Read Uzbek Muqaddas Kitob Hakamlar 21 Bible Online

Hakamlar 21 - Uzbek Muqaddas Kitob bible

Hakamlar 21

¹Isroil xalqi Mispaxdagi[150] yigʻinda: “Birontamiz ham Benyamin qabilasiga qiz uzatmaymiz”, — deb ont ichgan edi.

²Benyamin qabilasi bilan boʻlgan urushdan keyin Isroil xalqi Baytilga[151] borib, Xudoning huzurida kechgacha oʻtirdi. Ular faryod koʻtarib:

³“Ey Isroil xalqining Xudosi — Egamiz, nega bunday koʻrgilik boshimizga tushdi?! Nega Isroilning bir qabilasi yoʻq boʻlib ketdi?!” deya achchiq — achchiq yigʻladilar.

⁴Ertasi kuni odamlar barvaqt turib, u yerda qurbongoh qurdilar. Ular kuydiriladigan qurbonliklar va tinchlik qurbonliklarini keltirdilar.

⁵Keyin bir — birlaridan: “Isroil qabilalaridan Egamiz huzurida oʻtkazilgan yigʻinga kelmaganlar bormi?” deb soʻradilar. Chunki ular, Mispaxda — Egamiz huzurida oʻtkazilgan yigʻinda ishtirok etmagan har bir kishining jazosi oʻlimdir, deb qat’iy bir qasam ichgan edilar.

⁶Isroil xalqi oʻz jigari boʻlgan Benyamin qabilasiga achinib: “Evoh, bugun Isroilning bir qabilasi yoʻq boʻldi”, deya koʻp oʻkindi.

⁷“Oʻsha qabiladan faqatgina bir nechta yigit omon qoldi, xolos. Endi ular uchun qayerdan qiz topamiz? Birontamiz ularga qiz uzatmaymiz, deb Egamizning nomi bilan qasam ichgan edik — ku!”

⁸Isroil xalqi: “Mispaxdagi yigʻinda qatnashmaganlar bormi?” deya surishtira boshladi. Shunda Giladdagi Yobosh shahrining aholisi yigʻinda qatnashmaganligi ma’lum boʻldi.

⁹Chunki yoʻqlama qilinganda oʻsha shahardan hech kim yoʻq edi.

¹⁰Butun jamoa oʻn ikki ming jangchini tanlab, ularga: “Boringlar, Giladdagi Yobosh shahrining butun aholisini qirib tashlanglar, xotinu bola — chaqalarini ham ayamanglar!” dedi.

¹¹“Har bir erkak va er koʻrgan har bir ayol oʻldirilsin.”

¹²Jangchilar Yobosh[152] aholisining orasidan toʻrt yuzta er koʻrmagan, yosh bokira qizni topib, ularni Kan’on yurtidagi Shiloʻ qarorgohiga olib keldilar.

¹³Keyin butun jamoa Rimmon qoyasidagi Benyamin odamlariga xabar yuborib, tinchlik e’lon qildi.

¹⁴Benyamin odamlari oʻz uylariga qaytib borishdi. Isroil xalqi Giladdagi Yobosh aholisining omon qolgan qizlarini ularga turmushga berdi. Ammo qizlarning soni Benyamin odamlariga qaraganda kamroq edi.

¹⁵Isroil xalqi Benyamin qabilasiga nihoyatda achinar edi, chunki Egamiz ularni deyarli yoʻq qilib yuborgan edi.

¹⁶Shunda jamoa oqsoqollari shunday dedilar: — Obbo, endi qolgan Benyamin oʻgʻillariga qayerdan qiz topib beramiz? Ularning qabilasidan bironta qiz ham tirik qolmadi — ku!

¹⁷Benyamin qabilasi Isroildan batamom yoʻq boʻlib ketmasligi uchun omon qolganlari nasl qoldirishlari kerak.

¹⁸Lekin shunisi ham borki, biz: “Benyamin qabilasiga qiz uzatgan la’nati boʻlgay!” deb qasam ichib qoʻydik, endi ularga qiz uzata olmaymiz.

¹⁹Shunda odamlardan bittasi: — Ha, aytgancha, Egamizga bagʻishlab Shiloʻda har yili oʻtkaziladigan bayram haqida nima deysizlar? — dedi. — Lavoʻn va Baytil shaharlarining oʻrtasida joylashgan bu shahar, Baytildan Shakamga ketadigan yoʻlning shundoq yonginasida — ku.

²⁰Oqsoqollar Benyamin qabilasidan boʻlgan boʻydoq yigitlarga shunday uqtirdilar: — Boringlar, uzumzorlarda yashirinib,

²¹poylab turinglar. Shiloʻ qizlari oʻyinga chiqqanda, uzumzordan chiqib, har biringiz oʻzlaringiz uchun qiz olib qochinglar.

²²Qizlarning otalari yoki aka — ukalari oldimizga shikoyat qilib keladigan boʻlishsa, biz ularga shunday deymiz: “Qizlaringizni olib qolishimizga ijozat beringlar. Tushuninglar axir, biz Giladdagi Yoboshga hujum qilganimizda Benyamin yigitlari uchun yetarlicha qiz olib kela olmadik. Garchi Benyamin yigitlari qizlaringizni olib qochgan boʻlsa — da, sizlar qasamni buzgan hisoblanmaysizlar.”

²³Benyamin odamlari Shiloʻga borib, uzumzorlarda yashirinib oldilar. Qizlar raqsga tushganlarida ular oʻzlari uchun bittadan qiz olib qochdilar. Soʻng olib qochgan qizlari bilan uylariga qaytib ketdilar, shaharlarini tiklab, oʻsha joyda yashadilar.

²⁴Butun Isroil jamoasi ham uy — uylariga, qabilalari va oilalariga qaytib bordi.

²⁵Oʻsha davrlarda Isroilda shoh yoʻq edi. Har bir odam bilganini qilar edi.