Read Uzbek Muqaddas Kitob Ibroniylar 5 Bible Online

Ibroniylar 5 - Uzbek Muqaddas Kitob bible

Ibroniylar 5

¹Har bir oliy ruhoniy insonlar orasidan tanlab olinadi. U Xudoga gunohlar uchun nazrlar va qurbonliklar keltirib, xalq vakili boʻlib xizmat qiladi.

²Gʻaflatda gunoh qilib qoʻygan odamlarni oliy ruhoniy tushunadi, chunki u oʻzi ham inson, kamchiliklari bor.

³Shu sababdan u nafaqat xalqning gunohlari uchun, balki oʻzining gunohlari uchun ham qurbonliklar keltirishi zarur.

⁴Hech kim oʻz xohishi bilan oliy ruhoniy boʻla olmaydi, balki Horunga[32] oʻxshab Xudo tomonidan tayinlanadi.

⁵Shu tariqa, Masih ham oliy ruhoniylik sharafiga intilmadi, bunday martabaga U da’vogarlik qilmadi. Aksincha, Unga: “Sen Mening Oʻgʻlimsan, Bugun Men Senga Ota boʻldim”[33], — deb aytgan Xudo Uni Oliy ruhoniy qilib tayinladi.

⁶Zero, boshqa bir joyda Xudo Unga shunday degan: “Sen Maliksidiq[34] singari, To abad ruhoniysan.”[35]

⁷Masih bu dunyoda yashagan paytda koʻz yosh toʻkib, Xudoga faryod qildi, Unga iltijo qilib yolvordi[36]. Chunki Xudo Uni oʻlimdan qutqarishga qodir ekanligini Masih bilar edi. U Xudoni yuksak darajada e’zozlagani uchun Uning iltijosi ijobat boʻldi.

⁸Garchi U Xudoning Oʻgʻli boʻlsa ham, azob — uqubat chekib, itoatkorlikning asl ma’nosini angladi.

⁹Xudo azoblar orqali Masihni barkamol qildi. Shunday qilib, Unga itoat qilganlarning hammasi uchun Masih abadiy najot manbayi boʻldi.

¹⁰Xudo Masihni “Maliksidiq singari Oliy ruhoniy” deb e’lon qildi.

¹¹Oliy ruhoniyimiz haqida sizlarga yana koʻp gapirgan boʻlardim — u, ammo qanday qilib sizlarga tushuntirishni bilmayman, chunki sizning aqlingiz oʻtmas boʻlib qolgan.

¹²Sizlar oʻzlaringiz allaqachon ustozlik qilishingiz kerak edi! Ammo siz boshqalarga emas, boshqalar sizlarga Xudo kalomining ilk asoslarini oʻrgatishlari kerak. Sizlar hali ham sutga muhtojsiz! Quyuq ovqatni hazm qila olmaysiz.

¹³Sut bilan oziqlanadigan har bir kishi hali chaqaloq. U toʻgʻri bilan notoʻgʻrining farqiga bormaydi.

¹⁴Quyuq ovqat esa ulgʻayganlar uchundir. Ular tajriba orttirib, yaxshini yomondan farqlay oladilar.