Read Uzbek Muqaddas Kitob 1 Shohlar 10 Bible Online

1 Shohlar 10 - Uzbek Muqaddas Kitob bible

1 Shohlar 10

¹Soʻngra Shomuil moy idishini olib, Shoulning boshiga moy surtdi. Keyin Shoulni oʻpib, shunday dedi: — Mana, Egamiz senga moy surtib, Oʻz xalqiga hukmdor etib tanladi.

²Bugun mening oldimdan ketganingdan keyin Benyamin hududida, Zilzaxdagi Rohilaning maqbarasi yonida ikki kishiga duch kelasan. Ular senga: “Izlab ketgan eshaklaring topildi, otang endi eshaklarni oʻylamay, balki, oʻgʻlimga nima boʻldi ekan, deb sendan xavotirlanib oʻtiribdi”, deb aytishadi.

³U yerdan yana yoʻlingda davom etib, Tovurdagi muqaddas daraxt oldidan chiqasan. U yerda uchta odamga duch kelasan. Ularning biri uchta uloqcha, biri uchta gardish non, yana boshqasi bir mesh sharob bilan Xudoning huzuriga — Baytilga yoʻl olgan boʻladi.

⁴Ular senga omonlik tilab, ikkita gardish non berishadi. Sen nonlarni ol.

⁵Keyin Filistlar qoʻnolgʻasi joylashgan, Xudoning tepaligi deb atalgan Givoga[43] borasan. Shaharga kirganingda, paygʻambarlar guruhiga duch kelasan. Ular joʻshib zikr tushib, sajdagohdan tushib kelayotgan boʻladilar. Ularning oldilarida arfa, childirma, nay va lira chalib kelayotgan odamlar boʻladi.

⁶Egamiz Ruhi seni ham qamrab oladi. Ular bilan birga sen ham joʻshib zikr tushasan va butunlay boshqa odamga aylanasan.

⁷Bu alomatlar senda namoyon boʻlganda, oʻzingga ma’qul boʻlganini qil. Xudo sen bilan.

⁸Mendan oldin sen Gilgalga bor. Men ham kuydiriladigan qurbonliklar va tinchlik qurbonliklarini nazr qilgani huzuringga boraman. Meni yetti kun kut, yoningga borganimdan keyin nima qilishingni aytaman.

⁹Shoul endi Shomuilning yonidan ketish uchun chogʻlangan ham ediki, Xudo uning yuragini oʻzgartirdi. Oʻsha kuni Shomuil aytgan hamma alomatlar bajo boʻldi.

¹⁰Shoul Givoga kelganda, uni paygʻambarlar guruhi qarshi oldi. Xudoning Ruhi uni qamrab oldi, Shoul ular bilan birga joʻshib zikr tusha boshladi.

¹¹Shoulning doʻstlari buni koʻrib, hayratga tushdilar: — Nima? Nahotki Shoul ham paygʻambar boʻlsa?! Kishning oʻgʻli qanday qilib paygʻambar boʻlib qolibdi?

¹²Qoʻshnilaridan biri e’tiroz bildirdi: — Otasi kimligining ahamiyati yoʻq. Har kim ham paygʻambar boʻlishi mumkin[44]. Shu sababdan ham “Nahotki Shoul ham paygʻambar boʻlsa?!” degan gap aslida oʻshandan qolgan.

¹³Zikr tushish toʻxtagach, Shoul sajdagohga chiqdi.

¹⁴Amakisi Shoul bilan xizmatkoridan: — Qayerlarda qolib ketdingizlar? — deb soʻradi. — Eshaklarni qidirdik, ularni topa olmay, Shomuilning oldiga bordik, — deb javob berdi Shoul.

¹⁵— Shomuil sizlarga nimalar dedi, menga ham ayt — chi, — dedi amakisi.

¹⁶— Eshaklarning topilganini bizga toʻppa — toʻgʻri aytib berdi, — dedi Shoul. Shomuilning shohlikka aloqador soʻzlarini esa amakisiga aytmadi.

¹⁷Shomuil Isroil xalqini Mispaxga[45], Egamizning huzuriga chaqirib,

¹⁸shunday dedi: — Isroil xalqining Xudosi — Egamiz aytmoqda: “Isroil xalqini Misrdan Men olib chiqqanman. Misrliklarning va sizlarga zulm qilgan hamma shohliklarning qoʻlidan sizlarni qutqardim.

¹⁹Ammo bugun butun mashaqqat va zahmatlaringizdan sizlarni qutqaradigan Men, Xudoyingizni rad qildingiz hamda: «Bizga ustimizdan shoh tayinlang», dedingiz. Endi Men, Egangizning huzurida qabila va urugʻlarga boʻlinib tiziling.”

²⁰Shomuil Isroil xalqining hamma qabilalarini birin — ketin oʻz huzuriga chaqirdi. Qur’a tashlab[46], ulardan Benyamin qabilasini tanlab oldi.

²¹Keyin Benyamin qabilasini urugʻlari boʻyicha oldiga chaqirdi. Qur’a tashlab, Matri urugʻini tanlab oldi. Yana qur’a tashlab, Matri urugʻidan Kishning oʻgʻli Shoulni tanlab oldi. Isroil xalqi uni axtarib topa olmadi.

²²Ular Egamizdan: — Oʻsha odam keldimi oʻzi? — deb soʻrashdi. — U shu yerda, anjomlarning orasida yashirinib yuribdi, — degan javob keldi Egamizdan.

²³Odamlar yugurib borib, Shoulni olib kelishdi. Shoul xalqning orasida tikka turgan edi, hamma uning yelkasidan kelar ekan.

²⁴Shomuil butun xaloyiqqa qarata: — Egamiz tanlagan odamni koʻryapsizmi, butun xalq orasida unga teng keladigani topilmaydi, — dedi. Shunda xalq: — Yashasin shoh! — deb hayqirdi.

²⁵Shomuil shohlikning qonun — qoidalarini xalqqa aytib berdi. (Keyinchalik Shomuil bu qonun — qoidalarni kitob holiga keltirib, Egamizning uyiga[47] qoʻydi.) Soʻng hamma odamni uy — uylariga joʻnatib yubordi.

²⁶Shoul ham Givoga — oʻz uyiga ketdi. Xudo ruhlantirgan bir necha kishi unga hamroh boʻldi.

²⁷Ammo ba’zi yaramas odamlar: “U bizni qutqara olarmidi?!” deb Shoulni nazarlariga ilmadi, shu sababdan unga in’omlar tortiq qilishmadi. Shoul esa bilib bilmaslikka olib qoʻya qoldi.