Read Uzbek Muqaddas Kitob Ibroniylar 1 Bible Online

Ibroniylar 1 - Uzbek Muqaddas Kitob bible

Ibroniylar 1

¹Xudo qadimda ota — bobolarimizga[1] koʻp marta va turli tarzda paygʻambarlar orqali gapirgan edi.

²Bu oxirgi kunlarda[2] esa U bizga Oʻz Oʻgʻli orqali gapirdi. Xudo koinotni Oʻgʻli orqali yaratgan va Uni butun borliqning vorisi qilib tayin etgan.

³Oʻgʻil — Xudo shuhratining porlashi, Xudo borligʻining aniq suratidir. U Oʻzining qudratli kalomi bilan koinotni asrab turibdi. U Oʻz jonini fido qilib, bizni gunohlardan pokladi, soʻng samoda Ulugʻvor Xudoning oʻng tomonida oʻtirdi[3].

⁴Darhaqiqat, Xudo Masihga “Oʻgʻil” deb ulugʻ nom berdi. Bu nom Masih farishtalardan nihoyatda yuksak martabaga ega ekanligini koʻrsatib turibdi.

⁵Axir, Xudo bironta farishtaga: “Sen Mening Oʻgʻlimsan, Bugun Men Senga Ota boʻldim”[4], — deb aytmagan! Yoki: “Men Unga Ota boʻlaman, U esa Menga Oʻgʻil boʻladi”[5], — demagan!

⁶Toʻngʻich Oʻgʻlini[6] bu dunyoga[7] yana yuborishidan oldin esa Xudo shunday deb aytadi[8]: “Hamma farishtalarim Unga sajda qilsinlar.”

⁷Farishtalar haqida esa Xudo: “Men Oʻz malaklarimni shamollarga aylantiraman, Xizmatkorlarimni lovullagan olov qilaman”[9], — degandi.

⁸Ammo Oʻz Oʻgʻliga U shunday degan: “Sen Xudosan, Sening taxting abadiydir, Adolat hassasi shohliging hassasidir.

⁹Sen solihlikni sevasan, qabihlikdan nafratlanasan. Shu bois Men Seni doʻstlaringdan ustun qildim, Ha, Men, Xudoying, shodlik moyini Senga surtdim.”[10]

¹⁰Oʻgʻliga yana shunday degan: “Sen Rabbiysan, Azalda zaminning poydevorini Sen qoʻygansan, Samolarni Oʻz qoʻllaring ila yaratgansan.

¹¹Ular yoʻq boʻlib ketar, Sen turaverasan, Yeru osmon kiyim kabi eskirib ketadi.

¹²Keraksiz libosday ularni taxlab qoʻyasan, Toʻzib ketgan kiyimday ularni almashtirasan. Sen esa hech oʻzgarmassan, Sen to abad yashaysan.”[11]

¹³Xudo bironta farishtaga: “Dushmanlaringni oyoqlaring ostiga poyandoz qilmagunimcha, Sen Mening oʻng tomonimda oʻtirgin”[12], — deb aytmagan.

¹⁴Axir, farishtalar bor — yoʻgʻi xizmatchi ruhlardir! Xudo ularni abadiy hayotdan bahramand boʻladigan odamlarga xizmat qilish uchun yuborgan.