Read Uzbek Muqaddas Kitob 2 Butrus 1 Bible Online

2 Butrus 1 - Uzbek Muqaddas Kitob bible

2 Butrus 1

¹Iso Masihning quli va havoriysi men — Shimoʻn Butrusdan[1] biz kabi qadrli bir imonga ega boʻlgan birodarlarga salom! Xudoyimiz va najotkorimiz Iso Masih odil boʻlgani uchun hammamizga birday baraka bergan.

²Sizlar Xudoni va Rabbimiz Isoni tanib — bilar ekansiz, Xudoning cheksiz inoyati va tinchligi doim sizlarga yor boʻlsin.

³Rabbimiz Iso Oʻz ulugʻvorligi va ezguligi ila bizni da’vat etib, Oʻzini bizga tanitdi. Endi biz Xudoga munosib hayot kechira olamiz, chunki Rabbimiz ilohiy qudrati bilan bizga zarur boʻlgan barcha fazilatlarni ato etdi.

⁴Masihning sharofati bilan biz Xudo va’da qilgan barakalarni oldik. Endi sizlar buzgʻunchi ehtiroslar dastidan avj olgan bu dunyoning axloqsizligidan qochib, Xudoning ilohiy tabiatidan bahramand boʻla olasizlar.

⁵Bularni yodingizda tutib, Xudoga munosib hayot kechirish uchun jon kuydiringlar. Imoningizni fazlu kamolot, ilmu ma’rifat,

⁶vazminlik, sabr — toqat, diyonat,

⁷birodarlaringizga boʻlgan mehr — oqibat va tugal muhabbat bilan boyitinglar.

⁸Agar bu xislatlarga ega boʻlib, ularni kamol toptirayotgan boʻlsangiz, demak, Rabbimiz Iso Masihni haqiqatan tanib — bilgan boʻlasiz. Kunlaringiz behuda oʻtmagan boʻladi, Masihni bilganingiz hayotingizda oʻz samarasini beradi.

⁹Bu xislatlarga ega boʻlmaganlar esa kaltabin va koʻrdirlar, ular avvalgi gunohlaridan poklanganini unutganlar.

¹⁰Shunday ekan, ey birodarlarim, Masih sizlarni tanlaganini va da’vat etganini tasdiqlashga astoydil harakat qilinglar. Aytilgan xislatlarga ega boʻlsangiz, imondan qaytmaysizlar.

¹¹Shunda Rabbimiz va najotkorimiz Iso Masih sizlarga Oʻzining abadiy Shohligi eshiklarini keng ochib beradi.

¹²Sizlar aytganlarimning hammasini bilasizlar, oʻzlaringiz Masih haqida oʻrgangan haqiqatda sobit turibsizlar. Shunga qaramay, bularni sizlarga doimo eslatib turishni xohlayman.

¹³Tirik ekanman, bularni yodingizga solib turishni kanda qilmayman. Bu men uchun farz,

¹⁴chunki hademay bu olamdan koʻz yumishimni bilaman. Rabbimiz Iso Masihning Oʻzi buni menga ma’lum qilgan.

¹⁵Bu dunyodan oʻtib ketganimdan keyin ham, sizlar aytganlarimni esda saqlanglar, deb men bu mavzuni qoʻlimdan kelgancha batafsil yoritib berishga harakat qildim.

¹⁶Rabbimiz Iso Masihning kuch — qudrat bilan kelishi afsona emas. Biz sizlarga oʻrgatgan bu ta’limotni oʻzimiz toʻqib chiqarmadik. Axir, Masihning ulugʻvorligini oʻz koʻzimiz bilan koʻrgan edik.

¹⁷Otamiz Xudo muqaddas togʻda[2] Masihni shon — sharaf ila yuksaltirganda, biz oʻsha yerda edik. Mahobatli va ulugʻvor Xudoning samodan: “Bu Mening sevikli Oʻgʻlimdir[3], Undan mamnunman[4]”, — degan ovozini eshitgan edik.

¹⁹Bundan tashqari, biz paygʻambarlarning bashoratlariga toʻliq ishonamiz. Sizlar ham ularning soʻzlariga diqqat etsangizlar, yaxshi qilgan boʻlasizlar. Zero, bu soʻzlar Masih keladigan kungacha sizlar uchun goʻyo zulmatda nur sochib turgan chiroqday boʻladi. Soʻng Masihning Oʻzi keladi. Uning kelishi tong yulduzi kabi boʻlib, yangi zamonning boshlanishidan darak beradi, Masihning nuri qalblaringizni yoritadi.

²⁰Eng avvalo, shuni bilinglarki, Muqaddas bitiklardagi bashoratlarning hech biri paygʻambarlarning shaxsiy talqini emas.

²¹Hech bir haqiqiy paygʻambar oʻzining insoniy xohishi bilan bashorat qilgan emas. Bu paygʻambarlar Muqaddas Ruh tomonidan boshqarilib, Xudoning soʻzlarini gapirganlar.