Read Uzbek Muqaddas Kitob Hakamlar 9 Bible Online

Hakamlar 9 - Uzbek Muqaddas Kitob bible

Hakamlar 9

¹Gidoʻn[70] oʻgʻli Abumalek Shakam shahriga — togʻalarining oldiga borib, barcha urugʻ — aymoqlariga shunday dedi:

²— Shakam beklarining huzuriga boringlar, ularga: “Ustingizdan Gidoʻnning yetmishta oʻgʻli hukmronlik qilganidan koʻra, bittasi hukmronlik qilgani yaxshi emasmi?” deb aytinglar. Men sizlarning jigaringiz ekanimni ham eslaringdan chiqarmanglar.

³Togʻalari Abumalekning manfaatini koʻzlab, bu soʻzlarni Shakam beklariga yetkazdilar. Shakam beklari esa: “Har qalay Abumalek qarindoshimiz”, deya uning tarafdorlari boʻldilar.

⁴Shakam beklari unga Baal — Berit[71] uyidagi yetmish boʻlak kumushni[72] berdilar. Abumalek esa bu kumushga yaramas odamlarni yolladi.

⁵U Oʻfraga — otasining uyiga borib, yetmishta oʻgay aka — ukasini bir tosh ustida qatl qildi. Ammo Gidoʻnning kenja oʻgʻli Yoʻtom bekinib, tirik qoldi.

⁶Soʻng Shakam[73] beklari va Bayt — Milloda yashovchilar Shakamdagi muqaddas eman daraxtining oldiga borib, u yerda Abumalekni taxtga koʻtarishdi.

⁷Yoʻtom buni eshitgach, Garizim togʻining tepasiga chiqib xitob qildi: “Ey Shakam beklari, gapimni eshitinglar, shunda Xudo ham sizlarni eshitgay!

⁸Bir zamonda daraxtlar oʻzlariga shoh tanlamoqchi boʻlishibdi. Ular zaytun daraxtiga: — Shohimiz boʻl, — deyishibdi.

⁹Zaytun daraxti ularga shunday javob beribdi: — Xudolar va bandalar sharafiga ishlatiladigan moyimni bermay qoʻyib, daraxtlar uzra shoxlarimni silkitib turaymi?!

¹⁰Shunda daraxtlar anjirga: — Sen kelib, shohimiz boʻla qol, — deb aytishibdi.

¹¹Anjir daraxti ham shunday javob beribdi: — Iye, shirin va lazzatli mevalarimni tugmay, daraxtlar uzra shoxlarimni silkitib turaymi?!

¹²Soʻng daraxtlar tokka: — Bizga sen hukmronlik qila qol, — deyishibdi.

¹³Tok ham javob berib shunday debdi: — Xudolar va bandalar dimogʻini chogʻ qiladigan sharobimni bermay qoʻyib, daraxtlar uzra novdalarimni silkitib turaymi?!

¹⁴Oxiri daraxtlarning barchasi yantoqqa deyishibdi: — Sen kelib, bizga hukmronlik qilgin.

¹⁵Yantoq esa daraxtlarga: — Agar meni sidqidildan shohlikka koʻtarayotgan boʻlsangizlar, kelib soyamda panoh topinglar, aks holda, tikanlarimdan chiqqan olov avj olib, hatto Lubnondagi sadrlarni[74] ham kuydirib tashlaydi! — deb javob beribdi.

¹⁶Shu tariqa sizlar ham Abumalekni taxtga sidqidildan, vijdonan koʻtardingizmi?! Gidoʻn va uning xonadoniga nisbatan toʻgʻri ish tutdingizmi?! Qilmishlaringiz otamning sizlar uchun qilgan ezgu ishlariga loyiq ekanmi?!

¹⁷Otam jonini ayamay sizlar uchun jang qilgan edi, sizlarni Midiyonlarning qoʻlidan qutqargan edi.

¹⁸Sizlar esa otamning xonadoniga qarshi chiqib, uning yetmish nafar oʻgʻlini bir toshning ustida qatl qildingizlar. Choʻrisi tuqqan Abumalekni esa qarindoshingiz boʻlgani uchun Shakam beklarining ustidan shoh qilib tayinladingizlar.

¹⁹Agar bugun Gidoʻn xonadoniga nisbatan vijdonan ish tutgan boʻlsangiz, Abumalekdan mamnun boʻlib shodlaning, u ham sizlardan mamnun boʻlib shodlansin.

²⁰Aks holda, Abumalekdan olov chiqib, Shakam va Bayt — Millo beklarini yamlab yuborsin. Shakam va Bayt — Millo beklaridan ham olov chiqib, Abumalekni kuydirib yoʻq qilsin.”

²¹Soʻng Yoʻtom Abumalekdan qoʻrqqanidan Ber hududiga qochib qoldi.

²²Abumalek uch yil Isroilda hukmronlik qildi.

²³Xudo esa Abumalek va Shakam beklari orasida nizo chiqarish uchun bir ruh yubordi. Shuning uchun Shakam beklari Abumalekka xoinlik qilishdi.

²⁴Bu hodisa Gidoʻnning yetmishta oʻgʻlini oʻldirgan Abumalekdan va uning bu jinoyatini qoʻllab turgan Shakam beklaridan qasos olinishining daragi edi.

²⁵Shunday qilib, Shakam beklari Abumalekka qarshi togʻlarning tepalarida, pistirmalarda odamlarini oʻtirgʻizib qoʻyishgandi. Ular oʻtgan — ketganlarni talab, bor — yoʻgʻini tortib olishardi. Abumalek bundan xabar topdi.

²⁶Gal ismli bir odam oʻz ogʻa — inilari bilan Shakamga koʻchib keldi. U Shakam beklarining ishonchini qozondi. Gal Evid degan odamning oʻgʻli edi.

²⁷Shakamliklar dalaga chiqib, uzumzorlaridan uzum terishdi, uni ezib sharob tayyorlashdi, soʻng ziyofat qilishdi. Ular xudosining uyida oʻtirib, ziyofat qilishar ekan, yeb — ichib Abumalekni mazax qilishdi:

²⁸“Abumalek kim boʻlibdiki, biz, Shakamliklar, unga xizmat qilsak? — shangʻillab gapini boshladi Gal. — Padari buzrukvorimiz Xamoʻr bu shaharga asos solgan edi. Shunday ekan, Xamoʻr naslidan boʻlgan bironta odam bizga hukmronlik qilishi kerak. Abumalek esa yetti yot begona boʻlgan Gidoʻnning oʻgʻli — ku! Nega biz uning va hokimi Zabulning oldida bosh egishimiz kerak ekan?

²⁹Agar bu odamlar qoʻlim ostida boʻlganda edi, Abumalekni oʻzim yoʻq qilardim! Unga, lashkaringni koʻpaytirib, jangga chiq, degan boʻlardim.”

³⁰Shahar hokimi Zabul Galning bu soʻzlarini eshitgach, gʻazabi alanga oldi.

³¹U bildirmay Abumalekning oldiga chopar joʻnatib[75] dedi: “Qarang, Evid oʻgʻli Gal butun urugʻi bilan Shakamga kelib, shaharni sizga qarshi qoʻzgʻatmoqda.

³²Shuning uchun yarim tunda lashkaringiz bilan yoʻlga tushib, dalalarda yashirining.

³³Ertasiga saharda turib, shaharga qoʻqqisdan hujum qiling. Gal qoʻshinlari bilan sizlarga qarshi chiqqanda qoʻlingizdan kelganicha ular bilan olishing.”

³⁴Shunday qilib, Abumalek lashkari bilan yarim tunda yoʻlga tushdi. Ular toʻrt qismga boʻlinib Shakam yaqinida pisib yotishdi.

³⁵Gal chiqib shahar darvozasida turganda, Abumalek bir qism lashkari bilan qirlar orqasidan chiqib keldi.

³⁶Gal ularni koʻrgach, Zabulga dedi: — Qarang! Qirlardan odamlar tushib kelmoqda! — Qoʻysang — chi, — dedi Zabul. — Qirlar soyalari koʻzingga odamlar boʻlib koʻrinyapti.

³⁷— Qarang, qirlardan odamlar pastga tushib kelishyapti, boshqa bir qismi esa folbinlarning daraxti[76] tomonidan yaqinlashyapti, — dedi yana Gal.

³⁸— Katta ketib: “Abumalek kim boʻpti biz unga xizmat qilsak?” deb gapirgan sen emasmiding?! — dedi shunda Zabul, — sen mana shu lashkarni mazax qilgan eding — ku. Qani, boʻl, endi chiqib ular bilan jang qil.

³⁹Shakam beklari Gal boshchiligida chiqib, Abumalekka qarshi jang qilishdi.

⁴⁰Abumalek Galni quvib ketdi, ammo Gal qochib qoldi. Oʻsha kuni Shakam sipohlarining koʻplari halok boʻldi, butun jang maydoni to shahar darvozasigacha jasadlarga toʻldi.

⁴¹Abumalek Armaxda[77] oʻrnashdi, Zabul esa Galni barcha qarindoshlari bilan Shakamdan quvib yubordi. Ular endi Shakamda yashay olmas edilar.

⁴²Ertasi kuni Shakamliklar yumushlarini bajarmoq uchun dalalarga chiqmoqchi ekanligidan Abumalek xabardor boʻldi.

⁴³U lashkarini uch qismga boʻldi. Lashkar dalalardagi qirlarda pisib yotdi. Abumalek shahardan chiqib kelayotgan odamlarni koʻrib, lashkari bilan ularga hamla qildi.

⁴⁴Lashkarning bir qismi Abumalek boshchiligida shahar darvozasini qoʻlga kiritdi. Ular shahar darvozasi oldidan siljimadilar. Lashkarning qolgan ikki qismi esa daladagi odamlarga hujum qilib, ularni qirib tashladi.

⁴⁵Oʻsha kuni Abumalek kun boʻyi shaharga qarshi jang qildi. Oxiri shaharni qoʻlga oldi. U yerdagi hamma odamni qatl qildi. Shaharni esa vayron qilib, ustidan tuz sochib tashladi[78].

⁴⁶Shakam qal’asining beklari buni eshitgach, oʻsha yerdagi Baal — Berit[79] uyining qoʻrgʻoniga kirib, bekinib oldilar.

⁴⁷Beklarning hammasi qoʻrgʻonda ekanligidan xabardor boʻlgan Abumalek

⁴⁸lashkari bilan Zalmon togʻining[80] tepasiga chiqdi. Qoʻlidagi bolta bilan bir bogʻlam oʻtin kesib, orqasiga ortib oldi. Soʻng lashkariga: “Qani, sizlar ham xuddi shunday qilinglar”, deb buyurdi.

⁴⁹Sipohlarning har biri bir bogʻlamdan oʻtin kesib oldi. Ular Abumalekka ergashib oʻtinlarni qoʻrgʻonning atrofiga terib chiqdilar, soʻng qal’aga oʻt qoʻydilar. Qal’adagi hamma odamlar halok boʻldi. U yerda mingtacha ayol va erkak kishi bor edi.

⁵⁰Shundan soʻng Abumalek Tavoz shahriga yoʻl oldi. Shaharni qamal qilib, qoʻlga kiritdi.

⁵¹Ammo shaharning ichida juda baland bir qoʻrgʻon bor edi. Shahardagi ayolu erkaklar, hamma shahar beklari oʻsha qoʻrgʻon ichiga qochib kirishdi. Ular eshiklarni tambalab, tomga chiqib olishdi.

⁵²Abumalek qoʻrgʻondagilarga qarshi jang qildi, unga oʻt qoʻymoqchi boʻlib, yoniga bordi.

⁵³Shu payt bir ayol tepadan tegirmon toshini uloqtirib, Abumalekning boshini yorib yubordi.

⁵⁴Jon talvasasida Abumalek qurolbardorini yoniga chaqirib: — Boʻl, qilichingni sugʻurib meni oʻldir, — dedi, — yana odamlar: “Uni ayol kishi oʻldirdi”, deb yurishmasin. Shunda yigit qilich suqib, Abumalekni oʻldirdi.

⁵⁵Odamlar Abumalekning oʻlganini koʻrib uylariga tarqalib ketishdi.

⁵⁶Otasiga xiyonat qilib, yetmishta aka — ukasini oʻldirgan Abumalekni Xudo shu yoʻsinda jazolagan edi.

⁵⁷Shuningdek, Shakamliklarning ham qilgan qabihliklari uchun ta’zirini bergan edi. Ular Gidoʻn oʻgʻli Yoʻtomning qargʻishiga yoʻliqdilar.