Read Uzbek Muqaddas Kitob Hakamlar 14 Bible Online

Hakamlar 14 - Uzbek Muqaddas Kitob bible

Hakamlar 14

¹Bir kuni Shimshoʻn Timnax degan shaharga bordi. Timnaxda u bir Filist qizni koʻrib qoldi.

²Uyiga qaytib kelgach, ota — onasiga shunday dedi: — Men Timnaxda bir Filist qizni koʻrdim. Uni menga olib beringlar.

³— Oʻz xalqimiz orasida qiz qurib qolibdimi?! Endi borib sunnatsiz Filistlardan qiz olishimiz qolgandi, — deb javob berdi ular. Ammo Shimshoʻn otasiga: — Menga oʻsha qizni olib bering, men uni yoqtirib qoldim, — deb turib oldi.

⁴Bu Egamizning xohishi edi, ammo Shimshoʻnning ota — onasi bundan bexabar edilar. Egamiz Filistlarga qarshi jang qilish uchun bironta bahona qidirayotgan edi. Oʻsha zamonda Filistlar Isroilda hukmronlik qilardilar.

⁵Shimshoʻn ota — onasi bilan Timnaxga yoʻl oldi. Ular Timnax uzumzorlariga yaqinlashganlarida, birdan Shimshoʻn oldidan bir sher chiqib qolib, oʻkirganicha unga tashlanmoqchi boʻldi.

⁶Oʻsha zahoti Egamizning Ruhi Shimshoʻnni qamrab olib, kuchini oshirdi. Shimshoʻn sherni, xuddi uloqchani parchalaganday, qoʻllari bilan osongina ikkiga boʻlib tashladi. Ammo boʻlib oʻtgan voqea haqida ota — onasiga ogʻiz ham ochmadi.

⁷Soʻng Shimshoʻn qizning oldiga borib, u bilan gaplashdi, qiz Shimshoʻnga nihoyatda xush keldi.

⁸Koʻp oʻtmay Shimshoʻn qizga uylanmoqchi boʻlib, Timnaxga qaytib bordi. Yoʻl — yoʻlakay sherning oʻligini koʻrib ketay deb, oʻsha tomon yoʻl soldi. Qarasa, sherning murdasida asalarining uyasi bilan asal bor ekan.

⁹U bir hovuch asal olib, yoʻl — yoʻlakay yeb ketdi. Ota — onasining oldiga kelganda, ularga ham yeb koʻrgani berdi, lekin asalni sherning murdasidan olganini aytmadi[100].

¹⁰Shimshoʻnning otasi kelinini koʻrmoqchi boʻlib, qudasining uyiga kirdi. Shimshoʻn oʻsha yerda toʻy munosabati bilan katta bir ziyofat berdi. Oʻsha vaqtdagi urf — odatlar boʻyicha, kuyovlar katta ziyofatlar berishardi.

¹¹Shimshoʻn ziyofat berish uchun Timnaxga borganda, Filistlar uning oldiga kuyov navkar qilib, oʻttizta yigitni yubordilar.

¹²Shimshoʻn ularga: — Kelinglar, sizlarga bir topishmoq aytayin, — dedi. — Agar uni topib, ziyofatning yetti kuni ichida menga tushuntirib bersangizlar, har biringizga bittadan kimxob toʻn va bir sidradan kiyim — bosh beraman.

¹³Bordi — yu, topishmogʻimni topolmasangizlar, sizlar menga oʻttizta kimxob toʻn bilan oʻttiz sidra kiyim — bosh berasizlar. Shunda ular: — Qani, topishmogʻingni ayt, uni eshitaylik — chi, — deyishdi.

¹⁴Shimshoʻn topishmogʻini aytdi: “Xoʻrandaning ichidan xoʻrak chiqdi, Kuchlining ichidan shirinlik chiqdi.” Oradan uch kun oʻtdi, ammo Filist yigitlari topishmoqni topolmadilar.

¹⁵Oxiri, yettinchi[101] kuni Shimshoʻnning qayligʻiga doʻq qilib: “Sizlar bizni shilmoqchi boʻlib bu yerga taklif qilganmidingizlar?! — dedilar. — Boʻl, eringni aldab — suldab topishmoqning ma’nosini bizga bilib ber, boʻlmasa seni ham, otangning xonadonini ham yondirib yuboramiz.”

¹⁶Shunda kelinchak Shimshoʻnning oldiga borib rosa yigʻladi. — Sen meni yomon koʻrar ekansan! — deya xarxasha qildi u. — Meni zarracha boʻlsa ham yaxshi koʻrganingda edi, topishmoqning javobini allaqachon aytgan boʻlar eding. — Menga qara, — dedi unga Shimshoʻn. — Buni ota — onamga ham aytmagan boʻlsam, nega senga aytar ekanman?!

¹⁷Ziyofat yetti kun davom etgan boʻlsa, oʻsha yetti kun davomida kelin unga xiralik qilib yigʻlayverdi. Yettinchi kuni Shimshoʻnning yuragini shu qadar ezib yubordiki, u toqat qila olmay topishmoqning javobini aytib berdi. Qiz javobni darhol Filist yigitlariga yetkazdi.

¹⁸Oʻsha kuni qosh qoraymasdan oldin yigitlar Shimshoʻnning oldiga kelib, topishmoqning javobini aytdilar: “Asaldan shirin nima bor?! Sherdan kuchli nima bor?!” Shimshoʻn: “Agar gʻunajinimni ishga solmaganlaringda, topishmogʻimni topolmas edilaring”, — dedi.

¹⁹Soʻng Egamizning Ruhi Shimshoʻnni qamrab olib, uning kuchini yanada oshirdi. Shimshoʻn Ashqalon shahriga[102] ketdi. U yerda oʻttiz nafar Ashqalonlik odamni oʻldirib, kiyim — boshlarini yechib oldi. Oʻsha kiyim — boshlarni topishmoqning javobini aytganlarga berdi — yu, jahl ustida otasining uyiga qaytib ketdi.

²⁰Kelinning otasi esa qizini Shimshoʻnning kuyov joʻrasiga uzatib yubordi.