Read Uzbek Muqaddas Kitob Vahiy 12 Bible Online

Vahiy 12 - Uzbek Muqaddas Kitob bible

Vahiy 12

¹Osmonda ajoyib bir alomat roʻy berdi: quyoshga burkangan bir ayol paydo boʻldi. Uning oyoqlari ostida oy va boshida oʻn ikki yulduzli toj bor edi.

²Ayol homilador boʻlib, uni toʻlgʻoq tutar, dard bilan baqirar edi.

³Soʻngra osmonda boshqa bir alomat koʻrindi: yetti boshli, oʻnta shoxli ulkan qizil ajdarho paydo boʻldi. Uning har bir boshida bittadan toji bor edi.

⁴U dumi bilan osmondagi yulduzlarning uchdan bir qismini sudrab, yerga uloqtirdi. Ajdarho toʻlgʻoq tutgan ayolning oldiga turib oldi. Chaqaloq tugʻilishi bilanoq ajdarho uni yutib yubormoqchi edi.

⁵Ayol oʻgʻil koʻrdi. Kelajakda barcha xalqlarni temir xivchin bilan boshqaradigan[62] bu oʻgʻlon darhol olib ketildi. U Xudoning huzuriga, taxtga keltirildi.

⁶Ayol esa choʻlga qochib bordi. U yerda 1260 kun davomida ayolga gʻamxoʻrlik qilishsin deb, Xudo maxsus joy hozirlab qoʻygan edi.

⁷Shundan keyin samoda jang boshlandi. Mikoyil[63] va uning farishtalari ajdarhoga qarshi chiqishdi. Ajdarho ham oʻzining farishtalari bilan Mikoyilga qarshi jang qildi.

⁸Ammo ajdarho talafot koʻrdi. Unga va uning farishtalariga endi samoda joy yoʻq edi.

⁹Ulkan ajdarho yerga uloqtirildi. Butun dunyoni aldagan bu almisoq ilon iblis va shayton deb atalgan. U oʻz farishtalari bilan yerga uloqtirildi.

¹⁰Shunda men samodan baland ovozda aytilgan bu soʻzlarni eshitdim: “Xudoyimiz najotu qudratini ayon qildi, Mana, Uning Shohligi keldi. Xudoning Masihi hokimiyati oʻrnatildi. Axir, birodarlarimizning tuhmatchisi yerga uloqtirildi, Ha, Xudoyimiz huzurida kecha — kunduz Ularga tuhmat qilayotgan iblis pastga otildi.

¹¹Ular Qoʻzining qoni tufayli, Oʻzlarining shahodat soʻzi tufayli iblisni yengdilar. Hatto oʻlim xavfi ostida boʻlganlarida jonlarini ayamadilar.

¹²Ey osmonu falak, xursand boʻl! Unda yashovchilar, shodlaning! Ammo, ey yeru dengiz, sizning holingizga voy! Zero, iblis oldingizga tushdi. Vaqti oz qolganini bilib, u qahru gʻazabga mindi.”

¹³Ajdarho oʻzining yer yuziga uloqtirilganini anglagach, oʻgʻil bola tuqqan ayolni ta’qib qila boshladi.

¹⁴Ayol oʻsha ilondan qocha olishi uchun unga katta burgutning ikki qanoti berildi. U sahroga — uch yarim yil[64] davomida unga gʻamxoʻrlik qilinadigan joyga qochib borishi kerak edi.

¹⁵Ilon esa, uni sel oqizib ketsin deb, ogʻzini ochdi — da, ayolning ketidan daryoday suv oqizdi.

¹⁶Ammo yer ayolga yordam berdi. Yer dahanini ochib, ajdarho oqizgan daryoni yutib yubordi.

¹⁷Ajdarho ayoldan qattiq gʻazablandi. U ayolning boshqa farzandlari bilan jang qilgani chiqdi. Ayolning farzandlari — Xudoning amriga itoat qilgan va Isoning shahodatiga sodiq qolgan odamlardir.