Read Uzbek Muqaddas Kitob Vahiy 4 Bible Online

Vahiy 4 - Uzbek Muqaddas Kitob bible

Vahiy 4

¹Shundan keyin men osmonda lang ochiq bir eshikni koʻrdim. Ilgari menga gapirgan karnay sadosiga oʻxshash oʻsha ovoz yana eshitildi. U shunday dedi: “Bu yoqqa chiq, bundan keyin nima yuz berishini senga koʻrsataman.”

²Shu payt Muqaddas Ruh meni qamrab oldi. Men samoda turgan bir taxtni koʻrdim, unda bir Zot oʻtirar edi.

³Oʻtirgan Zotning qiyofasi qimmatbaho yashma va la’l toshlariday yarqirardi. Taxt atrofida zumrad tusidagi kamalak jilvalanardi.

⁴Taxtning tevaragida yana yigirma toʻrtta taxt turardi. Bu taxtlarda oq kiyim kiygan, boshlarida oltin tojlari boʻlgan yigirma toʻrt nafar oqsoqol oʻtirar edi.

⁵Taxtdan chaqmoq chaqardi, momaqaldiroqning gulduros sadosi kelardi. Taxt oldida Xudoning yetti ruhi boʻlgan yettita mash’ala yonib turardi.

⁶Taxtning oldida oyna singari dengizga oʻxshash, billurday tiniq bir narsa bor edi. Taxtning atrofida toʻrtta jonli mavjudot turar edi, ularning oldi va orqasi koʻzlar bilan qoplangan edi.

⁷Birinchi mavjudot sherga, ikkinchisi buqaga oʻxshar edi, uchinchi mavjudotning yuzi odamning yuziga, toʻrtinchisi esa uchayotgan burgutga oʻxshar edi.

⁸Bu toʻrtta mavjudotning har birida oltitadan qanot bor edi. Ularning hamma yogʻi koʻzlar bilan qoplangan edi, hatto qanotlarining tagida ham koʻzlari bor edi. Ular kechayu kunduz tinmay shunday soʻzlarni takrorlar edilar: “Muqaddasdir, muqaddasdir, Muqaddasdir Qodir Xudo — Egamiz. U bor boʻlgan, hozir ham bor, Kelajakda ham bor boʻlar!”

⁹Mavjudotlar taxtda Oʻtirganni, to abad barhayot Zotni ulugʻlashardi, izzat — ikrom koʻrsatib, shukronalar aytishardi.

¹⁰Shunda yigirma toʻrt nafar oqsoqol taxtdagi to abad barhayot Zot oldida yerga muk tushib, sajda qilishardi. Tojlarini taxt oldiga qoʻyib, shunday deyishardi:

¹¹“Yo Egamiz, yo Xudoyimiz! Sen qudratlisan! Ulugʻvorligu izzatga Sen loyiqsan! Zero, butun borliqni Sen yaratgansan, Hamma narsa Sening irodang ila vujudga keldi, yaratildi.”