Read Uzbek Muqaddas Kitob Hakamlar 18 Bible Online

Hakamlar 18 - Uzbek Muqaddas Kitob bible

Hakamlar 18

¹Bu voqealar sodir boʻlgan davrda Isroilda shoh yoʻq edi. Dan qabilasi Isroil qabilalari orasida oʻziga ulush boʻlib tushgan yerni hanuz qoʻlga kiritmagani sababli istiqomat qilish uchun joy qidirib yurgan edi.

²Bir kuni ular oʻz qabilasining jamiki urugʻlari orasidan beshta jangchini tanlab: “Boringlar, yurtni sinchiklab tekshirib chiqinglar”, — deya ularni Zorox va Eshtoyoʻl shaharlaridan[128] joʻnatib yubordilar. Bu odamlar yoʻl yurib, Efrayim qirlaridagi Mixoning uyiga kelib qolishdi va tunni oʻsha yerda oʻtkazishdi.

³Ular Mixoning uyida boʻlganlarida yosh levini[129] shevasidan tanib qolishdi — da, uning oldiga borib: — Bu yerga qanday qilib kelib qolding? Bu yerda nima qilib yuribsan? — deb soʻrashdi.

⁴U javob berib: “Mixo meni ishga oldi, ruhoniy qilib tayinladi”, — dedi. Mixo unga qilgan hamma yaxshiliklarini aytib berdi.

⁵Shunda ular leviga: — Xudoga iltijo qilib, ishimiz oʻngidan kelish — kelmasligini bilib ber, — dedilar.

⁶— Hech narsadan xavotirlanmanglar. Egamizning Oʻzi sizlarga bu ishda madadkordir, — dedi ruhoniy.

⁷Beshala odam yoʻlga ravona boʻldi. Ular Layish shahriga kelib, u yerda Sidon[130] aholisi kabi muloyim, xotirjam va tinch — totuv yashayotgan odamlarni koʻrishdi. Bundan tashqari, atrofdagi xalqlardan birontasi oʻsha xalqqa xavf solmagan, yurtiga tajovuz qilmagandi. Ular Sidondan ancha uzoqda boʻlib, atrofdagi shaharlar bilan hech qanday aloqa oʻrnatmagan edilar.

⁸Beshala odam Zorox bilan Eshtoyoʻlga — oʻz urugʻ — aymoqlarining oldiga qaytib borishdi. — Bizga qanday xabar olib keldingizlar? — deb soʻradi ulardan qarindosh — urugʻlari.

⁹Ular shunday javob berishdi: — Kelinglar, Layishga hujum qilaylik! Biz koʻrgan yurt nihoyatda yaxshi ekan. Nimaga qaqqayib turibsizlar?! Boʻlinglar, oʻsha yerga borib yurtni qoʻlga kiritaylik.

¹⁰U yerga borganlaringda, xotirjam yashayotgan odamlarga duch kelasizlar. Barcha narsaga moʻl va keng bu yerni Xudo chindan ham qoʻlingizga beryapti.

¹¹Dan qabilasining olti yuzta odami jang aslahalari bilan qurollanib, Zorox bilan Eshtoyoʻldan safarga otlanishdi.

¹²Ular yoʻl yurib, oʻz qarorgohini Yahudodagi Xirat — Yoʻrim shahrining gʻarb tomonida qurishdi. Shuning uchun oʻsha joy bugunga qadar[131] Dan qarorgohi[132] deb ataladi.

¹³U yerdan ular Efrayim qirlari tomon yoʻl olib, Mixoning uyiga yaqinlashib qolishdi.

¹⁴Shunda yurtni, aniqrogʻi, Layish shahrining atroflarini koʻrib chiqqan beshta odam birodarlariga deyishdi: “Bu xonadonlarning birida ruhoniylar libosi[133], xonaki sanamlar[134] va but borligidan xabarlaring bormi? Nima qilishimiz kerakligini yaxshi oʻylab koʻringlar.”

¹⁵Ular yosh levi turadigan Mixoning uyiga borib, levidan hol — ahvol soʻradilar.

¹⁶Olti yuzta qurollangan Dan qoʻshini darvozaning yonida turgan edi.

¹⁷Aygʻoqchilik qilgan beshta odam toʻppa — toʻgʻri ichkariga bostirib kirib, ruhoniylar libosi, xonaki sanamlar va kumush bilan qoplangan butni olmoqchi boʻldilar. Levi esa qurollangan olti yuzta odam bilan darvoza yonida qolgan edi.

¹⁸Aygʻoqchilar Mixoning uyiga kirib, ruhoniylar libosi, xonaki sanamlar va butni olganlarini koʻrgan levi ularga: — Bu nima qilganlaring? — dedi.

¹⁹— Jim boʻl! — deb doʻq qildi ular. — Ovozingni oʻchirib biz bilan yur. Bizga maslahatchi va ruhoniy boʻl. Oʻzing oʻylab koʻr, sen bittagina xonadonga ruhoniy boʻlganing yaxshimi yoki Isroilning butun bir qabilasigami?

²⁰Ruhoniyga bu taklif ma’qul keldi. U ruhoniylar libosi, xonaki sanamlar va kumush bilan qoplangan butni olib, Dan odamlari bilan ketdi.

²¹Dan odamlari bola — chaqalarini, chorvayu mol — mulkini oldinga oʻtkazib, safarlarini davom ettirishdi.

²²Ular Mixoning uyidan ancha uzoqlashib qolganlarida, Mixo qoʻni — qoʻshnilarini toʻpladi — da, Dan odamlarining ketidan quvib ketdi.

²³Soʻng ovozi boricha baqirib, Dan odamlarini chaqirdi. Ular esa orqaga oʻgirilib Mixoga: — Tinchlikmi?! Shuncha odamni yetaklab kelibsan?! — dedilar.

²⁴— Sizlar men yasattirgan xudolar bilan ruhoniyimni olib ketib, meni ship — shiydam qildingiz — ku. Yana: “Tinchlikmi?” deganingiz nimasi?! — deya javob berdi Mixo.

²⁵— Ovozingni oʻchir, — dedi unga Dan odamlari. — Boʻlmasa, qoni qaynagan birodarlarimiz jagʻingni ezib, oʻzingni ham, uyingdagilarni ham yoʻq qilib yuborishadi.

²⁶Dan odamlari yoʻldan qolmadilar. Mixo esa ularga bas kelolmasligini koʻrib, uyiga qaytib ketdi.

²⁷Dan qabilasi Mixo yasattirgan narsalarni va uning xizmatida boʻlgan ruhoniyni Layishga olib bordilar. Ular Layishda tinch va xotirjam yashayotgan odamlarni qilichdan oʻtkazib, shaharga oʻt qoʻydilar.

²⁸Layish aholisiga najot beradigan hech kim yoʻq edi, chunki Layish Sidondan juda uzoqda boʻlib, yaqin atrofidagi shaharlar bilan esa hech qanday aloqa oʻrnatmagan edi. Layish Bayt — Rexob shahri bilan bir vodiyda joylashgan edi. Dan qabilasi shaharni tiklab, u yerda oʻrnashib oldi.

²⁹Shaharni esa ota — bobosi Yoqub[135] oʻgʻli Danning nomi bilan atadi. Dan shahrining eski nomi Layish edi.

³⁰Dan qabilasi oʻzi uchun Mixodan tortib olgan, kumush bilan qoplangan butni oʻrnatdi. Gershom oʻgʻli Yoʻnatan esa ularga ruhoniy boʻldi. Yoʻnatan Musoning[136] nabirasi edi. Isroil xalqi surgun boʻlguniga qadar[137], Yoʻnatanning butun nasli ham Dan qabilasiga ruhoniylik qildi.

³¹Oʻsha davrda Xudoning uyi Shiloʻ shahrida[138] joylashgan edi, ammo Dan qabilasi u yerga bormay, Mixo yasattirgan butga sajda qilib keldi.