Read Uzbek Muqaddas Kitob Ibroniylar 2 Bible Online

Ibroniylar 2 - Uzbek Muqaddas Kitob bible

Ibroniylar 2

¹Shu sababdan biz butun e’tiborimizni eshitganlarimizga qaratishimiz kerak. Shunda haqiqatdan ogʻib ketmaymiz.

²Farishtalar orqali ota — bobolarimizga[13] berilgan Xudoning qonuni[14] majburiy edi. Agar oʻsha qonunni buzgan va unga itoat etmagan odamlar har bir qilmishiga yarasha jazolangan boʻlsa,

³nahotki biz buyuk najot xabariga e’tiborsiz qolsak, jazodan qochib qutula olamiz?! Axir, dastlab bu najot xabarini bizga Rabbimiz Isoning Oʻzi e’lon qildi — ku. Rabbimizga quloq solgan shohidlar bu xabarning haqiqiyligini bizga tasdiqlashdi.

⁴Xudo ham bu xabarni tasdiqladi: U alomatu moʻjizalar va turli ajoyibotlar koʻrsatdi, Oʻz xohish — irodasi boʻyicha, Muqaddas Ruhning in’omlarini ulashib berdi.

⁵Biz aytayotgan kelajak dunyoni Xudo farishtalarga tobe qilmadi.

⁶Aksincha, Muqaddas bitiklarda Xudoga shunday deb aytilgan: “Inson zoti nedirki, u haqda oʻylagaysan?! Inson oʻgʻli[15] nedirki, Sen uni ardoqlagaysan?!

⁷Sen uni qisqa vaqtgagina farishtalardan past qilding, Keyin esa izzatu sharaf tojini unga kiygizding[16].

⁸Bor narsani uning oyogʻi ostiga qoʻyding.”[17] “Bor narsani uning oyogʻi ostiga qoʻyding” degani — Xudo butun borliqni oʻsha Insonning hokimiyatiga tobe qilganini bildiradi. Hozirgi kunda esa butun borliq Unga tobe boʻlganini biz koʻrayotganimiz yoʻq.

⁹Ammo “qisqa vaqtgagina farishtalardan past boʻlgan” Insonni, ya’ni Isoni biz koʻrib turibmiz. U inson boʻlib keldi, Xudoning inoyati tufayli butun insoniyat uchun azob chekib, oʻldi. Shu sababdan endi “izzatu sharaf tojini kiydi.”

¹⁰Xudo hamma narsani yaratgan va hamma narsa Uning ulugʻvorligi uchun mavjuddir. U koʻp insonlarni Oʻz ulugʻvorligidan bahramand qilish uchun najotga erishtirmoqchi boʻldi. Iso odamlarni najotga boshlab borsin deb, Xudo Uni azob — uqubatlar orqali barkamol Sardor qilib tayyorladi.

¹¹Insonlarni gunohlardan poklovchi Iso va poklangan insonlarning hammasi bir oilaga mansubdir. Shu sababdan Iso ularni birodarlarim deb atashdan or qilmay, Xudoga shunday deydi:

¹²“Birodarlarimga Sen haqingda aytaman, Jamoa orasida Senga hamdu sano oʻqiyman.”[18]

¹³Iso yana shunday deydi: “Umidim Xudodadir”, soʻng yana aytadi: “Xudo bergan farzandlarim bilan birga Men shu yerdaman!”[19]

¹⁴Bu farzandlar foniy bandalar boʻlganlari uchun, Iso ham, ular singari, inson boʻldi. Zero, U Oʻz oʻlimi orqaligina oʻlim keltiruvchi iblisning qudratini yoʻq qila oldi va

¹⁵umr boʻyi oʻlim qoʻrquviga qul boʻlgan odamzodni ozod qilishga muvaffaq boʻldi.

¹⁶Iso farishtalarni emas, balki Ibrohimning naslini[20] qullikdan qutqargani aniq.

¹⁷Shu sababdan, U har jihatdan birodarlariga oʻxshagan boʻlishi shart edi. Shundagina U xalqni gunohlaridan poklay oladigan, Xudoning xizmatidagi rahmdil va sodiq Oliy ruhoniy boʻla olardi.

¹⁸Isoning Oʻzi sinovdan oʻtib, azob chekdi. Shuning uchun U sinovdan oʻtayotganlarga yordam bera oladi.