Read Uzbek Muqaddas Kitob 1 Yuhanno 3 Bible Online

1 Yuhanno 3 - Uzbek Muqaddas Kitob bible

1 Yuhanno 3

¹Qaranglar, Otamiz Xudo bizni farzandlarim deb, qanday buyuk bir sevgini koʻrsatdi! Haqiqatan ham, biz Uning farzandlarimiz. Dunyo Otamizni hech qachon tan olmagan, shuning uchun bizni ham Xudoning farzandlari deb tan olmayapti.

²Ha, azizlarim, hozir biz Xudoning farzandlarimiz. Ammo kelajakda kim boʻlishimiz bizga hanuz ochilmagan. Faqat shuni bilamizki, oʻsha payt kelganda, biz Xudo singari boʻlamiz, chunki Xudoning Oʻzini koʻramiz.

³Xudoga bunday umid bogʻlagan har bir odam Iso Masih singari pok boʻlishi uchun oʻzini poklaydi.

⁴Gunoh qiluvchi har qanday odam Xudoga qarshi bosh koʻtargan boʻladi, chunki gunoh Xudoga qarshi bosh koʻtarmoq demakdir.

⁵Masih esa gunohlarimizni yuvish uchun kelganini bilasizlar. Unda gunoh yoʻqligi oʻzingizga ayon.

⁶Masih bilan yashagan har bir odam gunohdan yuz oʻgiradi. Gunoh qilib yurgan odam esa, Masihni koʻrmagan ham, tanimagan ham.

⁷Aziz bolalarim[16], hech kim sizlarni aldamasin. Adolatli ish qiluvchi har qanday odam xuddi Masih singari odildir.

⁸Gunoh qiluvchi esa iblis zotidandir. Chunki iblis azaldan gunoh qilib kelyapti. Ammo Xudoning Oʻgʻli iblisning ishlarini barbod qilish uchun keldi.

⁹Xudoning bolalari gunoh qilmaydi, chunki Xudoning hayotbaxsh kuchi[17] ularning ichidadir. Ular Xudoning bolalari boʻlganlari uchun gunohda yashamaydilar.

¹⁰Adolatli ish qilmagan va oʻz birodarini sevmagan odam esa Xudodan emas. Demak, iblis bolalari bilan Xudo bolalarining farqi ana shundadir.

¹¹Sizlar boshidan eshitgan kalom shu: bir — birimizni yaxshi koʻraylik!

¹²Yovuz shayton zoti boʻlgan Qobilga[18] oʻxshamaylik. U oʻz ukasini oʻldirgandi. Nima uchun ukasini oʻldirdi? Chunki uning ishlari qabih, ukasining ishlari esa toʻgʻri edi.

¹³Ey birodarlarim, agar dunyo sizdan nafratlanayotgan boʻlsa, hayratlanmanglar.

¹⁴Biz oʻlimdan hayotga oʻtganimizni bilamiz, chunki birodarlarimizni sevamiz. Birodarini sevmagan odam esa oʻlim iskanjasida qolgan.

¹⁵Birodaridan nafratlangan har qanday kishi qotildir. Hech bir qotil abadiy hayotga ega boʻlmasligini bilasizlar.

¹⁶Masih bizlar uchun jonini fido qildi, ana shundan biz haqiqiy sevgini bildik. Demak, biz ham birodarlarimiz uchun jonimizni fido qilishga burchlimiz.

¹⁷Agar oʻzimizga toʻq boʻlib turib, muhtojlikda yashayotgan birodarimizni koʻrsak — u, unga yordam bermay yuragimizni tosh qilsak, qanday qilib bizda Xudoning sevgisi joy oladi?!

¹⁸Aziz bolalarim, biz haqiqiy sevgimizni quruq gap bilan emas, amalda koʻrsataylik.

¹⁹Shunda biz haqiqat ahli ekanimizga ishonch hosil qilamiz. Hattoki vijdonimiz qiynalganda ham “Xudo hamma narsani biladi, U vijdonimizdan ham ulugʻ” degan haqiqat bilan Xudoning huzurida oʻzimizni tinchlantira olamiz.

²¹Agar vijdonimiz bizni qiynamasa, ey azizlarim, Xudo oldida dadil boʻlamiz

²²va Undan nima soʻrasak, U beradi. Chunki biz Uning amrlarini bajarib, Unga manzur boʻlgan ishlarni qilyapmiz.

²³Xudoning amri esa Uning Oʻgʻli Iso Masihga ishonishdan va Masih buyurganidek, bir — birimizni sevishdan iboratdir.

²⁴Xudoning amrlarini bajargan odam Xudo bilan birga va Xudo u bilan birga yashaydi. Xudo biz bilan yashayotganini U har birimizga bergan Ruhidan bilamiz.