Read Uzbek Muqaddas Kitob Yoqub 4 Bible Online

Yoqub 4 - Uzbek Muqaddas Kitob bible

Yoqub 4

¹Orangizdagi urush va janjallar qayerdan kelib chiqadi? Ichingizda jang qilayotgan nafsu ehtiroslaringizdan emasmi?!

²Sizlar oʻzingizda yoʻq narsani xohlaysizlar, oʻshanga erishish uchun odam oʻldirishdan ham toymaysizlar. Hasad qilyapsizlar, ammo maqsadingizga erisha olmagach, janjallashib urushyapsizlar. Sizlarda xohlagan narsangiz yoʻq, chunki uni Xudodan soʻramaysizlar.

³Soʻragan taqdirda ham, olmayapsizlar, chunki yomon niyat bilan, nafsingizni qondirish uchun soʻrayapsizlar.

⁴Ey sadoqatsiz bandalar! Dunyo bilan doʻstlik Xudoga dushmanlik ekanligini nahotki bilmasangizlar?! Kim dunyo bilan doʻst boʻlishni istasa, Xudoga dushman boʻladi.

⁵Muqaddas bitiklarda: “Xudo ichimizga solgan ruhni gʻoyatda qizgʻanadi, U bizdan sadoqatni talab qiladi”, deb ta’lim beriladi — ku! Nima, sizlar bularni bekor deb oʻylaysizlarmi?!

⁶Toʻgʻri, Xudo bizdan sadoqatni talab qiladi, ammo shu bilan birga U bizga nisbatan nihoyatda inoyatlidir. Zero, Muqaddas bitiklarda yozilgan: “Xudo magʻrurlarga qarshi chiqadi, Kamtarlarga esa inoyat koʻrsatadi.”[14]

⁷Shunday ekan, Xudoga boʻysuninglar! Iblisga qarshilik koʻrsatinglar, shunda u sizlardan qochadi.

⁸Xudoga yaqinlashinglar, shunda U sizlarga yaqinlashadi. Ey gunohkorlar, qoʻllaringizni gunohdan tozalanglar! Bir vaqtning oʻzida ham Xudoga, ham dunyoga koʻngil bogʻlaganlar, qalbingizni poklanglar!

⁹Qilgan gunohingiz uchun qaygʻuringlar, motam tutinglar, yigʻlanglar! Kulgingiz motamga, shodligingiz gʻam — gʻussaga aylansin.

¹⁰Egamiz oldida oʻzingizni past tutinglar, shunda U sizlarni yuksaltiradi.

¹¹Ey birodarlarim, bir — biringizni yomonlamanglar. Agar birodaringizni yomonlab, hukm qilsangiz, demak, mehr — oqibatni oʻrgatadigan Xudoning qonunini yomonlab, hukm qilgan boʻlasizlar. Xudoning qonunini hukm qilgan odam esa, qonun bajarishdan bosh tortib, oʻzini qonundan ustun qoʻygan qoziday boʻladi.

¹²Ammo faqatgina Xudo qonun chiqarib, hukm qila oladi. Faqat U qutqarish va nobud qilish qudratiga ega. Sen esa kim boʻlibsanki, birodaringni hukm qilasan?!

¹³Hoy, qilmoqchi boʻlgan ishlari bilan maqtanadiganlar, menga quloq solinglar! Sizlar: “Bugun yoki ertaga falon shaharga borib, u yerda bir yil yashaymiz. Savdo — sotiq qilib, pul ishlab kelamiz”, deysizlar.

¹⁴Ertaga nima boʻlishini sizlar qayerdan bilasizlar?! Umringiz bir lahza koʻzga koʻrinib, keyin gʻoyib boʻladigan tutunga oʻxshaydi — ku!

¹⁵Buning oʻrniga sizlar: “Egamiz xohlasa, sogʻ — salomat boʻlsak, uni yoki buni qilamiz”, deb aytishingiz kerak.

¹⁶Sizlar esa aksini qilib, magʻrurlanib, maqtanyapsizlar. Bu kabi maqtanish yomondir.

¹⁷Demak, qilishingiz kerak boʻlgan yaxshi ishni bila turib, qilmasangiz gunoh boʻladi.