Read Uzbek Muqaddas Kitob Ibroniylar 7 Bible Online

Ibroniylar 7 - Uzbek Muqaddas Kitob bible

Ibroniylar 7

¹Maliksidiq[41] — Salim[42] shohi va Xudoyi Taoloning ruhoniysi edi. Ibrohim toʻrtta shohni magʻlub etib, qaytib kelayotganda, Maliksidiq uni kutib olgani chiqib, duo qilgan edi.

²Ibrohim esa qoʻlga kiritgan hamma oʻljasining oʻndan birini Maliksidiqqa bergandi. Maliksidiq ismining ma’nosi “adolat shohi” demakdir. U yana “tinchlik shohidir”, chunki Salim “tinchlik” ma’nosini beradi.

³Uning na otasi, na onasi, na nasabnomasi bor. Hayotining boshi ham, oxiri ham yoʻq. U Xudoning Oʻgʻli singari, to abad ruhoniy boʻlib qoladi.

⁴Maliksidiq qanchalik buyuk zot ekanligini bilib qoʻying! Hatto ulugʻ bobokalonimiz Ibrohim ham oʻljasining oʻndan birini unga bergandi.

⁵Levi naslidan boʻlgan ruhoniylar[43] esa Xudoning qonuni boʻyicha Isroil xalqidan, ya’ni oʻz birodarlaridan ushr[44] yigʻishlari kerak edi. Vaholanki, Isroil xalqining hammasi Ibrohimning avlodlaridir.

⁶Maliksidiq Levi naslidan boʻlmasa — da, Ibrohimdan ushr oldi. Soʻng Ibrohimni — Xudoning va’dalarini olgan zotni duo qildi.

⁷Hammamizga ma’lumki, duo qilgan odam duo olgan odamdan ulugʻroqdir.

⁸Ushr yigʻadigan ruhoniylar foniy bandalar edi. Ibrohimdan ushr olgan Maliksidiq esa, Muqaddas bitiklarda yozilishicha, hanuz barhayotdir.

⁹Hatto aytishimiz mumkinki, ushr oluvchi levi ruhoniylari ham Ibrohim orqali Maliksidiqqa ushr bergandilar.

¹⁰Chunki Maliksidiq Ibrohimni kutib olganda, levi ruhoniylari hali bobokaloni Ibrohimning pushti kamarida edilar.

¹¹Levi ruhoniylari bizni barkamol qila olmaydilar. Shuning uchun Xudo Horunning nasabidan[45] boʻlgan ruhoniyni emas, balki Maliksidiqqa oʻxshagan boshqa bir ruhoniyni[46] yubordi. Isroil xalqiga berilgan qonunlar levi ruhoniylari orqali joriy qilingan edi.

¹²Shunday ekan, Xudo yangi ruhoniylikni tashkil qilganda, yangi qonunlarni ham joriy qildi.

¹³Buni biz aytib oʻtgan ruhoniy, ya’ni Rabbimiz Iso misolida aniq koʻrishimiz mumkin. Biz bilamizki, Rabbimiz Iso Levi qabilasidan emas, balki Yahudo qabilasidan kelib chiqqan. Yahudo qabilasidan hech kim ruhoniy boʻlib qurbongohda xizmat qilmagan. Buning ustiga, Muso bu qabila haqida gapirganda ruhoniylikka doir biron koʻrsatma bermagan.

¹⁵Yangi qonunlar joriy qilinganini yana shundan aniq koʻrishimiz mumkin: Rabbimiz xuddi Maliksidiq kabidir.

¹⁶Uning ruhoniyligi bu foniy dunyoning talabiga, ya’ni nasl — nasabga doir qoidalarga[47] asoslanmagan, balki Maliksidiqning ruhoniyligi singari, cheksiz hayot qudratiga asoslangan.

¹⁷Zotan, Muqaddas Bitikda U haqda shunday yozilgan: “Sen Maliksidiq singari, To abad ruhoniysan.”[48]

¹⁸Demak, avvalgi qonun — qoidalar ojiz va samarasiz boʻlgani uchun bekor qilindi.

¹⁹Chunki qonun biron — bir kishini kamolotga yetkaza olmagan. Endi qonun oʻrniga bizga a’loroq bir umid berildi, biz bu umid orqali Xudoga yaqinlasha olamiz.

²⁰Bundan tashqari, Xudo Isoni Oliy ruhoniy qilib tayinlaganda ont ichgandi. Muqaddas bitiklarda bu haqda shunday deyilgan: “Egamiz ont ichgan, qarorini oʻzgartirmas: «Sen to abad ruhoniysan.»” Ammo levi ruhoniylari tayinlanganda, Xudo biron marta ont ichmagan.

²²Demak, Xudo Iso orqali bizni a’loroq bir ahdga erishtirdi, Isoning Oʻzi bunga kafildir[49].

²³Yana bir farq shundaki, levi ruhoniylarining soni koʻp edi, chunki oʻlim ruhoniylarga oʻz xizmatlarini davom ettirishga monelik qilar edi.

²⁴Ammo Iso mangu boʻlgani uchun to abad ruhoniy boʻlib xizmat qiladi.

²⁵Shuning uchun U Oʻzi orqali Xudoga yaqinlashuvchilarga abadiy najot bera oladi. Axir, Iso barhayot boʻlib, ular uchun Xudoga iltijo qiladi.

²⁶Bizga aynan shunday — muqaddas, begʻubor va pok Oliy ruhoniy kerak edi. Iso gunohkorlardan ayrilgan, osmondan ham yuksakka koʻtarilgan.

²⁷U boshqa oliy ruhoniylar kabi, har kuni oldin oʻz gunohlari uchun, keyin xalqning gunohlari uchun qurbonlik keltirishi kerak emas. Chunki U bir marta Oʻzini qurbon qilib, xalqning gunohlari uchun keltiriladigan hamma qurbonliklarga chek qoʻydi.

²⁸Tavrotga binoan oliy ruhoniylikka ojiz bandalar tayinlanardi. Ammo endi Xudoning ont ichib bergan va’dasiga[50] binoan oliy ruhoniylikka Xudoning Oʻgʻli tayin etildi. U barkamollikka erishgan va to abad barkamol boʻlib qoladi.