Read Uzbek Muqaddas Kitob 1 Shohlar 13 Bible Online

1 Shohlar 13 - Uzbek Muqaddas Kitob bible

1 Shohlar 13

¹Shoh Shoul oʻttiz[56] yoshida taxtga oʻtirib, Isroilda qirq ikki yil shohlik qildi[57].

²U Isroil lashkaridan uch mingta odam saralab olib, qolganlarini uylariga joʻnatib yubordi. Oʻsha uch mingtadan ikki mingtasini Mixmash va Baytil qirlariga joylashtirdi, mingtasini esa Benyamin urugʻiga qarashli Givo shahriga — Yoʻnatanning[58] ixtiyoriga yubordi.

³Oradan koʻp oʻtmay, Yoʻnatan Filistlarning Gebo shahridagi[59] qoʻnolgʻasini magʻlub qildi. Bu xabar Filistlar orasida tezda tarqaldi. Shoul: “Ibroniylar bu hodisadan xabardor boʻlsin”, deb butun oʻlka boʻylab burgʻu chaldirdi.

⁴Shunday qilib, Shoul Filistlar qoʻnolgʻasini yengganini va Filistlar Isroil xalqidan nafratlanganini Isroil xalqining hammasi bildi. Soʻng lashkar Gilgalda Shoulning atrofiga toʻplandi.

⁵Filistlar ham Isroil lashkari bilan urishmoq uchun yigʻilishdi. Uch mingta[60] jang aravasi, olti mingta otliq sipoh va dengiz qirgʻogʻidagi qum singari son — sanoqsiz lashkar yoʻlga chiqib, Bayt — Obun shahrining sharqidagi Mixmashga keldi. Ular oʻsha yerda qarorgoh qurishdi.

⁶Isroil lashkarining ahvoli ogʻirlashib, qiynalib qoldi va ular gʻorlarga, xandaqlarga, qoyalar orasiga, qabrlarga, sardobalarga yashirindilar.

⁷Ibroniylarning ayrimlari esa Iordan daryosi sharqidagi Gad va Gilad yerlariga kechib oʻtishdi. Shoul u vaqtda hali ham Gilgalda edi. Unga ergashganlarning hammasi qoʻrqib ketishdi.

⁸Shomuil Shoulga: “Meni yetti kun kut”, deb aytgani uchun[61], uni Gilgalda yetti kun kutib turdi. Shomuil Gilgalga kelavermagach, lashkar endi Shoulning yonidan qocha boshladi.

⁹Shuning uchun Shoul: — Kuydiriladigan qurbonlik bilan tinchlik qurbonliklarini menga olib kelinglar, — deb buyurdi. Keyin u kuydiriladigan qurbonliklarni nazr qildi.

¹⁰Shoul qurbonlikni kuydirib boʻlgan ham ediki, Shomuil kelib qoldi. Shoul, unga salom beray deb, peshvoz chiqdi.

¹¹— Nima qilib qoʻyding?! — dedi Shomuil. — Odamlarim mening yonimdan qochib ketyapti, — dedi Shoul. — Siz esa belgilangan kuni kelmadingiz. Buning ustiga, Filistlar Mixmashda toʻplanib turishibdi. Ularni koʻrib,

¹²endi Filistlar Gilgalga ustimga bostirib keladi, men esa hanuzgacha Egamdan yordam soʻrab iltijo qilmadim, deb oʻyladim. Shundan keyin kuydiriladigan qurbonlikni qilishga majbur boʻldim.

¹³Shomuil Shoulga dedi: — Nodonlarcha ish tutibsan, oʻz Egang Xudoning senga bergan amriga itoat etmading. Boʻlmasa, Egam Isroildagi shohlik taxtingni to abad mustahkam qilgan boʻlardi.

¹⁴Endi sening shohliging uzoqqa bormaydi. Egam Oʻz koʻngliga mos bittasini topdi, uni Oʻz xalqi ustidan hukmdor qilib tayinladi. Chunki sen Egamning amriga itoat qilmading.

¹⁵Shundan soʻng Shomuil Gilgaldan chiqib, Benyamin urugʻiga qarashli Givo shahriga joʻnab ketdi. Shoul yonida qolgan odamlarni sanab chiqdi, hammasi boʻlib taxminan olti yuz kishi ekan.

¹⁶Shoul, oʻgʻli Yoʻnatan va ularning lashkari Benyamin qabilasiga qarashli Geboda joylashdilar. Filistlar esa Mixmashda qarorgoh qurgan edilar.

¹⁷Filistlarning ilgʻorlari[62] uch guruhga boʻlinib, Isroil qishloqlarini talash uchun qarorgohdan chiqishdi. Guruhlardan biri Shuvol hududidagi Oʻfra shahri tomonga,

¹⁸ikkinchisi Bayt — Xoʻron shahri tomonga, uchinchisi esa choʻl tomonga — Zavoʻm vodiysi koʻrinib turgan chegara adirga yoʻl oldi.

¹⁹Filistlar: “Ibroniylar qilich, nayza yasay olmasin”, deb butun Isroil yurtida birorta ham temirchi qoldirmagan edilar.

²⁰Shuning uchun butun Isroil xalqi omoch tishlarini, choʻkichlarini, bolta va oʻroqlarini[63] oʻtkirlash uchun Filistlarning oldiga borar edi.

²¹Omoch tishi bilan choʻkichni oʻtkirlash bahosi ikki misqol kumush[64], panshaxa, bolta va temir uchli govronni[65] oʻtkirlash bahosi bir misqol kumush[66] edi.

²²Shu sababdan Shoul bilan Yoʻnatanning jangchilaridan birortasida qilich yoki nayza yoʻq edi, faqat Shoul va uning oʻgʻlida bor edi, xolos.

²³Bu paytga kelib, Filistlar qoʻnolgʻasini Mixmash dovonida joylashtirgan edilar.