muhabbating menga katta sevinch va tasalli berdi.

⁸Filimoʻn, sen ham, men ham Masihga ishonamiz. Shuning uchun men senga, oʻz burchingni bajargin, deb buyurishga haddim sigʻadi.

⁹Ammo sen meni yaxshi koʻrganing uchun iltimos qilishni afzal koʻrdim. Iso Masih tufayli qamoqda boʻlgan, yoshi oʻtib qolgan men, Pavlus,

¹⁰mahbusligimda imon orqali menga oʻgʻil boʻlib qolgan Oʻnisimus[5] uchun sendan iltimos qilyapman.

¹¹Oʻnisimus bir vaqtlar senga foydasiz edi. Endi esa u senga ham, menga ham foydalidir[6]. Koʻzimning oqu qorasiday boʻlib qolgan Oʻnisimusni sening oldingga qaytarib yubordim.

¹³Men Xushxabarni targʻib qilganim uchun qamoqda yotibman. Oʻnisimusning yonimda qolishini, sening oʻrningga menga xizmat qilishini xohlar edim.

¹⁴Ammo sening roziligingsiz hech bir ish qilishni xohlamadim, chunki sening iltifotingni majburiy emas, balki ixtiyoriy boʻlishini istadim.

¹⁵Balki, sen Oʻnisimusni abadiy qaytarib olishing uchun u sendan vaqtinchalik ajralgandir[7].

¹⁶Endi u senga faqatgina qul emas, balki quldan yuqori, sevikli birodaringdir. Men uni juda qadrlayman. Ishonchim komilki, u senga qul sifatida ham, Rabbimiz Iso orqali birodaring sifatida ham yanada qadrliroqdir.

¹⁷Agar sen meni Rabbimiz xizmatidagi safdoshing deb bilsang, Oʻnisimusni meni qabul qilganday qabul qilgin.

¹⁸Mabodo, u senga zarar keltirgan boʻlsa yoki sendan qarzdor boʻlsa, buni mening zimmamga yukla.

¹⁹Men, Pavlus, quyidagini oʻz qoʻlim bilan yozyapman[8]: men qarzingni toʻlayman. Sen oʻz hayoting uchun[9] mendan qarzdor ekanligingni aytishimning esa hojati yoʻq.

²⁰Ha, birodarim, Rabbimiz Iso tufayli mendan bu iltifotingni ayama! Masih haqi — hurmati jonimga oro kirgin!

²¹Sen mening soʻzlarimga quloq solib, aytganlarimni qilasan, ha, bundan ham koʻprogʻini bajarasan, deb ishonganim uchun bularni yozdim.

²²Bundan tashqari, menga biror turar joy ham tayyorlab qoʻygin. Chunki Xudo ibodatlaringizni eshitib, meni yana sizlarning oldingizga qaytarishiga ishonaman.

²³Men bilan birga Iso Masih nomi uchun mahbus boʻlgan Epafras, hamkorlarim Mark[10], Aristarxus, Dimas, Luqo[11] senga salom yoʻllayaptilar.

²⁵Rabbimiz Iso Masihning inoyati sizlarga yor boʻlsin[12].