Read Uzbek Muqaddas Kitob Vahiy 17 Bible Online

Vahiy 17 - Uzbek Muqaddas Kitob bible

Vahiy 17

¹Yettita kosani tutgan yetti farishtadan biri kelib, menga shunday dedi: “Bu yoqqa kel, men senga mashhur fohishaning oladigan jazosini koʻrsataman. Fohisha timsolidagi bu buyuk shahar[83] serob suvlar boʻyida joylashgan[84].

²Yer yuzining shohlari u bilan zino qilardi, yer yuzida yashayotganlar uning fahshu zino sharobidan ichib, mast boʻlishardi.”

³Muqaddas Ruh meni qamrab oldi, farishta meni choʻlga olib bordi. U yerda men qip — qizil maxluq[85] ustida oʻtirgan bir ayolni koʻrdim. Maxluqning hamma yogʻiga kufrona nomlar yozilgandi, uning yettita boshi va oʻnta shoxi bor edi.

⁴Ayol safsar va qip — qizil liboslar kiygan, oltin, javohir va marvaridlar bilan bezangandi. Uning qoʻlida oltin kosa bor edi, bu kosa jirkanchli narsalarga, fahshu haromliklarga toʻlib — toshgan edi.

⁵Ayolning peshanasiga sirli ma’noga ega boʻlgan shunday bir ism yozilgandi: “Buyuk Bobil — fohishalarning va yer yuzidagi jirkanch ishlarning onasidir.”

⁶Men ayolning Xudo azizlari qonidan, ya’ni Iso shohidlari qonidan mast boʻlganini koʻrdim. Uni koʻrib, gʻoyat darajada hayron qoldim.

⁷Farishta menga dedi: “Nega hayron boʻlasan? Men senga ayolning va u mingan yetti boshli, oʻn shoxli maxluqning sirini aytib beraman.

⁸Sen koʻrgan bu maxluq qachonlardir bor edi, endi esa yoʻq. U koʻp oʻtmay tubsiz chuqurlikdan chiqadi va mahv etiladi. Dunyo yaratilishidan oldin ismlari hayot kitobiga[86] yozilmagan yer yuzidagi hamma odamlar maxluqni koʻrib, hayron qoladilar. Chunki bu maxluq bor edi, hozir yoʻq, ammo yana keladi.

⁹Bularni anglamoq uchun aqlu idrok darkor. Maxluqning yetti boshi — ayol oʻtirgan yettita tepalikning timsolidir.

¹⁰Bu yetti bosh yettita hukmdorni ham bildiradi. Bularning beshtasi qulagan, bittasi hozir hukmronlik qilyapti, boshqasi esa hali kelgani yoʻq. U kelganda ham koʻp vaqt turmaydi.

¹¹Ilgari bor, hozir yoʻq maxluq esa yettita hukmdordan biri boʻla turib, sakkizinchi hukmdor sifatida qaytib keladi va mahv etiladi.

¹²Sen koʻrgan maxluqning oʻnta shoxi hali taxtga oʻtirmagan boshqa oʻnta hukmdorni bildiradi. Ular qisqa vaqt davomida maxluq bilan birga hukmronlik qiladilar.

¹³Bu hukmdorlar birlashib, oʻzlarining qudrati va hokimiyatini maxluqqa topshiradilar.

¹⁴Ular Qoʻziga qarshi jang qiladilar. Ammo Qoʻzi Oʻzining da’vat etilgan, tanlangan va sodiq izdoshlari bilan ularni yengadi. Axir, Qoʻzi hukmdorlarning Hukmdori, shohlarning Shohidir.”

¹⁵Farishta menga yana shunday dedi: “Sen fohishaning suvlar boʻyida oʻtirganini koʻrding. Bu suvlar toʻda — toʻda elatlarni, xalqlaru millatlarni bildiradi.

¹⁶Sen koʻrgan oʻnta shox va maxluq fohishadan nafratlanadilar. Uni xonavayron qilib, yalangʻoch qoldiradilar. Uning etini yeydilar, qoldiqlarini esa olovda yondiradilar.

¹⁷Xudoning aytgan soʻzlari amalga oshmaguncha, oʻnta hukmdor birlashib, oʻz hokimiyatini maxluqqa topshiradilar. Zero, bu maqsadni ularning diliga Xudoning Oʻzi solgan.

¹⁸Sen koʻrgan ayol — yer yuzi shohlari ustidan hukmronlik qiladigan buyuk shahardir.”