Read Uzbek Muqaddas Kitob 1 Shohlar 11 Bible Online

1 Shohlar 11 - Uzbek Muqaddas Kitob bible

1 Shohlar 11

¹Ommon[48] shohi Naxosh Giladdagi Yobosh shahriga[49] kelib, u yerni qamal qildi. Hamma Yoboshliklar Naxoshga: — Biz sen bilan sulh tuzib, senga itoat etamiz, — deyishdi.

²Ommon shohi Naxosh: — Faqat bir shart bilan sulh tuzaman, — dedi. — Har biringizning oʻng koʻzingizni oʻyib olaman — da, butun Isroil xalqini badnom qilaman.

³Yobosh shahrining oqsoqollari Naxoshga shunday deyishdi: — Bizga yetti kun muhlat ber, Isroilning hamma hududiga xabarchilar joʻnataylik. Agar bizga najot beradigan kimsa chiqmasa, senga taslim boʻlamiz.

⁴Xabarchilar Shoul yashaydigan Givo shahriga kelib, boʻlayotgan voqealarni xalqqa bildirishdi. Hammasi yigʻi — sigʻi qilib, dod — faryod soldi.

⁵Xuddi shu payt Shoul hoʻkizlarini oldiga solib daladan qaytayotgan edi. Shoul: — Odamlarga nima boʻldi? Nega bunchalik yigʻlaydi? — deb soʻradi. Yoboshliklarning joʻnatgan xabarini unga aytib berishdi.

⁶Shoul bu gaplarni eshitgan zahoti, Xudoning Ruhi uni qamrab oldi. Shoul qattiq gʻazablandi.

⁷Bir juft hoʻkizni soʻyib, nimtaladi. Xabarchilar orqali Isroilning hamma tomoniga oʻsha nimtalangan boʻlaklarni joʻnatib, shunday dedi: “Kimki Shoul bilan Shomuilning orqasidan ergashmasa, oʻsha odamning hoʻkizlari ham xuddi shu ahvolga tushadi.” Odamlar Egamizdan qoʻrqqanidan zir titrab, bir yoqadan bosh chiqarib yoʻlga tushdi.

⁸Shoul ularni Bazax shahrida[50] yigʻdi. Isroil urugʻlaridan 300.000, Yahudo urugʻidan esa 30.000 kishi bor edi.

⁹U yerga kelgan Yoboshlik xabarchilarga shunday deyishdi: — Giladdagi Yobosh aholisiga, ertaga peshingacha najot topasizlar, deb aytinglar. Xabarchilar borib, bu gapni yetkazishdi. Yoboshliklar quvonib ketishdi.

¹⁰Naxoshga esa: — Ertaga sizga taslim boʻlamiz, bizga nimani lozim koʻrsangiz, shuni qilavering, — deyishdi.

¹¹Ertasi kuni Shoul odamlarni uch qismga boʻldi. Ular tong payti Ommon lashkarining qarorgohiga bostirib kirishdi. Kunning jazirama issigʻi boshlanguncha, ularni magʻlub qilib boʻlishdi. Omon qolganlari shunday tirqirab qochdiki, hatto biron joyda ikki kishi toʻplanganini uchratib boʻlmasdi.

¹²Isroil lashkari Shomuilning oldiga borib: — “Bizga shohlik qilish Shoulga tushib qolibdimi?” deganlar kimlar edi? Olib keling ularni, oʻldiramiz! — deb qattiq talab qilishdi.

¹³Shoul esa: — Bugun biron kimsa oʻldirilmaydi, chunki Egamiz bugun Isroilga najot berdi, — dedi.

¹⁴— Mayli, Gilgalga boramiz, oʻsha yerda shohlikni yangidan tiklaymiz, — dedi Shomuil xalqqa.

¹⁵Shunday qilib, butun xalq Gilgalga bordi va Egamiz huzurida Shoulning shohligini tasdiqladi. Oʻsha yerda — Egamizning huzurida tinchlik qurbonliklari keltirishdi. Shoul va butun Isroil xalqi rosa xursandchilik qilishdi.