Read Uzbek Muqaddas Kitob Vahiy 5 Bible Online

Vahiy 5 - Uzbek Muqaddas Kitob bible

Vahiy 5

¹Men taxtda oʻtirgan Zotning oʻng qoʻlida bir oʻrama qogʻozni[41] koʻrdim. Oʻramning oldi va orqa tomonlarida yozuvlari bor boʻlib, u yettita muhr bilan muhrlangan edi.

²Soʻng men kuchli bir farishtani koʻrdim. U baland ovozda: “Muhrlarni yechishga, oʻramni ochishga kim loyiq?” deb soʻradi.

³Biroq na osmonda, na yer yuzida, na yer ostidagi olamda oʻramni ocha oladigan yoki ichiga nazar sola oladigan biron kimsa bor edi.

⁴Men achchiq — achchiq yigʻlay boshladim, chunki oʻramni ochishga, hatto uning ichiga nazar solishga loyiq biron kimsa topilmagandi.

⁵Shunda oqsoqollardan biri menga dedi: “Yigʻlama! Ana qara, Yahudo qabilasidan boʻlgan Sher — Dovud urugʻidan chiqqan Zot[42] gʻalaba qozondi. U oʻramning yettita muhrini yechishga va oʻramni ochishga qodirdir.”

⁶Shunda men taxtning oldida, toʻrtta jonli mavjudot va oqsoqollar qurshovida turgan bir Qoʻzini koʻrdim. U goʻyo boʻgʻizlanganday edi. Qoʻzining yetti shoxi va yetti koʻzi bor edi. Bular Xudo butun yer yuziga yuborgan yettita ruhdir.

⁷Qoʻzi kelib, taxtda oʻtirgan Zotning oʻng qoʻlidan oʻramni oldi.

⁸U oʻramni olganda, toʻrtta mavjudot va yigirma toʻrt oqsoqol Qoʻzining oldida muk tushishdi. Har birining qoʻlida bir arfa va xushboʻy tutatqilarga toʻla oltin kosalar bor edi. Xushboʻy tutatqilar — Xudo azizlarining duoyu ibodatlari demakdir.

⁹Ular quyidagicha yangi qoʻshiq aytishar edi: “Sen oʻramni olishga, Uning muhrlarini yechishga loyiqsan! Chunki Sen boʻgʻizlangan eding, Oʻz qoning evaziga har bir qabila, millat, elatu xalqdan Xudo uchun odamlarni qutqarib olding.

¹⁰Ulardan Shohlik yaratding, Ularni Xudoyimizga xizmat qiladigan Ruhoniylar qilib tayinlading. Ular yer yuzida hukm suradilar.”

¹¹Keyin men taxtning, mavjudotlar va oqsoqollarning atrofida koʻp farishtalarni koʻrdim, ularning ovozlarini eshitdim. Ularning sanogʻiga yetib boʻlmas, ming — minglab, oʻn minglab edilar.

¹²Ular baland ovozda shunday derdilar: “Boʻgʻizlangan Qoʻzi hamdlarga loyiqdir! Kuchu davlat, donoligu qudrat Sohibiga Shon — sharaflar boʻlsin!”

¹³Shunda men yeru osmondagi, yer ostidagi, dengizdagi jamiki jonzotlarning ovozlarini eshitdim. Ularning hammasi shunday deb kuylayotgan edilar: “Taxtda oʻtirgan Zotga va Qoʻziga Abadulabad hamdlar boʻlsin! Bu qudrat Sohiblariga Abadulabad shon — sharaflar boʻlsin!”

¹⁴Toʻrtta mavjudot: “Omin!” — dedi. Oqsoqollar esa muk tushib, sajda qildilar[43].