Read Uzbek Muqaddas Kitob Ibroniylar 6 Bible Online

Ibroniylar 6 - Uzbek Muqaddas Kitob bible

Ibroniylar 6

¹Shunday ekan, Masihning boshlangʻich ta’limotida toʻxtab qolmaylik. Aksincha, imonda yetuk boʻlishga intilaylik. Hadeb ta’limotning ilk asoslarini oʻrganavermaylik. Oʻlimga yetaklovchi ishlardan tavba qilish va Xudoga ishonish haqida,

²poklanish marosimlari[37] va qoʻl qoʻyib duo qilish haqida, oʻliklarning tirilishi va abadiy hukm haqida qayta — qayta ta’lim olishimiz shart emas.

³Endi Xudoning madadi bilan yetuklik sari qadam tashlaylik.

⁴Nahotki Xudodan yuz oʻgirgan odamni yana tavbaga olib kelib boʻlsa?! Bunday odam Xudoning nurini koʻrib, samoviy in’omdan lazzat olgan, Muqaddas Ruhdan bahramand boʻlib,

⁵Xudo kalomining ezguligini totib koʻrgan va kelajak dunyoning qudratini oʻz tajribasida koʻrgan.

⁶Agar shularga qaramay, u Xudodan qaytsa, ikki dunyoda ham tavba qilmaydi! Chunki bu qilmishi bilan Xudoning Oʻgʻlini goʻyo boshqatdan xochga mixlab, hammaning oldida Uni sharmanda qilayotganday boʻladi.

⁷Xudoning yoʻlidan yurgan odamni moʻl — koʻl yomgʻirga toʻygan yerga oʻxshatsa boʻladi. Bunday yer dehqonlar uchun yaxshi hosil yetishtirib, Xudodan baraka topadi.

⁸Xudodan qaytgan odam esa yantogʻu tikan bosgan yerga oʻxshaydi. Bunday yer foydasiz boʻlib, la’natga duchor boʻlish xavfi ostida qoladi. Oxir — oqibatda esa olovga yem boʻladi.

⁹Sevimli birodarlarim, qattiq gapirganimga qaramay, sizlardan koʻnglim toʻq. Sizlar najotga eltuvchi toʻgʻri yoʻldan ketayotganingizga ishonchim komil.

¹⁰Axir, Xudo adolatlidir. U sizning ishingizni unutmaydi, Unga boʻlgan muhabbatingiz tufayli azizlariga qilgan va qilayotgan xizmatlaringizni yodida tutadi.

¹¹Xizmatdagi bu shijoatingizni har biringiz oxirigacha asrashingizni chin dildan xohlaymiz. Chunki shundagina Masihga boʻlgan umidingiz soʻnmaydi.

¹²Erinchoq boʻlmanglar. Aksincha, imoni va sabr — toqati tufayli Xudoning va’dalaridan bahramand boʻlgan birodarlardan oʻrnak olinglar.

¹³Xudoning Ibrohimga bergan va’dasini eslanglar. Oʻshanda Xudo Oʻz nomi haqi qasam ichgandi. Zero, qasam ichish uchun Oʻzidan buyukroq biron zot yoʻq edi.

¹⁴Oʻshanda Xudo qasam ichib, shunday degandi: “Senga albatta qut — baraka beraman, Naslingni son — sanoqsiz qilaman.”[38]

¹⁵Ibrohim sabr — toqat qilib, berilgan va’daga erishdi.

¹⁶Odamlar qasam ichganlarida oʻzlaridan buyukroq boʻlgan kimsaning ismi haqi qasam ichadilar. Qasam aytilgan gapning tasdigʻi hisoblanadi va har qanday bahsga xotima beradi.

¹⁷Shunga oʻxshab, Xudo ham Oʻz va’dasini qasam bilan tasdiqladi. Chunki xalqiga baraka berishni va’da qilgan Xudo shu orqali Oʻz irodasining qat’iy ekanligini aniq koʻrsatmoqchi edi.

¹⁸Xudo yolgʻon gapirmaydi! Uning bergan va’dasi va ichgan qasami hech qachon oʻzgarmaydi. Xudoning tasdiqlagan va’dasidan endi biz kuchli dalda olib, U bergan umidni mahkam tutaylik. Axir, biz Xudodan panoh topganmiz.

¹⁹Bu umid jonimiz uchun tebranmas, mustahkam langardaydir. Umidimiz bizni samoviy Chodirdagi[39] pardaning orqa tarafiga, Xudoning huzuriga olib kiradi.

²⁰Iso bizdan oldin u yerga kirib, biz uchun yoʻl ochib berdi. U Maliksidiq[40] singari to abad Oliy ruhoniyimiz boʻldi.