Read Uzbek Muqaddas Kitob 2 Yuhanno 1 Bible Online

2 Yuhanno 1 - Uzbek Muqaddas Kitob bible

2 Yuhanno 1

¹Xudo tanlab olgan aziz xonim va uning bolalariga[3] men — oqsoqoldan[4] salom! Men sizlarni chin dildan yaxshi koʻraman, mengina emas, haqiqatni bilib olganlarning hammasi sizlarni yaxshi koʻradi.

²Bu sevgiga dilimizdan joy olgan va to abad biz bilan boʻladigan haqiqat asos boʻldi.

³Biz haqiqat va sevgi boʻyicha yashar ekanmiz, Otamiz Xudo va Otamizning Oʻgʻli Iso Masih beradigan inoyat, marhamat va tinchlik bizga[5] doim yor boʻladi.

⁴Hurmatli xonim, farzandlaringizning bir nechtasi Otamiz Xudoning bizga bergan amrini[6] bajarib, haqiqat yoʻlida yurayotgan ekanlar. Men bundan gʻoyat xursand boʻldim.

⁵Sizdan bir iltimosim bor, bir — birimizni yaxshi koʻraylik. Sizga yangi amrni yozayotganim yoʻq, bu amr bizga boshidan berilgan.

⁶Sevgi — biz Xudoning amrlariga amal qilishimizdan iborat. Sizlar bu amrni boshidan eshitgansizlar va unga amal qilib yashashingiz kerak.

⁷Bularni yodingizda tutinglar, chunki dunyoda yolgʻonchilar koʻpayib ketgan. Iso Masih inson boʻlib kelganini ular tan olmaydilar[7]. Ularning har biri yolgʻonchi va Masihning dushmanidir![8]

⁸Shunday ekan, ogoh boʻlinglar! Mukofotingizni toʻliq olish uchun Masihga boʻlgan haqiqiy imoningizni[9] mahkam tutinglar.

⁹Masih ta’limotini ortda qoldirib, oʻzicha “jadallab ketgan” odamda Xudo yoʻq. Masih ta’limoti boʻyicha yashagan odamda esa Ota ham, Oʻgʻil ham bor.

¹⁰Agar biror kishi oldingizga kelib, sizlarga boshqacha ta’limotni oʻrgatsa, uni uyingizga kiritmanglar, taklif ham qilmanglar.

¹¹Agar uni taklif qiladigan boʻlsangiz, uning yomon ishlariga sherik boʻlgan hisoblanasiz.

¹²Sizlarga aytadigan gapim koʻp, ammo bularni siyoh bilan qogʻozga yozishni istamadim. Undan koʻra, oldingizga borib, sizlar bilan yuzma — yuz gaplashaman, deb umid qilaman. Shunda shodligimiz[10] tugal boʻladi.

¹³Xudo tanlab olgan aziz singlingizning bolalari[11] sizlarga salom yoʻllashyapti[12].