Read Uzbek Muqaddas Kitob 1 Shohlar 12 Bible Online

1 Shohlar 12 - Uzbek Muqaddas Kitob bible

1 Shohlar 12

¹Shundan keyin Shomuil butun Isroil xalqiga dedi: — Menga nima gapirgan boʻlsangiz, hammasiga quloq soldim. Sizlarning ustingizdan bir shoh tayinladim.

²Endi u sizlarga rahnamolik qiladi. Men esa keksaydim, sochim oqardi. Mana, oʻgʻillarim ham sizlar bilan birga. Yoshligimdan buyon shu kungacha sizlarga yoʻlboshchilik qildim.

³Qani, aytinglar — chi, qaysi biringizning hoʻkizingizni oldim? Kimning eshagini tortib oldim? Kimni tovladim? Kimga zulm qildim? Kimdan pora olib, uning ayblarini koʻrib — koʻrmaslikka oldim? Egamizning va U moy surtib tanlagan shohning oldida men haqimda guvohlik bering, sizlardan biror narsa olgan boʻlsam, qaytarib beray.

⁴— Bizni tovlamadingiz, bizga zulm qilmadingiz, biror kimsaning qoʻlidan biron narsa olmadingiz, — dedi xalq.

⁵— Mendan biror nuqson topmaganingizga bugun Egamiz hamda U moy surtib tanlagan shoh guvohdir, — dedi Shomuil. — Ha, ular guvoh boʻlib turibdi, — dedi xalq.

⁶Shomuil gapini davom ettirdi: — Muso bilan Horunni tayin qilgan, ota — bobolaringizni Misr yurtidan olib chiqqan — Egamizdir.

⁷Endi shu yerda turinglar, Egamizning sizlarga va ota — bobolaringizga najot berish uchun qilgan hamma ajoyibotlarining isbotini Uning huzurida sizlarga koʻrsataman.

⁸Yoqub Misrga kelgandan keyin, ota — bobolaringiz Egamizga yolvordi, U esa Muso bilan Horunni yubordi. Ular ota — bobolaringizni Misrdan olib chiqib, bu yerga joylashtirdi.

⁹Ammo ota — bobolaringiz oʻzlarining Egasi Xudoni unutishdi. Shuning uchun Egamiz ularni Xazor shohining lashkarboshisi Sisaroning, Filistlarning va Moʻab shohining qoʻliga topshirdi. Ular ota — bobolaringiz bilan urishishdi.

¹⁰Ota — bobolaringiz Egamizga: “Gunoh ishlar qildik, Sendan yuz oʻgirib, Baal bilan Ashtaretga xizmat qildik, endi bizni gʻanimlarimizning qoʻlidan ozod et, Senga xizmat qilamiz”, deb yolvorishdi.

¹¹Egamiz esa Gidoʻn[51], Baraq[52], Yiftox[53], Shimshoʻn[54] singari hakamlarni[55] yubordi. Bexavotir yashanglar deb, sizlarni boʻysundirgan gʻanimlaringiz qoʻlidan ozod etdi.

¹²Soʻngra Ommon shohi Naxosh sizlarga hujum qilmoqchi boʻlganini koʻrib, qoʻrqib ketdingiz. Oʻz Egangiz Xudo sizlarning shohingiz boʻlsa ham, menga: “Yoʻq, bizni oddiy shoh boshqarsin”, deb turib oldingiz.

¹³Mana, tanlab, tilab olgan shohingiz! Ha, Egamiz ustingizdan hukmronlik qiladigan bir shohni berdi.

¹⁴Egamizdan qoʻrqib, Unga xizmat qilinglar, Uning soʻzlariga quloq solib, amrlaridan boʻyin tovlamanglar. Sizlarga hukmronlik qiladigan shohingiz bilan birga Egangiz Xudoga ergashinglar. Agar shunday qilsangizlar, hammasi yaxshi boʻladi.

¹⁵Egamizning soʻzlariga itoat etmasdan, Uning amrlariga qarshi chiqsangiz, Egamiz ota — bobolaringizni jazolaganiday, sizlarni ham jazolaydi.

¹⁶Endi turgan yeringizda turavering, koʻz oʻngingizda Egamizning ajoyibotini koʻringlar.

¹⁷Hozir bugʻdoy oʻrimi payti, qurgʻoqchilik boshlandi. Men Egamizga iltijo qilaman, U momaqaldiroq guldiratib, yomgʻir yogʻdiradi. Shunday qilib, sizlar bir shoh soʻrash bilan Egamiz oldida qanchalik qabihlik qilganingizni yaxshilab tushunib olasiz.

¹⁸Shomuil Egamizga iltijo qilgan edi, Egamiz oʻsha kuni momaqaldiroq gumburlatib, yomgʻir yogʻdirdi. Jamiki xalq Egamizdan ham, Shomuildan ham juda qoʻrqib ketdi.

¹⁹Ular Shomuilga: — Nobud boʻlmaylik. Biz — qullaringiz uchun oʻz Egangiz Xudoga iltijo qiling, — deyishdi. — Endi bildik, biz bir shoh soʻrab, butun gunohlarimiz ustiga yana gunoh qilibmiz.

²⁰Shomuil xalqqa dedi: — Sizlar bu qilmishlaringiz bilan qabihlik qildilaringiz, lekin endi qoʻrqmanglar, Egamizdan yuz oʻgirmasdan Unga ergashinglar. Unga butun qalbingiz bilan xizmat qilinglar.

²¹Biror kimsaga najot berolmaydigan yaroqsiz butlarning orqasidan ergashmanglar, ular befoyda narsalar — ku, axir.

²²Egamiz sizlarni Oʻzining xalqi qildi. U Oʻzi tanlagan xalqdan yuz oʻgirmaydi. Aks holda, Oʻzining ulugʻ ismini badnom qilgan boʻladi.

²³Endi menga kelsak, albatta Egamizga sizlar uchun ibodat qilaman. Aks holda, Unga qarshi gunoh qilgan boʻlaman. Bundan Xudo saqlasin! Sizlarga faqat toʻgʻri va yaxshi yoʻlni koʻrsataman.

²⁴Faqat Egamizdan qoʻrqinglar, Unga butun qalbingiz bilan ishonib xizmatda boʻlinglar. Qarang, U sizlar uchun qanday ajoyib ishlar qilgan!

²⁵Agarda qabihlik qilaversangizlar, Egamiz sizlarni ham, shohingizni ham yoʻq qiladi.