Read Uzbek Muqaddas Kitob Ibroniylar 3 Bible Online

Ibroniylar 3 - Uzbek Muqaddas Kitob bible

Ibroniylar 3

¹Ey birodarlarim, sizlar Xudoning aziz xalqisizlar. Xudo sizlarni Oʻz huzuriga kirishga da’vat etgan. Kelinglar, Xudoning Elchisi va biz e’tirof etgan e’tiqodimizning Oliy ruhoniysi Iso haqida mulohaza qilaylik.

²Xudo Isoni Oliy ruhoniy qilib tayinladi. Muso Xudoning xonadonida sodiq xizmatkor boʻlgani kabi, Iso ham Xudoga sodiq boʻldi.

³Biroq Iso Musodan koʻra, koʻproq ulugʻvorlikka loyiq boʻldi. Axir, uyning oʻzi emas, uni qurgan odam koʻproq e’tiborga sazovor — ku!

⁴Albatta, har bir uyning quruvchisi bor, ammo aslida butun borliqning binokori — Xudo.

⁵Muso sodiq qul edi[21]. U Xudoning butun xalqi orasida eng ishonchlisi boʻlib, uning xizmati kelajakda oshkor boʻladigan ilohiy haqiqatning sharpasi edi, xolos.

⁶Masih esa sodiq Oʻgʻil edi. Unga Xudoning xonadonini boshqarish topshirildi. Xudoning xonadoni esa bizmiz. Biz faqat jasur boʻlib, umidimizni mahkam tutishimiz kerak[22]. Axir, biz bu umidimiz bilan faxrlanamiz.

⁷Shunday ekan, Muqaddas Ruhning aytgan ushbu gaplarini yodingizda tuting: “Qaniydi, bugun Mening ovozimga quloq solsangiz!

⁸Menga qarshi isyon qilgan otalaringizday tosh yurak boʻlmanglar, Meni sahroda sinagan oʻsha ajdodlaringizday[23] boʻlmanglar.

⁹Otalaringiz qirq yil qilgan ishlarimni koʻrsa ham, U yerda Meni sinab koʻrdilar.

¹⁰Shu bois Men bu nasldan gʻazablanib, dedim: «Ular doim Mendan yuz oʻgirishadi, Amrlarimga boʻysunishdan bosh tortishadi.»

¹¹Shuning uchun gʻazablanib, ont ichdim: «Ular farogʻat diyorimga kirmaydi», dedim.”[24]

¹²Ey birodarlarim, ehtiyot boʻlinglar! Yomon niyatga qalbingizdan oʻrin bermanglar, Xudoga boʻlgan ishonchingizni yoʻqotmanglar. Aks holda, bu illatlar sizlarni barhayot Xudodan qaytaradi.

¹³Har kunni Muqaddas bitiklardagi “bugun” deb bilib, bir — biringizga nasihat qilinglar. Tagʻin birortangiz gunohga aldanib, yuragingizni tosh qilmanglar.

¹⁴Axir, biz Masihga sherik boʻldik. Faqat boshida ega boʻlgan imonimizni oxirigacha mahkam tutishimiz lozim.

¹⁵Bir — biringizga Zaburdagi shu soʻzlarni eslatib turinglar: “Qaniydi, bugun Mening ovozimga quloq solsangiz! Menga qarshi isyon qilgan otalaringizday tosh yurak boʻlmanglar!”

¹⁶Oʻshanda Xudoning ovozini eshitib turib, isyon qilgan kim edi? Muso Misrdan olib chiqqanlarning hammasi![25]

¹⁷Qirq yil davomida Xudo kimdan gʻazablangandi? Gunoh qilgan odamlardan! Ular hammasi oʻldi, sahro ularga qabr boʻldi.

¹⁸Xudo ont ichib: “Ular farogʻat diyorimga kirmaydi”, deya kim haqida aytgan edi? Albatta itoatsiz odamlar haqida!

¹⁹Demak, ular Xudoga ishonmaganlari uchun farogʻat diyoriga kira olmadilar.