Read Uzbek Muqaddas Kitob Yahudo 1 Bible Online

Yahudo 1 - Uzbek Muqaddas Kitob bible

Yahudo 1

¹Iso Masihning quli va Yoqubning ukasi men — Yahudodan[1], Xudoning xalqi boʻlishga da’vat qilingan birodarlarga salom! Otamiz Xudo sizlarni Iso Masih kelishiga qadar[2] Oʻz mehr — muhabbati panohida omon saqlaydi[3].

²Xudo sizlarga cheksiz marhamat, tinchlik va mehr — oqibat ato qilsin.

³Azizlarim, hammamiz birgalikda bahra olayotgan najotimiz haqida men sizlarga yozishni juda xohlagan edim. Ammo buning oʻrniga sizlarni: “Imonimizni himoya qilaylik”, deb undamoqchiman. Axir, Xudo bu oʻzgarmas imonni aziz xalqiga to abad topshirgan.

⁴Gap shundaki, ba’zi betavfiq odamlar orangizga oʻgʻrincha kirib olibdilar. Ular oʻz axloqsizligini oqlash uchun Xudoyimizning inoyati haqidagi xabarni buzib oʻrgatyaptilar. Yagona Xoʻjayinimiz[4] va Rabbimiz Iso Masihni rad etyaptilar. Oʻsha betavfiqlarning jazosi azaldanoq yozilgandir[5].

⁵Bunday odamlarning qismati nima boʻlishini oʻzlaringiz yaxshi bilasizlar. Bularni sizlarga yana bir bor eslatmoqchiman: Egamiz Oʻz xalqi Isroilni Misrdagi qullikdan qutqargandi. Keyinroq esa ishonmagan odamlarni halok qilgan edi[6].

⁶Shuningdek, oʻz mavqeiga yarasha ish tutmay, makonini tashlab ketgan farishtalarni[7] ham Egamiz qorongʻi zimistonga abadiy zanjirband qilgandi. Ularni buyuk qiyomat kunigacha oʻsha yerda saqlab turibdi.

⁷Oʻsha farishtalar singari, Sadoʻm va Gʻamoʻra shaharlari[8] aholisi, shuningdek, bular atrofidagi barcha shaharlar aholisi ham notabiiy buzuq ehtiroslarga va shahvoniy hirsga berilgan edilar. Oqibatda esa abadiy oʻtda kuyib, oʻz jazosini olganlar. Ularning qismati hammaga saboq boʻldi.

⁸Shunga qaramay, oramizga kirib olgan betavfiqlar oʻz vahiylariga tayanib, badanlarini harom etyaptilar. Xudoning hokimiyatini rad etib, samoviy mavjudotlarni haqorat qilyaptilar[9].

⁹Esingizda boʻlsa, bosh farishta Mikoyil iblis bilan Musoning jasadi borasida bahslashgandi[10]. Ammo Mikoyil shunda ham iblisni haqoratlab, hukm qilishga jur’at etmadi, u Xudoning hokimiyatini e’zozlagan holda, faqat: “Egamning Oʻzi seni hukm qilsin”, — deb aytgan edi, xolos.

¹⁰Oʻsha betavfiqlar esa Xudoning qonunini tushunmaydilar, tushunmaganlari uchun ham oʻsha qonunni mensimaydilar. Ular oʻzlarini ongsiz hayvonlarday tutib, ehtiroslarga berilib yashashdan boshqa hech narsani bilmaydilar. Buning natijasida halokatga yoʻliqadilar.

¹¹Bu soxta ustozlarning holiga voy! Axir, ular Qobilning[11] izidan boryaptilar. Pulga berilib, boshqalarni Balomga[12] oʻxshab yoʻldan uryaptilar. Koʻrax[13] singari isyon koʻtarib, halokatga yuz tutyaptilar.

¹²Bu odamlar jamoatingizni ham halokatga yoʻliqtiradilar[14]. Ular faqat oʻzini boqadigan choʻponlarga oʻxshaydi. Sizlar taom yeyish uchun birga yigʻilganingizda, Rabbimiz Isoni xotirlash uchun non sindirganingizda, ular uyalmay, ochkoʻzlik bilan qorinlarini toʻydiradilar. Ular shamol haydagan yomgʻirsiz bulutlarga oʻxshaydilar, mavsumida meva bermaydigan daraxtlar kabidirlar. Bu ustozlar qoʻporib tashlangan daraxtlarday oʻlikdirlar.

¹³Ular dengizning vahshiy toʻlqinlari kabi joʻsh uradi[15], sharmandali ishlarini iflos koʻpikday yuzaga chiqarib, atrofga sochadi. Ular tayyorlab qoʻyilgan qop — qorongʻi zulmatga adashgan yulduzlarday[16] abadiy gʻarq boʻlishadi.

¹⁴Odam Atodan boshlab, yettinchi[17] avlodda yashagan Xanoʻx[18] bu odamlar haqida shunday bashorat qilgan[19]: “Rabbimiz ming — minglab muqaddas malaklari bilan keladi.

¹⁵U jamiki odamzodni hukm qiladi. Gunohga botgan betavfiqlarni mahkum etadi, Yaramas qilmishlari uchun, Uni haqoratlaganlari uchun Betavfiqlarni jazolaydi.”

¹⁶Oramizga kirib olgan bu betavfiqlar, qachon qaramang, mingʻirlab nolib yuradilar. Ular faqat oʻz nafsini oʻylab ish tutadilar, maqtanadilar, oʻz manfaatini koʻzlab, tilyogʻlamalik qiladilar.

¹⁷Sizlar esa, ey azizlarim, Rabbimiz Iso Masihning havoriylari aytgan bashoratlarni[20] esingizda tutinglar.

¹⁸Axir, ular sizlarni quyidagicha ogohlantirishgan: “Oxirgi zamonda shunday odamlar boʻladiki, ular faqat oʻz nafsini qondirish bilan ovora boʻlishadi, haqiqatga itoat qiluvchilarni mazax qilishadi.”

¹⁹Muqaddas Ruhga ega boʻlmagan bu betavfiq ustozlar inson tabiatiga qul boʻlib yashaydilar, orangizga nizo urugʻini sochadilar.

²⁰Sizlar esa, ey azizlarim, qutlugʻ imoningizga tayanib hayot kechiringlar. Muqaddas Ruh ilhomi bilan ibodat qilinglar.

²¹Xudoning sevgisi panohida boʻlib, oʻzingizni asranglar. Rabbimiz Iso Masihning kelishini kutinglar. U kelib, Oʻz marhamati tufayli bizga abadiy hayot ato qiladi.

²²Ikkilanuvchi birodarlaringizga rahmdil boʻlib[21],

²³ularni qutqaringlar. Ana shunda sizlar bunday odamlarni qiyomat alangasidan chiqarib olganday boʻlasizlar. Oʻz bilganidan qaytmaganlarga esa achininglar[22]. Biroq ehtiyot boʻlinglar, ularning qabih qilmishlaridan hazar qilinglar. Ularning hatto kiyimi ham sizlar uchun harom va jirkanchlidir.

²⁴Imondan qaytib ketishdan sizlarni faqatgina Xudo asray oladi. U sizlarni begʻubor va shod — xurram qilib, Oʻzining ulugʻvor huzuriga olib kirishga qodir.

²⁵Bizni Iso Masih orqali qutqargan yakkayu yagona najotkorimiz Xudoga[23] hamdlar boʻlsin! Azaldan, hozir va to abad salobatli, kuch — qudratli, saltanat Sohibi boʻlgan Xudoga shon — sharaflar boʻlsin! Omin.