Read Uzbek Muqaddas Kitob Vahiy 9 Bible Online

Vahiy 9 - Uzbek Muqaddas Kitob bible

Vahiy 9

¹Beshinchi farishta karnayini chaldi. Shunda men osmondan yerga tushgan bir yulduzni[49] koʻrdim. Unga jahannam qa’rining kaliti berilgan edi.

²U jahannam qa’rini ochdi. Ulkan oʻchoqdan chiqayotganday, jahannam qa’ridan tutun burqirab chiqdi. Bu tutundan quyosh va havo qorongʻilashib ketdi.

³Tutundan chigirtkalar[50] chiqib, yer yuziga tarqaldi. Ularga yerdagi chayonlarning kuchiga oʻxshash bir kuch berilgan edi.

⁴Chigirtkalarga: “Yer yuzidagi oʻt — oʻlanlarga, bironta oʻsimlik yoki daraxtga tegmanglar”, deb aytilgan edi. Ular faqat peshanalarida Xudoning muhri[51] boʻlmagan odamlarga zarar yetkazishlari mumkin edi.

⁵Odamlarni oʻldirish chigirtkalarga man etilgandi. Ular odamlarga besh oy davomida azob berishlari kerak edi. Bu azob chayon chaqqandagi azobga oʻxshardi.

⁶Oʻsha besh oy davomida odamlar oʻlim izlaydilar, ammo topolmaydilar. Oʻlimni orzu qiladilar, ammo oʻlim ulardan qochadi.

⁷Chigirtkalarning koʻrinishi jangga shaylangan otlarga oʻxshar edi. Ularning boshida oltin tojga oʻxshagan narsalar bor, yuzlari esa odamsimon edi.

⁸Sochlari ayollarning sochiga, tishlari esa arslon tishiga oʻxshar edi.

⁹Koʻkraklari temir sovutday edi. Qanotlarining tovushi esa urushga yelib borayotgan tumonat jang aravalarining tovushini eslatardi.

¹⁰Chayonlarnikiga oʻxshash dumlari va nishlari bor edi. Insonlarga besh oy davomida zarar yetkazish uchun olgan kuch — qudrati oʻsha dumlarida edi.

¹¹Ularga jahannam qa’rining farishtasi hukmronlik qilardi. Bu farishtaning oti ibroniychada Abaddoʻn, yunonchada Apollion, ya’ni “halok qiluvchi” demakdir.

¹²Birinchi halokat oʻtdi, bundan keyin yana ikkita halokat bor.

¹³Oltinchi farishta karnayini chaldi. Shunda men Xudo huzuridagi oltin qurbongohning toʻrtta shoxi[52] tomonidan kelayotgan bir ovozni eshitdim.

¹⁴Bu ovoz karnay tutgan oltinchi farishtaga shunday dedi: “Buyuk Furot daryosi boʻyida bogʻlab qoʻyilgan toʻrt farishtani yechib yubor!”

¹⁵Bu toʻrtta farishta oʻsha soat, oʻsha kun, oʻsha oy va oʻsha yil uchun saqlab kelingan edi. Ular insoniyatning uchdan bir qismini qirib tashlash uchun boʻshatildi.

¹⁶Ular ikki yuz millionlik otliq qoʻshinni boshqarishardi, men ularning sonini eshitdim.

¹⁷Men koʻrgan vahiydagi otlar bilan suvorilarning koʻrinishi quyidagicha edi: suvorilarning sovutlari olovday qizil, toʻq koʻk va oltingugurtday sariq rangda edi. Otlarning boshi arslon boshiga oʻxshar, ogʻizlaridan olov, tutun va oltingugurt otilib chiqardi.

¹⁸Insoniyatning uchdan bir qismi shu uch balodan — olov, tutun va oltingugurtdan oʻldi.

¹⁹Otlarning kuchi ham ogʻzida, ham dumlarida edi. Ularning dumlari ilonlarga oʻxshardi. Bu ilonlar odamlarni chaqib, jarohatlardi.

²⁰Bu balolardan omon qolgan insonlar esa oʻzlari yasagan butlaridan voz kechmadilar, jinlarga sigʻinishdan qaytmadilar. Koʻrmaydigan, eshitmaydigan, yurmaydigan oltin, kumush, bronza, tosh va yogʻoch butlarga sajda qilaverdilar.

²¹Qotilliklaridan, issiq — sovuq qilishdan, fahsh — zino va oʻgʻriliklaridan qaytmadilar.