Read Uzbek Muqaddas Kitob Yoqub 5 Bible Online

Yoqub 5 - Uzbek Muqaddas Kitob bible

Yoqub 5

¹Menga qaranglar, ey boylar, boshingizga tushadigan falokatlar uchun hoʻngrab yigʻlanglar!

²Boyligingiz chirib ketgan, kiyimingizni kuya yegan.

³Oltinu kumushlaringizni zang bosgan. Bu zang sizga qarshi guvoh boʻladi, u tufayli tanangiz Xudoning qahri olovida yonadi. Oxirzamon kelib qoldi, sizlar esa boylik toʻplash bilan ovorasizlar.

⁴Sizlar ekinlaringizni oʻrgan oʻroqchilarni aldab, ish haqini bermadingizlar. Ana, oʻsha pullar sizlardan norozi boʻlib, nola qilmoqda! Oʻroqchilarning dod — figʻoni Sarvari Olamning qulogʻiga yetib bordi.

⁵Sizlar qarshilik koʻrsata olmagan aybsiz odamlarni qoralab, qatl qildingizlar. Bu dunyoda maishatga berilib, huzur — halovatda yashadingizlar. Boʻrdoqilarday semirib ketdingiz! Mana endi hukm kunida soʻyilishga tayyor boʻlib qoldingiz!

⁷Ey birodarlarim, Rabbimiz Iso keladigan kunga qadar sabr — toqat qilinglar! Axir, dehqon ham dalasi moʻl hosil yetishtirishini kutadi. U kuzgi va bahorgi yomgʻirni poylab, qancha sabr — toqat qiladi!

⁸Sizlar ham sabr qilinglar. Dadil boʻlinglar, chunki Rabbimizning keladigan kuni yaqinlashib qoldi.

⁹Birodarlarim, mahkum boʻlmasligingiz uchun bir — biringizdan shikoyat qilmanglar. Mana, hukm qiluvchi Rabbimiz Iso ostonada turibdi!

¹⁰Ey birodarlarim, paygʻambarlardan oʻrnak olinglar! Ular Egamizning nomidan gapirib, azob — uqubatlarga dosh berganlar.

¹¹Darhaqiqat, sabr qilgan bunday odamlarni biz baxtli deb hisoblaymiz. Ayubning[15] sabr — toqati haqida eshitgansizlar, oxirida Egamiz unga qanchalar baraka berganini bilasizlar. Ha, Egamiz rahmdil va mehr — shafqatlidir.

¹²Ey birodarlarim, eng avvalo, qasamxoʻr boʻlmanglar! Lafzi yoʻq inson kabi, boʻlar — boʻlmasga osmon haqi, yer haqi va boshqa narsa haqi, deb qasam ichavermanglar. Javobingiz “ha” yoki “yoʻq” boʻlsin. Shunda Xudo sizlarni hukm qilmaydi.

¹³Orangizda azob — uqubat chekayotgan bironta odam bormi? Agar boʻlsa, ibodat qilsin. Xursand boʻlgani bormi? Xudoga hamdu sanolar kuylasin.

¹⁴Orangizda kasal boʻlgan bormi? Jamoat oqsoqollarini chaqirtirsin. Ular ibodat qilib, Rabbimiz Iso nomi bilan bemorning boshiga zaytun moyini surtsinlar[16].

¹⁵Imon bilan qilingan ibodat bemorni sogʻaytiradi, Rabbimizning Oʻzi unga shifo beradi. Agar bemor gunoh qilgan boʻlsa, Rabbimiz uni kechiradi.

¹⁶Shuning uchun qilgan gunohlaringizni bir — biringiz oldida tan olinglar, bir — biringiz uchun ibodat qilinglar, shifo topasizlar. Solih odamning iltijosi kuchli ta’sirga egadir!

¹⁷Ilyos[17] ham bizga oʻxshagan oddiy bir inson edi. Yomgʻir yogʻmasin, deb u astoydil iltijo qildi va yer yuziga uch yilu olti oy yomgʻir yogʻmadi.

¹⁸Soʻng u yomgʻir yogʻsin, deb ibodat qildi, osmondan yomgʻir yogʻib, yer hosil berdi.

¹⁹Ey birodarlarim, agar orangizdagi biror kishi haq yoʻldan ozgan boʻlsa, uni toʻgʻri yoʻlga soling.

²⁰Esingizda boʻlsin, gunohkorni nohaq yoʻldan qaytargan odam oʻsha gunohkorning najot topishiga va behisob gunohlarining yuvilishiga sababchi boʻladi.