Read Uzbek Muqaddas Kitob Vahiy 2 Bible Online

Vahiy 2 - Uzbek Muqaddas Kitob bible

Vahiy 2

¹“Efesdagi imonlilar jamoatining farishtasiga[12] yoz: Yetti yulduzni oʻng qoʻlida tutguvchi, yettita oltin chiroqpoya orasida yuruvchi Zot shunday demoqda:

²sening ishlaringni, mehnatingni, bardoshingni bilaman, badkirdorlarga toqat qilmasligingni ham bilaman. Havoriy boʻlmagan holda oʻzlarini havoriy deb aytganlarni sen sinading, ularning yolgʻonini fosh qilding.

³Ha, bardoshlisan. Mening nomim uchun koʻp qiyinchiliklarni boshdan kechirib, holdan toymading.

⁴Biroq senga bir e’tirozim bor: sen Menga boʻlgan ilk sevgingni unutding.

⁵Eslagin axir, ilk sevgi bilan yashaganingda qanchalar yuksakda eding! Endi esa tavba qil, avvalgi ishlaringga qayt. Tavba qilmasang oldingga borib, chiroqpoyangni oʻz joyidan olib tashlayman.

⁶Ha, senda yana bir yaxshi fazilat bor: sen nikolaschilarning[13] ishlaridan nafratlanasan. Men ham ulardan nafratlanaman.

⁷Kimning eshitar qulogʻi boʻlsa, Ruhning jamoatlarga aytayotgan gaplarini eshitsin. Gʻolib kelganlarga Xudoning jannatidagi hayot daraxti[14] mevasidan yeyishni nasib etaman.”

⁸“Smirnadagi[15] imonlilar jamoatining farishtasiga yoz: Oʻlib tirilgan, Birinchi va Oxirgi boʻlgan Zot shunday demoqda:

⁹chekkan azoblaringni[16], kambagʻalligingni bilaman. Aslida esa boysan! Oʻzini Xudoning xalqi deb ataganlar seni qanchalar haqoratlaganini ham bilaman. Ular Xudoning xalqi emas[17], balki shayton toʻdasidir.

¹⁰Boshingga tushadigan azob — uqubatlardan qoʻrqma! Bilginki, iblis sizlarni sinash uchun orangizdan ba’zilarni zindonga tashlaydi, oʻn kun[18] davomida azob chekasizlar. Oʻlim xavfi ostida boʻlganingda ham sodiq qol, shunda Men senga hayot tojini beraman.

¹¹Kimning eshitar qulogʻi boʻlsa, Ruhning jamoatlarga aytayotgan gaplarini eshitsin. Gʻolib kelganlar ikkinchi oʻlimdan[19] hech qanday zarar koʻrmaydilar.”

¹²“Pergamondagi imonlilar jamoatining farishtasiga yoz: Oʻtkir dudama qilich Sohibi shunday demoqda:

¹³qayerda yashayotganingni[20] bilaman. Shahringda shaytonning taxti joylashgan[21]. Shunday boʻlsa — da, sen Mening nomimga qattiq bogʻlanding. Shayton yashayotgan oʻsha shahringda sodiq shohidim Antipas[22] oʻldirilganda ham, sen Menga boʻlgan imoningdan qaytmading.

¹⁴Lekin senga bir oz e’tirozim bor: orangizda Balom ta’limotiga rioya qiluvchilar bor. Balom[23] Isroil xalqini yoʻldan ozdirish yoʻlini Boloqqa oʻrgatgandi. Boloq esa Isroil xalqini butlarga keltirilgan qurbonlik goʻshtini yeyishga va fahsh — zinoga undagandi.

¹⁵Shuningdek, orangizda nikolaschilar[24] ta’limotiga ergashuvchilar ham bor.

¹⁶Endi tavba qil! Aks holda, Men zudlik bilan oldingga borib, ogʻzimdagi qilich bilan oʻshalarga qarshi jang qilaman.

¹⁷Kimning eshitar qulogʻi boʻlsa, Ruhning jamoatlarga aytayotgan gaplarini eshitsin. Gʻolibga Men pinhon saqlangan mannani[25] beraman. Unga oq toshni[26] ham beraman. Bu toshning ustiga yangi bir ism yozilgan, toshni olgan kishidan boshqa hech kim u ismni bilmaydi.”

¹⁸“Tiyatiradagi imonlilar jamoatining farishtasiga yoz: Koʻzlari otash alangasiday chaqnoq, oyoqlari qizdirilgan bronzaday yarqiroq Xudoning Oʻgʻli shunday demoqda:

¹⁹sening ishlaring, sevging, imoning, xizmating va bardoshingni bilaman. Hozirda oldingidan ham koʻproq ish qilayotganingni bilaman.

²⁰Lekin senga bir e’tirozim bor: sen Izabel[27] degan boʻlmagʻur ayolga toqat qilib yuribsan. U oʻzini paygʻambar deb, ta’limoti bilan qullarimni yoʻldan ozdiryapti. Ularni fahsh — zino qilishga va butlarga keltirilgan qurbonlik goʻshtini yeyishga undayapti.

²¹Fahsh — zinodan tavba qilishi uchun unga muhlat berdim, ammo u tavba qilishdan bosh tortyapti.

²²Shunday ekan, Men uni xasta qilib, toʻshakka yotqizib qoʻyaman. U bilan birga fahsh — zino qilganlarni ham, bordi — yu, uning yoʻlidan qaytmasalar, qattiq azob — uqubatlarga duchor qilaman.

²³Uning izdoshlarini[28] oʻldiraman. Onglarni va yuraklarni bilguvchi Men ekanligimni shunda hamma jamoatlar bilib oladilar. Men orangizdagi har bir kishini oʻz qilmishiga yarasha jazolayman.

²⁴Tiyatiradagi ba’zilaringiz Izabelning bu ta’limotiga ergashmadingiz. Sizlar «shaytonning sirlari»[29] deb atalgan narsalardan bexabarsizlar. Sizlarga shundan boshqa hech narsa yuklamayman:

²⁵faqat Men kelgunimga qadar, imoningizda qattiq turinglar, deyman.

²⁶Gʻolib kelganlarga va oxirigacha Mening irodamni bajarganlarga xalqlar ustidan hokimiyat beraman.

²⁷Ular xalqlarni temir xivchin ila boshqarishadi. Sopol koʻzani sindirganday xalqlarni parchalashadi[30]. Otam Xudo Menga ato qilgan bu hokimiyat ularda boʻladi.

²⁸Men ularga tong yulduzini[31] ham beraman.

²⁹Kimning eshitar qulogʻi boʻlsa, Ruhning jamoatlarga aytayotgan gaplarini eshitsin.”