Read Uzbek Muqaddas Kitob Vahiy 15 Bible Online

Vahiy 15 - Uzbek Muqaddas Kitob bible

Vahiy 15

¹Men samoda buyuk va hayratga soladigan boshqa bir alomatni koʻrdim. Samoda yettita farishta turardi, har birining qoʻlida bittadan balo bor edi. Bu balolar soʻnggi balolar boʻlib, Xudo gʻazabini yakunlar edi.

²Men goʻyo olov aralash oynaday boʻlgan bir dengizni koʻrdim. Uning yonida odamlar turgan edi. Ular maxluq ustidan, uning tasviri va nomini bildirgan son[77] ustidan gʻalaba qozongan edilar. Ularning qoʻllarida Xudo bergan arfalar bor edi.

³Ular Xudo quli Musoning va Qoʻzining qoʻshigʻini[78] kuylardilar: “Yo Qodir Xudo — Egamiz, Buyuk va ajoyibdir Sening ishlaring. Ey xalqlarning Shohi! Toʻgʻri va haqdir Sening yoʻllaring.

⁴Ey Egamiz, Sendan qoʻrqmaydigan bormi?! Nomingni ulugʻlamaydigan bormi?! Axir, yolgʻiz Oʻzing muqaddasdirsan. Jamiki xalqlar huzuringga keladilar, Ular Senga sajda qiladilar. Zero, odil hukmlaring hammaga ayon boʻldi.”

⁵Shundan soʻng men samoviy Ma’badning Eng muqaddas xonasi[79] ochilganini koʻrdim.

⁶Ma’baddan yetti baloni tutgan yettita farishta chiqdi. Ularning egnida toza, oppoq zigʻir liboslar bor edi, koʻksilariga oltin tasmalar bogʻlangan edi.

⁷Toʻrtta mavjudotdan biri bu yetti farishtaga yettita oltin kosani berdi. Bu kosalar to abad barhayot Xudoning gʻazabi bilan toʻlgan edi.

⁸Ma’bad Xudoning ulugʻvorligi va qudrati tutuniga toʻlib ketdi. Yetti farishtaning yetti balosi tamom boʻlmaguncha, hech kim Ma’badga kira olmadi.