Read Uzbek Muqaddas Kitob Ibroniylar 13 Bible Online

Ibroniylar 13 - Uzbek Muqaddas Kitob bible

Ibroniylar 13

¹Bir — biringizni birodarlarday yaxshi koʻrishni davom ettiringlar.

²Mehmondoʻstlikni unutmanglar. Zero, mehmondoʻst boʻlgan ba’zi odamlar[122] oʻzlari bilmagan holda farishtalarni mehmon qilishgan.

³Qamoqdagi birodarlaringizni unutmanglar, goʻyo oʻzingiz ham ular bilan birga qamoqda oʻtirgandek, ularni yodingizda tutinglar. Xoʻrlanganlarni unutmanglar, oʻzingizni ularning oʻrniga qoʻyib koʻringlar.

⁴Nikohni hammangiz e’zozlanglar. Er — xotinlik munosabatini begʻubor saqlanglar. Fahshu zinoga berilganlarni Xudo hukm qiladi.

⁵Pulga koʻngil bogʻlamanglar, bori bilan qanoatlaninglar. Zero, Xudo: “Sizlarni tashlab ketmayman, sizlarni tark etmayman”, — deb aytgan[123].

⁶Shuning uchun biz ishonch bilan ayta olamiz: “Egam Madadkorimdir, shu bois qoʻrqmayman. Insonlar menga nima qila oladi?!”[124]

⁷Xudoning kalomini sizlarga oʻrgatgan ustozlaringizni xotirlanglar. Ularning bosib oʻtgan hayot yoʻli haqida fikr yuritinglar. Imonlariga taqlid qilinglar.

⁸Iso Masih kecha, bugun va to abad Oʻshadir, U oʻzgarmaydi.

⁹Shunday ekan, turli xil gʻalati ta’limotlarga berilib, toʻgʻri yoʻldan ogʻib ketmanglar. Qurbonlik marosimlariga doir yegulik — ichgulik qoidalariga rioya qilavermay, yaxshisi, Xudoning inoyati bilan yuragingizni baquvvat qilinglar. Axir, insonlar yaratgan bu qoidalar ularga rioya qiluvchilarga hech qanday foyda keltirmaydi.

¹⁰Esingizda boʻlsin, biz koʻzga koʻrinmaydigan, haqiqiy qurbongoh oldida sajda qilmoqdamiz. Yerdagi qurbongoh[125] oldida sajda qilayotganlar haqiqiy qurbongohda sajda qila olmaydilar.

¹¹Ilgarilari oliy ruhoniy xalqni gunohlaridan poklash uchun hayvonlarni qurbonlik qilardi. U qurbonliklar qonini Muqaddas xonaga olib kirgandan soʻng, goʻshtini yemasdan, soʻyilgan hayvonlarni qarorgohdan tashqarida kuydirardi[126].

¹²Shu singari, Iso ham shahar[127] darvozasidan tashqarida azob chekib oʻldi. U Oʻz qonini toʻkib, xalqini gunohlardan pokladi.

¹³Kelinglar, endi biz ham qarorgoh tashqarisiga — Isoning oldiga chiqaylik. U bilan birga xoʻrliklarga chidaylik.

¹⁴Zero, bizning bu dunyoda doimiy maskanimiz yoʻq, biz boʻlgʻusi shaharga koʻz tikkanmiz.

¹⁵Shunday ekan, Iso orqali Xudoga hamdu sano nazrlarini taqdim qilaveraylik. Isoni Rabbimiz deb e’tirof etishimiz Xudoga qurbonlikday boʻlsin.

¹⁶Yaxshilik qilishni va bir — birimizga yordam berishni unutmaylik, chunki bunday nazrlar Xudoga manzurdir.

¹⁷Jamoatdagi yoʻlboshchilaringizga quloq solinglar, aytganlarini qilinglar. Axir, ular imon yoʻlida sizlarga posbonlik qiladilar, Xudoning oldida sizlar uchun hisobot beradilar. Ularga itoat qilsangiz, ular oʻz ishini xursandchilik bilan bajaradilar, boʻlmasa, oʻlgan kunidan qiladilar. Bundan sizga nima foyda?!

¹⁸Men uchun ibodat qilinglar. Vijdonim toza ekanligiga aminman. Hurmatga loyiq hayot kechirishga harakat qilyapman.

¹⁹Oʻtinib soʻrayman, men uchun ibodat qilinglar, toki sizlarning oldingizga tezroq qaytib boray.

²⁰Tinchlik beradigan Xudo Rabbimiz Isoni oʻlikdan tiriltirdi. Iso Oʻz qoni bilan abadiy ahdni muhrlagani uchun[128], Xudo Uni Oʻz xalqining ulugʻ Choʻponi[129] qilib tayinladi.

²¹Shu qadar buyuk ishlarni qilgan Xudoning xohish — irodasini bajara olishingiz uchun, U sizlarga har qanday ezgu fazilat va in’om bersin. U Oʻzining manzur murod — maqsadini Iso Masih orqali sizlarda bajo keltirsin. Iso Masihga abadulabad shon — sharaflar boʻlsin! Omin.

²²Ey birodarlarim, sizlarga qisqagina maktub yozdim. Oʻtinaman, maktubimdagi nasihatlarni sabr — toqat bilan qabul qilinglar.

²³Aytmoqchi, birodarimiz Timoʻtiy[130] qamoqdan chiqdi. Agar bu yerga u vaqtida yetib kelsa, sizlarni koʻrgani borganimda, uni ham olib boraman.

²⁴Jamoatdagi hamma yoʻlboshchilaringizga va barcha Xudoning azizlariga salom aytinglar. Italiyalik birodarlarimiz sizlarga salom yoʻllayaptilar.

²⁵Xudoning inoyati hammangizga yor boʻlsin[131].