Read Uzbek Muqaddas Kitob Vahiy 22 Bible Online

Vahiy 22 - Uzbek Muqaddas Kitob bible

Vahiy 22

¹Farishta menga billurday tiniq, hayotbaxsh suvlar daryosini koʻrsatdi. Bu daryo Xudoning va Qoʻzining taxtidan chiqib,

²shahar koʻchasi boʻylab oqayotgan edi. Daryoning ikkala qirgʻogʻida ham hayot daraxti bor edi. Bu daraxt yilda oʻn ikki marta, har oy hosil beradi. Daraxtning barglari xalqlarga shifo baxsh etadi.

³La’nat degan narsa u yerda qolmaydi. Shaharda Xudoning va Qoʻzining taxti boʻladi, Xudoning qullari Unga xizmat qiladi.

⁴Ular Xudoning jamolini koʻradi. Xudoning ismi ularning peshanalariga yoziladi.

⁵U yerda boshqa tun boʻlmaydi. Chiroqqa ham, quyoshga ham ehtiyoj qolmaydi. Axir, Egamiz Xudo ularga nur sochadi, ular esa to abad hukmronlik qiladi.

⁶Farishta menga shunday dedi: “Bu soʻzlar ishonchli va toʻgʻridir. Paygʻambarlarni ruhlantirgan Egamiz Xudo Oʻz qullari oldiga farishtasini yubordi. Toki farishta yaqin orada yuz berishi muqarrar boʻlgan voqealarni ularga bildirsin.”

⁷Masih shunday demoqda: “Men tezda kelaman! Bu kitobning bashorat soʻzlariga Amal qilganlar baxtlidir!”

⁸Men, Yuhanno, bularni koʻrdim va eshitdim. Bularni koʻrib eshitganimdan keyin, bu narsalarni menga koʻrsatgan farishtaga sajda qilmoqchi boʻlib, oʻzimni uning oyoqlariga tashladim.

⁹Ammo u menga dedi: “Zinhor bu ishni qilma! Men sening hamkoringman, shuningdek, paygʻambar birodarlaringning va bu kitobdagi soʻzlarga rioya qiluvchilarning hamkoriman. Xudoga sajda qil!”

¹⁰Keyin menga yana shunday dedi: “Bu kitobning bashorat soʻzlarini sir saqlama, chunki vaqt yaqindir.

¹¹Badkirdorlar yomonligini qilaversin. Ifloslar iflosligini davom ettiraversin. Solihlar esa toʻgʻri ish qilishdan toʻxtamasin, muqaddas odamlar oʻzini muqaddas saqlasin.”

¹²Masih shunday demoqda: “Men tez kelaman, mukofotim Oʻzim bilan. Har kimga qilmishiga yarashasini beraman.

¹³Men Ibtido va Intihodirman[108], Birinchi va Oxirgi, Boshi va Poyonidirman.”

¹⁴Liboslarini yuvganlar[109] naqadar baxtlidir! Ular hayot daraxti mevasidan yeyishga, shahar darvozalaridan kirishga haqli boʻladilar.

¹⁵Hamma “koʻppaklar” — jodugarlar, axloqi buzuqlar, qotillar, butparastlar, yolgʻonga ruju qoʻyib, hiyla ishlatganlar esa tashqarida qoladilar.

¹⁶“Men, Iso, Oʻz farishtamni oldingizga yubordim, Toki u bular toʻgʻrisida jamoatlarimga shahodat bersin. Men Dovud ildizidan chiqqan Zotdirman[110], uning zurriyotiman, Yorugʻ tong yulduziman.”

¹⁷Ruh ham, kelin ham: “Kel!” — deb chorlayapti. Ushbu bashorat soʻzlarni tinglayotgan kishi[111] ham: “Kel!” — deb aytsin. Kim chanqagan boʻlsa, kelsin. Kim xohlasa, hayotbaxsh suvdan tekin bahra olsin.

¹⁸Bu kitobning bashorat soʻzlarini eshituvchi har bir kishini ogohlantiraman: kimda — kim bu soʻzlarga biror narsa qoʻshsa, Xudo ham oʻsha kishining jazosiga bu kitobda yozilgan balolarni qoʻshadi.

¹⁹Kimda — kim bu kitobdagi bashorat soʻzlaridan birortasini chiqarib tashlasa, Xudo ham oʻsha kishini bu kitobda yozilgan hayot daraxtidan va muqaddas shahardan benasib qiladi[112].

²⁰Bu gaplarning Shohidi: “Ha, Men tez kelaman!” — deb aytmoqda. Omin! Yo Rabbimiz Iso, kelgin!

²¹Rabbimiz Isoning inoyati barchangizga yor boʻlsin[113].