Read Uzbek Muqaddas Kitob Yoqub 3 Bible Online

Yoqub 3 - Uzbek Muqaddas Kitob bible

Yoqub 3

¹Ey birodarlarim, hammangiz ham ustoz boʻlavermanglar! Biz, ustozlar, jiddiyroq hukmga duchor boʻlishimiz oʻzingizga ma’lum.

²Odamlarning hammasi koʻp xato qiladi. Soʻzlayotganda xato qilmagan inson yetukdir. U butun vujudini jilovlay oladi.

³Biz otlarni itoat ettirish uchun ogʻizlariga suvluq solamiz. Shu orqali ularning butun tanasini boshqaramiz.

⁴Mana, kemalar ham, qancha ulkan boʻlmasin va kuchli shamollar yordamida yurmasin, kichkina bir rul bilan boshqariladi. Kemachi rul yordamida kemani istagan joyga yoʻnaltiradi.

⁵Til ham xuddi shundaydir, til badanning kichkina bir uzvidir, ammo katta muammolarni keltirib chiqaradi. Qara, kichkina bir olov bepoyon oʻrmonni yondirib yuboradi!

⁶Til ham olovga oʻxshaydi. Til — uzvlarimiz orasida bir buzgʻunchi dunyo! U butun vujudimizni bulgʻaydi. U doʻzaxdan alangalanib, butun hayotimizni yondiradi.

⁷Turli xil yovvoyi hayvonlar bilan qushlar, sudraluvchi va dengiz hayvonlari inson zoti tomonidan boshqarilgan va boshqarilmoqda.

⁸Ammo tilni hech bir inson boshqara olmaydi. Tinib — tinchimas bu yovuz til zahri qotildir.

⁹Biz tilimiz bilan samoviy Otamiz boʻlgan Egamizni olqishlaymiz va tilimiz bilan Xudoning suratida yaratilgan insonlarni la’natlaymiz.

¹⁰Olqish va la’nat bir ogʻizdan chiqadi. Ey birodarlarim, bunday boʻlmasligi kerak!

¹¹Axir, bitta buloqdan ham shirin, ham achchiq suv oqib chiqmaydi — ku!

¹²Ey birodarlarim, anjir daraxti zaytun mevasini beradimi?! Yoki tok novdasi anjir tugadimi?! Yoʻq! Shoʻr buloqdan ham shirin suv oqib chiqmaydi!

¹³Dono va farosatlimisiz? Buni ibratli hayotingiz orqali namoyon qiling. Har bir ishni kamtarlik va donolik bilan bajaring.

¹⁴Bordi — yu, yuragingizda achchiq hasad va xudbinlik boʻlsa, donoman, deb maqtanmang. Oʻzingizni shunday tutayotgan boʻlsangiz, haqiqatni rad etgan boʻlasiz.

¹⁵Dunyoga va moddiyatga xos boʻlgan bunday “donolik” Xudodan emas, shaytondandir.

¹⁶Chunki hasadgoʻylik va xudbinlik bor joyda janjal va yovuzlik hukm suradi.

¹⁷Xudodan kelgan donolik esa, avvalo pokdir. Shuningdek, bu asl donolik tinchliksevar, muloyim, haqiqatga boʻysunadigan, mehr — shafqatli, xayrli ishlarga boy, tarafkashlik qilmaydigan, oʻta samimiydir.

¹⁸Tinchlik oʻrnatuvchilar tinchlikni ekib, solihlikni oʻrib oladilar.