Read Uzbek Muqaddas Kitob Hakamlar 15 Bible Online

Hakamlar 15 - Uzbek Muqaddas Kitob bible

Hakamlar 15

¹Oradan vaqt oʻtdi. Bugʻdoy oʻrimi paytida, Shimshoʻn bir uloqcha olib, xotinining oldiga bordi. U qaynatasiga: — Men xotinimning oldiga kirmoqchiman, — dedi. Qaynatasi esa Shimshoʻnni ichkariga kirgizmadi.

²— Sen qizimni tashlab ketding, deb oʻylagandim, — dedi u. — Shuning uchun uni kuyov joʻrangga uzatib yubordim. Qara, kenja qizim undan ham chiroyliroq. Kel, uning oʻrniga singlisini ola qol.

³— Bu safar Filistlarga yomonlik qilsam, aybga buyurmaysiz, — deb chiqib ketdi Shimshoʻn.

⁴Shimshoʻn uch yuzta tulki ushlab keldi. Tulkilarni juft — juft qilib, dumlarini bir — biriga bogʻladi — da, orasiga bittadan mash’ala qistirdi.

⁵Soʻng mash’alalarni yoqib, tulkilarni Filistlarning bugʻdoyzorlariga qoʻyib yubordi. Bugʻdoyzor va don gʻaramlarini alanga oldi — yu, Filistlarning uzumzorlari va zaytun bogʻlarini yamladi.

⁶Filistlar: “Buni kim qildi?” deb surishtira boshladilar. “Buni Timnaxlik bir odamning kuyovi, Shimshoʻn qildi, — dedi bir kishi. — U oʻsha Timnaxlikning qiziga uylangan ekan, qaynatasi esa qizini kuyovning joʻrasiga uzatib yuboribdi.” Shunda Filistlar kelib, oʻsha juvon bilan otasining xonadonini[103] yoqib yuborishdi.

⁷Shimshoʻn bundan xabardor boʻlgach, Filistlarning oldiga borib: “Ont ichib aytamanki, shu qilmishlaring uchun sizlardan oʻch olmagunimcha qoʻymayman!” — dedi.

⁸Shimshoʻn ularni shafqatsizlarcha qirib tashladi. Keyin esa u yerlarni tark etib, Etom qoyasidagi[104] bir gʻorga borib yashadi.

⁹Koʻp oʻtmay Filistlar Yahudoda qarorgoh qurib, Lexi[105] shahrini bosib olishdi.

¹⁰Yahudo odamlari: “Nima uchun bizga hujum qildingizlar?” deb soʻradilar. Ular esa: “Biz Shimshoʻnni qoʻlga olmoqchimiz. Bizga qilgan yomonligini qaytarib oʻz boshiga solmoqchimiz”, deb javob berishdi.

¹¹Yahudo qabilasidan uch mingta odam Etom qoyasiga borib Shimshoʻnga: — Filistlar bizga hukmronlik qilishlarini bilmaysanmi? — dedilar. — Sen boshimizga bitgan balo boʻlding — ku! Shimshoʻn javob berib dedi: — Men qilmishlariga yarasha jazosini berdim, xolos.

¹²— Biz seni olib ketgani keldik, — dedi Yahudo odamlari. — Seni bogʻlab Filistlarga bermoqchimiz. — Xoʻp, mayli, — dedi Shimshoʻn. — Ammo sizlar meni oʻldirmaslikka soʻz beringlar.

¹³— Biz seni oʻldirmaymiz, — deb soʻz berdi ular. — Biz seni bogʻlab, ularga topshirsak boʻldi. Yahudo odamlari Shimshoʻnni ikkita yangi arqon bilan bogʻlab, shaharga olib keldilar.

¹⁴Shimshoʻn Lexiga kelganda, Filistlar uni qiy — chuv bilan qarshilab olishdi. Shu zahoti Egamizning Ruhi Shimshoʻnni qamrab olib, yanada kuchini oshirdi. Shimshoʻn qoʻllaridagi arqonlarni kuygan zigʻir tolalarini uzayotganday osonlikcha uzib tashladi.

¹⁵Soʻng atrofiga bir nazar solib, eshakning jagʻ suyagini koʻrib qoldi. Jagʻ suyagi oftobda qurib ketmagani uchun qattiq va ogʻir edi. Shimshoʻn suyakni olib, Filistlarni savalay boshladi. Oʻsha kuni u ming nafar odamni oʻldirdi.

¹⁶Shunda Shimshoʻn dedi: “Eshakning jagʻ suyagi bilan mingta odamni oʻldirdim. Eshakning jagʻ suyagi bilan ularni uyum — uyum[106] qildim.”

¹⁷U gapini tugatib boʻlgach, suyakni uloqtirib yubordi — da, oʻsha joyni Ramat — Lexi[107] deb atadi.

¹⁸Shimshoʻn rosa chanqab ketdi, soʻng Egamizga iltijo qilib dedi: “Sen qulingga shunday buyuk bir gʻalabani berding. Hozir esa men tashnalikdan ado boʻlib, sunnatsizlarning qoʻliga tushamanmi?!”

¹⁹Xudo Lexida yer ostidagi boʻshliqni yorib, u yerdan suv chiqardi. Shimshoʻn suv ichib oʻziga keldi. Shuning uchun buloq En — Xaqqor[108] deb ataldi, u bugunga qadar[109] Lexidadir.

²⁰Filistlar hukmronligi davrida Shimshoʻn Isroil xalqiga yigirma yil hakamlik[110] qildi.