Read Uzbek Muqaddas Kitob 1 Yuhanno 1 Bible Online

1 Yuhanno 1 - Uzbek Muqaddas Kitob bible

1 Yuhanno 1

¹Boshidan ayon boʻlgan Hayot kalomi[3] haqida biz sizlarga xabar bermoqchimiz. Koʻrib eshitganlarimizni, ha, oʻz koʻzimiz bilan koʻrib, oʻz qoʻllarimiz bilan paypaslab koʻrganlarimizni[4] sizlarga ma’lum qilmoqchimiz.

²Otamiz Xudoning huzurida boʻlgan Hayot bizga oshkor boʻldi! Biz bu abadiy Hayotni koʻrib, endi U haqda sizlarga shohidlik qilyapmiz.

³Koʻrgan — eshitganlarimizni ma’lum qilish orqali sizlar bilan birodar boʻlib yashamoqchimiz. Zero, oʻzimiz ham Otamiz Xudo va Uning Oʻgʻli Iso Masih bilan yashayapmiz.

⁴Bularni sizlarga qalbimiz[5] shodlikka toʻlsin deb, yozyapmiz.

⁵Biz Iso Masihdan eshitib, sizlarga yetkazayotgan Xushxabarimiz shundan iborat: Xudo — nur, Unda hech qanday zulmat yoʻq.

⁶Agar biz Xudo bilan yashayapmiz deb turib, oldingiday zulmatda yashasak, yolgʻon gapirib, haqiqatga xilof ish qilgan boʻlamiz.

⁷Bordi — yu, Xudo singari nurda yashasak, biz birodarlarimiz bilan uygʻunlikda yashaymiz va Xudo Oʻz Oʻgʻli Isoning qoni orqali bizni har qanday gunohdan poklaydi.

⁸Agar gunohimiz yoʻq desak, oʻzimizni oʻzimiz aldagan boʻlamiz va bizda haqiqat boʻlmaydi.

⁹Bordi — yu, gunohlarimizni e’tirof etsak, sodiq va adolatli boʻlgan Xudo gunohlarimizni kechirib, bizni har qanday yomonlikdan forigʻ qiladi.

¹⁰Agar gunoh qilganimiz yoʻq desak, Xudoni yolgʻonchiga chiqargan boʻlamiz. Demak, Uning kalomi qalbimizdan joy olmagan boʻladi.