Read Uzbek Muqaddas Kitob 1 Butrus 3 Bible Online

1 Butrus 3 - Uzbek Muqaddas Kitob bible

1 Butrus 3

¹Egamiz haqi — hurmati, siz, xotinlar, oʻz erlaringizga boʻysuninglar. Erlaringiz Xushxabarni rad etishsa ham, ularga itoat etinglar. Sizning ibratli xulq — atvoringiz har qanday soʻzdan koʻra, ta’sirliroq boʻladi. Erlaringiz pokiza hayotingizni va Xudodan qoʻrqib yashayotganingizni koʻrib, imonga kelishadi.

³Sizning jozibangiz oʻrilgan sochlar, oltin taqinchoqlar, chiroyli kiyimlar kabi tashqi zeb — ziynatdan iborat boʻlmasin.

⁴Ammo qalbingizdagi yuvosh va sokin ruh sizlarning soʻlmaydigan ichki goʻzalligingiz boʻlsin. Xudoning nazarida bunday goʻzallikning qadri yuksakdir.

⁵Oʻtmishda Xudoga umid bogʻlagan muqaddas xotinlar ham oʻzlari shu yoʻsinda bezanib, erlariga boʻysunar edilar.

⁶Masalan, Sora[18] ham Ibrohimga itoat etib, uni xoʻjayin deb atar edi. Agar sizlar yaxshilik qilib, har qanday qoʻrquvdan sarosimaga tushmasangiz, Soraning qizlari hisoblanasizlar.

⁷Ey erlar, sizlar ham, Egamiz haqi — hurmati, xotinlaringizga e’tiborli boʻlinglar, ular zaif jinsdan ekanligini hisobga olinglar. Ular ham abadiy hayot inoyatidan bahramand boʻlganlari uchun ularni hurmat qilinglar. Aks holda, ibodatlaringiz ijobat boʻlmaydi.

⁸Xullas, oʻzaro hamfikr, hamdard boʻlinglar, bir — biringizni birodarlarcha yaxshi koʻringlar, mehr — shafqatli va kamtar boʻlinglar.

⁹Yomonlikka yomonlik, haqoratga haqorat bilan javob qaytarmanglar, aksincha, hammani duo qilinglar. Zero, Xudo sizlarni shunga da’vat etgan. Bularga rioya qilsangiz, baraka topasizlar.

¹⁰Axir, Muqaddas bitiklarda shunday yozilgan: “Kimki hayotdan zavqlanishni, Baxtli umr koʻrishni istasa, U tilini yomon soʻzdan tiysin, Ogʻzini yolgʻon gapdan asrasin.

¹¹Yomonlikdan qaytib, yaxshilik qilsin. Tinchlik istab, tinchlik payida boʻlsin.

¹²Chunki Egamiz solihlarni kuzatib turadi, Ularning iltijosini Egamiz eshitadi. Badkirdorlardan esa yuz oʻgiradi[19].”[20]

¹³Agar yaxshilik qilishga bel bogʻlasangiz, kim ham sizlarga ozor bera olardi?!

¹⁴Hatto toʻgʻri ish uchun azob chekayotgan boʻlsangiz ham, baxtiyorsizlar! Doʻq — poʻpisa qiluvchilardan qoʻrqmanglar, hayajonga tushmanglar.

¹⁵Qoʻrquvga tobe boʻlmanglar, balki butun qalbingiz bilan Rabbimiz Iso Masihning[21] hokimiyatiga boʻysuninglar. Masihga boʻlgan umidingiz haqida sizdan soʻragan har bir kishiga javob berishga doimo tayyor turinglar. Lekin buni muloyimlik va hurmat bilan bajo qilinglar.

¹⁶Vijdoningiz toza boʻlsin, toki Masih yoʻlidagi ibratli hayotingizni yomonlaganlar oʻz gaplaridan uyalib qolsinlar.

¹⁷Agar yaxshilik qilib azob chekishingizni Xudo lozim koʻrsa, har holda yomonlik qilib azob chekishdan bu afzalroqdir.

¹⁸Masih bizni gunohlarimizdan to abad forigʻ qilish uchun azob chekkanini yodingizda tutinglar. U solih boʻla turib, biz, gunohkorlarni Xudoga yaqinlashtirish uchun jonini fido qildi. Uni jisman oʻldirishdi, ammo U yangi, ulugʻvor hayot uchun tirildi[22].

¹⁹Soʻng zindonga qamalgan yovuz ruhlar[23] oldiga borib, ular ustidan gʻalaba qilganini e’lon etdi.

²⁰Qadim zamonda bu ruhlar Xudoga itoatsizlik qilib, insoniyatni yoʻldan ozdirgandi. Ammo Xudo sabr qildi. Nuh[24] oʻz kemasini qurib boʻlguncha Xudo insoniyatni hukm qilmay, kutib turdi. Oʻsha kemaga faqat sakkiztagina odam kirib, toʻfon suvlaridan omon qolgandi.

²¹Nuh va uning oilasi bilan roʻy bergan bu hodisa biz uchun timsol hisoblanadi. Bu timsol bizning imonga kelishimizni va suvga choʻmdirilishimizni bildiradi. Choʻmdirilish marosimi badanni kirdan tozalash emas, balki Xudoga: “Senga sodiq qolaman”, deb chin yurakdan va’da berish demakdir. Darhaqiqat, sizlar suvga choʻmdirilganingizda, Iso Masihning tirilishi tufayli najot topdingizlar.

²²Masih osmonga koʻtarilib, Xudoning oʻng tomonida oʻtiribdi[25]. Koinotdagi har bir farishta, har qanday kuchlaru hukmronlar Masihga tobedir.