Read Uzbek Muqaddas Kitob 1 Butrus 2 Bible Online

1 Butrus 2 - Uzbek Muqaddas Kitob bible

1 Butrus 2

¹Endi har qanday yomon niyat, hiyla — nayrang, ikkiyuzlamachilik, rashk — hasad va gʻiybatni oʻzingizdan soqit qilinglar.

²Yangi tugʻilgan chaqaloq sof ona sutini tusaganday, sizlar ham Xudo kalomiga tashna boʻlinglar. Kalom bilan oziqlanib, ulgʻayib, najotga erishinglar.

³Axir, sizlar Rabbimiz Isoning muruvvatidan bahramand boʻldingizlar.

⁴Insonlar rad etgan, lekin Xudo qimmatbaho deb tanlagan tirik toshga — Rabbimiz Isoga yaqinlashinglar.

⁵Shunda oʻzlaringiz ham tirik toshlarday boʻlasizlar. Xudo sizlardan ruhiy ma’bad barpo etadi. Sizlar muqaddas ruhoniylar boʻlib xizmat qilasizlar va Iso Masih orqali Xudoga maqbul ruhiy qurbonliklar keltirasizlar.

⁶Zero, Muqaddas bitiklarda Xudo shunday degan: “Mana, Men joylashtiryapman Quddusda[7] Tanlangan, qimmatbaho tamal toshini[8]. Unga tayangan hech bir inson uyatga qolmaydi.”[9]

⁷Sizlar — Masihga ishonganlar uchun bu tosh qimmatbahodir. Ammo ishonmaganlarga Muqaddas bitiklardagi shu soʻzlar[10] toʻgʻri keladi: “Binokorlar rad etgan tosh Binoning tamal toshi boʻldi. Ba’zilar bu toshga qoqinadi, Uning dastidan yiqiladi.”

⁸Imonsizlar Xushxabarni rad etib, itoatsizlik qilganlari uchun qoqinadilar. Ular ana shu qismatga mahkum boʻlganlar.

⁹Ammo sizlar — tanlangan bir nasl, ruhoniylar shohligi, muqaddas qavm[11], Xudoning aziz xalqisiz. Xudo sizlarni zulmatdan Oʻzining ajoyib nuriga da’vat etgan, Uning buyuk ishlarini e’lon qilishingiz uchun sizlarni tanlagan.

¹⁰Sizlar bir vaqtlar Xudoga begona edingizlar, endi esa Uning xalqisizlar. Bir vaqtlar Xudoning marhamatidan bebahra edingizlar, endi esa Undan marhamat topdingizlar[12].

¹¹Ey azizlarim, sizlardan oʻtinib soʻrayman, jonga qarshi kurashadigan nafs ehtiroslaridan saqlaninglar. Axir, sizlar bu dunyoda gʻaribu musofirsizlar.

¹²Imonsizlar orasida Xudoga munosib hayot kechiringlar. Ular sizlarni yomonlikda ayblasalar — da, ezgu ishlaringizni koʻrib, kim bilsin, balki tavba qilishar va qiyomat kuni Xudoni ulugʻlashar.

¹³Insonlar tomonidan oʻrnatilgan har qanday hokimiyatga, Egamiz haqi — hurmati, boʻysuninglar. Oliy hokim boʻlgan shohga[13] ham,

¹⁴u tayinlagan hokimlarga ham itoat qilinglar. Zero, hokimlar yomonlik qilganlarni jazolash uchun, yaxshilik qilganlarni esa taqdirlash uchun tayinlangan.

¹⁵Siz haqiqatni bilmagan nodon odamlarning ogʻizlarini qilgan yaxshiligingiz bilan yopinglar, chunki bu Xudoning xohishidir.

¹⁶Ozod odamlardek yashanglar, ammo ozodlik niqobi ostida yomonlik qilmanglar. Xudoning qullariday hayot kechiringlar.

¹⁷Hamma odamlarni hurmat qilinglar. Imonli birodarlaringizni yaxshi koʻringlar. Xudodan qoʻrqinglar, davlat rahbariga izzat — ehtirom koʻrsatinglar.

¹⁸Ey qullar, Xudodan qoʻrqqaningiz uchun[14] xoʻjayinlarga itoat qilinglar. Nafaqat mehribon va muloyimlarga, balki qattiqqoʻl xoʻjayinlarga ham boʻysuninglar.

¹⁹Agar sizlar Xudoni mamnun qilmoqchi boʻlib, toʻgʻri ish qilsangiz — u, nohaq azoblarga chidasangiz, Xudoni rozi qilgan boʻlasiz.

²⁰Bordi — yu, qilgan gunohingiz uchun tayoq yeb chidasangiz, bu sizga sharaf keltirarmidi?! Ammo yaxshilik qilib turib, nohaq azoblarga chidasangiz, Xudoning maqtoviga sazovor boʻlasiz.

²¹Hatto azob chekkaningizda ham Xudo sizlarni yaxshilik qilishga da’vat etgan. Masih sizlar uchun azob chekib, namuna boʻldi. Unga taqlid qilinglar.

²²Axir, U hech qanday gunoh qilmagan, ogʻzidan biron yolgʻon soʻz chiqmagan[15].

²³U haqorat qilinganda hech kimga haqorat bilan javob qaytarmadi, azob chekkanda hech kimga tahdid qilmadi. Faqat odilona hukm qiladigan Xudoga Oʻzini topshirdi.

²⁴U gunohlarimizni Oʻziga oldi, a’zoi badani yogʻochda[16] azob chekdi. Shu tufayli biz gunoh uchun oʻlganmiz va solih hayot kechira olamiz. Uning yaralaridan biz shifo topdik.

²⁵Ilgari sizlar adashib yurgan choʻponsiz qoʻylarga oʻxshar edingizlar, endi esa jonlaringizning posboni boʻlgan Choʻponga[17] qaytib keldingizlar.