Read Uzbek Muqaddas Kitob Hakamlar 13 Bible Online

Hakamlar 13 - Uzbek Muqaddas Kitob bible

Hakamlar 13

¹Isroil xalqi yana Egamizning oldida qabih ishlar qilgani uchun, Egamiz ularni qirq yilga Filist xalqining qoʻliga berdi.

²Oʻsha zamonda Zoroxlik bir odam bor edi. U Dan qabilasidan[95] boʻlib, ismi Monuvax edi. Uning xotini bepusht boʻlib, farzandi yoʻq edi.

³Bir kuni Egamizning farishtasi ayolga zohir boʻlib shunday dedi: “Sen shu paytgacha bola koʻrishga ojiz eding, ammo koʻp oʻtmay sen homilador boʻlib, oʻgʻil tugʻasan.

⁴Sharob va oʻtkir ichimliklarni endi icha koʻrma, harom narsani ham yema,

⁵chunki sen homilador boʻlib, oʻgʻil koʻrasan. Bola tugʻilishi bilanoq Xudoga nazr qilingay[96], shuning uchun bolaning boshiga ustara tegmasin. Isroilni Filistlarning qoʻlidan ozod qilishni boshlaydigan oʻshadir.”

⁶Keyin ayol erining oldiga borib dedi: “Oldimga Xudoning bir odami keldi, uning koʻrinishi xuddi Xudoning farishtasiga oʻxshagan juda qoʻrqinchli edi. Uning qayerdan kelganini soʻramabman. Oʻzi ham menga ismini aytmadi.

⁷Uning gapiga qaraganda, men homilador boʻlib, oʻgʻil koʻrar ekanman. Bola tugʻilishi bilanoq bir umrga Xudoga nazr qilinar ekan, shuning uchun men sharobni ham, oʻtkir ichimlikni ham, harom narsani ham ogʻzimga olishim mumkin emas ekan.”

⁸“Yo Rabbiy, — deya Egamizga yolvordi Monuvax, — oʻsha odamingni yana oldimizga yuborishingni iltijo qilib soʻrayman. U kelib, boʻlajak oʻgʻlimizga nima qilishimiz kerakligini oʻrgatib ketsin.”

⁹Monuvaxning ibodati ijobat boʻldi. Ayol dalada oʻtirgan bir paytda Xudoning farishtasi yana ayolning oldiga keldi. Ammo oʻsha paytda Monuvax u yerda yoʻq edi.

¹⁰Ayol shoshib — pishib erining oldiga yugurdi — da: “Tunov kun oldimga kelgan odam yana menga zohir boʻldi!” — deb aytdi.

¹¹Monuvax turib xotiniga ergashdi. Oʻsha odamning oldiga kelib: — Bu ayolga gapirgan sizmidingiz? — deb soʻradi. — Ha, men edim, — deya javob berdi u.

¹²— Aytganlaringiz amalga oshganidan soʻng, bola qay tarzda yashashi kerak? U nima ish qiladi? — deb soʻradi Monuvax.

¹³Egamizning farishtasi Monuvaxga shunday deb javob berdi: — Xotining aytganlarimning hammasini soʻzsiz bajarsin.

¹⁴Uzumdan tayyorlangan bironta narsani ham ogʻziga olmasin. Sharob va oʻtkir ichimliklarni ichmasin, hech qanday harom narsa yemasin. Aytganlarimning hammasiga rioya qilsin.

¹⁵Monuvax Egamizning farishtasiga: — Bir oz kutib tursangiz, sizga bir uloqcha tayyorlab bersam, — dedi.

¹⁶— Kutganim bilan, baribir, taomingni yemayman, — dedi Egamizning farishtasi. — Lekin uloqchani kuydiriladigan qurbonlik qilmoqchi boʻlsang, uni Egamizga baxshida et. Monuvax u Egamizning farishtasi ekanligini bilmagandi.

¹⁷Keyin Monuvax Egamizning farishtasiga: — Bizga ismingizni ayting. Toki aytganlaringiz roʻyobga chiqqanda, sizni duo qilib yuraylik, — dedi.

¹⁸Egamizning farishtasi esa: — Nega ismimni soʻrayapsan? Aytganim bilan baribir unga aqling yetmaydi, — dedi.

¹⁹Monuvax Egamizga atab, uloqchani katta bir toshning ustida qurbonlik qilib kuydirdi, unga qoʻshib don nazri ham kuydirdi. Shu onda Monuvax va uning xotini oldida Egamiz ajoyib bir moʻjiza yaratdi:

²⁰qurbongoh alangasi osmonga chirmashayotgan edi. Egamizning farishtasi ham alangaga qoʻshilib yuqoriga koʻtarilib ketdi. Buni koʻrgan Monuvax bilan xotini yerga muk tushishdi.

²¹Farishta koʻzdan gʻoyib boʻldi — yu, boshqa ularga koʻrinmadi. Shundan keyin Monuvax oʻsha odam Egamizning farishtasi ekanligini angladi.

²²Monuvax xotiniga: — Biz oʻlamiz, chunki biz Xudoni koʻrdik![97] — dedi.

²³— Agar Egamiz bizni oʻldirmoqchi boʻlganda, don nazri va qurbonligimizni qabul qilmagan boʻlardi, — dedi xotini. — Bu moʻjizalarni bizga koʻrsatib, bunday narsalarni aytib oʻtirmagan boʻlardi.

²⁴Ayol oʻgʻil koʻrdi, uning ismini Shimshoʻn qoʻydi. Bola katta boʻldi, Xudo esa uni yorlaqadi.

²⁵Shimshoʻn Zorox bilan Eshtoyoʻl shaharlari[98] orasidagi Dan qabilasining qarorgohida[99] boʻlganda, Egamizning Ruhi uni boshqara boshladi.