Read Uzbek Muqaddas Kitob Ibroniylar 10 Bible Online

Ibroniylar 10 - Uzbek Muqaddas Kitob bible

Ibroniylar 10

¹Qonun boʻlgʻusi xayr — barakalarning asl surati emas, bor — yoʻgʻi soyasidir. Har yili qonun boʻyicha Xudoga bir xil qurbonliklar keltiriladi. Demak, qonun bu qurbonliklar orqali Xudoga sajda qiluvchilarni kamolotga yetkaza olmaydi.

²Bordi — yu, oʻsha odamlar qurbonliklari orqali gunohdan poklana olganlarida edi, ularning vijdoni qiynalmasdi va ular qurbonlik keltirishni bas qilardilar.

³Holbuki, qurbonliklar har yili odamlarga gunohlarini eslatadi, xolos.

⁴Chunki buqayu takalarning qoni hech qachon gunohlarni yuva olmaydi.

⁵Shuning uchun Masih dunyoga kelganda Xudoga shunday degan edi: “Sen qurbonligu nazr istamading, Kuydiriladigan qurbonlik hamda Gunoh qurbonligidan[71] mamnun boʻlmading, Itoat qilishim uchun Menga badan hozirlading.

⁷Oʻshanda dedimki: «Mana, Men keldim. Muqaddas bitiklarda Men haqimda yozilgan. Sening xohishingni ado etish uchun keldim, ey Xudoyim.»”[72]

⁸Dastlab Masih qonun talab qilgan qurbonliklar haqida soʻz yuritib, Xudoga: “Sen qurbonligu nazr istamading, kuydiriladigan qurbonlik hamda gunoh qurbonligidan mamnun boʻlmading”, — deb aytgan.

⁹Soʻng esa haqiqiy itoatkorlikni tilga olib, shunday degan: “Sening xohishingni ado etish uchun keldim, ey Xudoyim.” Bundan koʻrinib turibdiki, Masih qurbonlik marosimlariga asoslangan avvalgi ahdni[73] bekor qildi. Uning maqsadi yurakning itoatkorligiga asoslangan yangi ahdni[74] oʻrnatish edi.

¹⁰Masih Xudoning xohishini bajarib, Oʻz tanasini biz uchun qurbon qildi. Bu yagona qurbonligi orqali bizni gunohdan pokladi.

¹¹Ruhoniylar har kuni Xudoga xizmat qiladilar. Bir xil qurbonliklarni qayta — qayta keltiradilar. Ammo bu qurbonliklar hech qachon gunohni yuva olmaydi.

¹²Masih esa gunohlarni abadiy yuvib tashlaydigan yagona qurbonlikni keltirib, Xudoning oʻng tomonida oʻtirdi[75].

¹³“Xudo dushmanlarimni oyoqlarim ostiga poyandoz qiladi”, — deb Masih oʻsha vaqtdan beri kutmoqda.

¹⁴Darvoqe, Masih bittagina qurbonlik orqali gunohdan poklagan odamlarini to abad barkamol qildi.

¹⁵Muqaddas Ruh ham bu haqda bizga shahodat berib, dedi:

¹⁶“Egamiz shunday demoqda: «Men kelajakda Isroil xalqi bilan tuzadigan ahd shunday boʻladi: Men qonunlarimni odamlarning yuragiga solib qoʻyaman, qonunlarimni onglariga yozaman.

¹⁷Men ularning gunohlariyu qabihliklarini hech qachon esga olmayman.»”[76]

¹⁸Demak, Xudo gunohlarni kechirgan boʻlsa, boshqa qurbonlik keltirishning hojati yoʻq.

¹⁹Ey birodarlarim, Iso Masihning qoni tufayli endi biz Eng muqaddas xonaga dadillik bilan kira olamiz.

²⁰Chunki Iso biz uchun yangi yoʻlni ochib berdi. U Chodirdagi parda orqali, ya’ni qurbon qilingan Oʻz tanasi orqali hayot sari yetaklaydigan yoʻlni ochdi.

²¹Ha, bizning ulugʻ Ruhoniyimiz bor, U Xudoning butun xonadoni ustidan mas’uldir.

²²Shunday ekan, samimiy qalb va mustahkam ishonch bilan Xudoga yaqinlashaylik. Axir, Masih Oʻz qoni bilan qalblarimizni tozalab, vijdonimizni qiynagan hamma gunohlardan pokladi[77]. Badanimiz ham toza suv bilan yuvildi[78].

²³Endi oʻzimiz e’tirof etgan umidimizni ikkilanmay mahkam tutaylik. Chunki va’da bergan Xudo Oʻz soʻziga sodiqdir.

²⁴Biz bir — birimizga e’tiborli boʻlaylik, bir — birimizni mehr — muhabbatga va xayrli ishlarga chorlaylik.

²⁵Ba’zi odamlarga oʻxshab, yigʻilishlarimizni qoldirmaylik. Aksincha, Rabbimiz Isoning keladigan kuni yaqinlashib qolganini bilib, bir — birimizni yanada koʻproq ruhlantiraylik.

²⁶Agar biz haqiqatni bilib olgandan keyin, ataylab gunoh qilishda davom etsak, bu gunohlarimizni hech qanday qurbonlik yuva olmaydi.

²⁷Shunda qoʻrquv ichra Xudoning hukmini kutishdan boshqa ilojimiz qolmaydi. Oqibatda, Xudoning dushmanlari bilan birga lovullagan olovda yonish bizning qismatimiz boʻladi.

²⁸Musoning qonuniga boʻysunishni rad etgan odam ikki yoki uch guvohning shahodati asosida shafqatsizlarcha oʻldirilardi.

²⁹Shunday ekan, Xudoning Oʻgʻlini oyoq osti qilgan odamni qanday jazo kutishini bir tasavvur qilib koʻringlar — a! Masihning ahd qoni bilan poklanib, soʻng uni bulgʻagan odamning holi nima kechadi?! Xudoning inoyat Ruhini haqorat qilganning holi nima kechadi?!

³⁰Axir, biz quyidagi soʻzlarni aytgan Xudoni yaxshi bilamiz: “Men qasos olaman, jazosini beraman[79]. Men Oʻz xalqimni hukm etaman[80].”

³¹Ha, barhayot Xudoning qoʻliga tushib qolish naqadar dahshatlidir!

³²Oʻtmishingizni eslanglar. Oʻshanda sizlar Xudoning nurini koʻrib, koʻp azob — uqubatlarga bardosh bergan edingizlar.

³³Ba’zida sizlarni hammaning oldida haqoratlab, xor qilishardi. Boshqa paytlarda bunday ahvolda qolgan birodarlaringizga yon bosardingiz.

³⁴Qamoqda boʻlganlarga hamdard boʻlardingiz, mulkingiz musodara qilinganda, buni xursandchilik bilan qabul qilardingiz, chunki sizlarda boqiy boylik borligini bilardingiz.

³⁵Shunday ekan, oldingiday imonda qat’iyatli boʻlinglar! Shunda buyuk mukofot olasizlar.

³⁶Sabr — toqatli boʻlib, Xudoning irodasini bajaringlar. Shunda Xudoning va’dasiga erishasizlar.

³⁷Axir, Muqaddas bitiklarda aytilganday[81], kelishi kerak boʻlgan Zot hademay keladi. U kech qolmaydi.

³⁸Xudoning solihlari Unga boʻlgan sadoqati tufayli tirik qolishadi. Bordi — yu, birortasi imondan qaytsa, Xudo undan rozi boʻlmaydi.

³⁹Biz esa imondan qaytib, halok boʻladigan odamlardan emasmiz. Biz imonimizga sodiq qolgan, najot topgan odamlarmiz.