Read Uzbek Muqaddas Kitob 1 Shohlar 15 Bible Online

1 Shohlar 15 - Uzbek Muqaddas Kitob bible

1 Shohlar 15

¹Bir kuni Shomuil Shoulga shunday dedi: — Egamiz senga moy surtib, Oʻz xalqi Isroilning shohi qilish uchun meni sening oldingga yuborgan edi. Endi Egamizning soʻzlarini eshit.

²Sarvari Olam shunday aytmoqda: “Isroil xalqiga qilgan yovuzliklari uchun Omolek xalqini[76] jazolayman. Chunki Isroil xalqi Misrdan chiqayotganda, Omolek xalqi ularning yoʻlini toʻsib qoʻygan edi[77].

³Endi borib, Omolek xalqiga hujum qil. Ularga qarashli hamma narsani tamoman yoʻq qilib tashla, hech narsasini ayama. Erkagu ayol, bola — chaqa, molidan tortib, qoʻyigacha, tuyasidan tortib, eshagigacha hammasini oʻldir.”

⁴Shoul lashkarini Taloyim shahrida toʻplab sanab chiqdi. Isroildan 200.000 nafar piyoda sipohi, Yahudodan ham 10.000 nafar sipohi bor ekan.

⁵Shoul Omolek xalqiga qarashli boʻlgan shaharga borib, soylikda[78] pistirma qoʻydi.

⁶Oʻsha yerdagi Xayin xalqiga quyidagi xabarni joʻnatdi: “Endi ketinglar, Omolek xalqini tark etinglar, tagʻin sizlarni ham ular bilan birga yoʻq qilib yubormayin. Isroil xalqi Misrdan chiqayotgan paytda, sizlar bizga yaxshilik qilgandingiz.” Shundan keyin Xayin xalqi Omolek xalqini tark etdi.

⁷Shoul Xaviladan Misrning sharqidagi Shurgacha boʻlgan joylardagi Omolek xalqini tor — mor qildi.

⁸U Omolek shohi Oʻgaxni tiriklayin qoʻlga olib, xalqini butunlay qirib tashladi.

⁹Shoul va uning odamlari Oʻgaxni hamda uning eng yaxshi qoʻy — mollarini, buzoq — qoʻzilarini, jamiki yaxshi narsalarini ayab, saqlab qolishdi. Ularni butunlay yoʻq qilib tashlashni istashmadi. Faqat arzimas, nuqsonli hayvonlarini yoʻq qilishdi.

¹⁰Egamiz Shomuilga shu soʻzlarni ayon qildi:

¹¹“Shoulni shoh qilib tayinlaganimga pushaymonman. U Mendan yuz oʻgirdi, amrlarimni bajo qilmadi.” Shomuil xafa boʻlib, tun boʻyi Egamizga yolvorib chiqdi.

¹²Shomuil ertasi kuni saharda, Shoul bilan koʻrishay deb borsa, Shoul Karmil shahriga[79] ketibdi. Bilsaki, u yerda oʻziga bir yodgorlik oʻrnatibdi. Keyin Gilgalga qaytibdi.

¹³Shomuil Shoulning oldiga kelganda, Shoul: — Xudo sizni yorlaqasin! Men Egamizning amrini ado etdim, — dedi.

¹⁴— Agar shunday boʻlsa, qulogʻimga eshitilayotgan qoʻyning ma’rashi nimasi? Men eshitayotgan sigirning boʻkirishi nimasi? — deb soʻradi Shomuil.

¹⁵— Odamlarim Omolek xalqining hayvonlarini tortib oldi, — dedi Shoul, — Egangiz Xudoga qurbonlik qilish uchun qoʻy, sigirlarning eng saralarini ayab, saqlab qolishdi. Qolganlarini esa butunlay qirib tashladik.

¹⁶— Shoshmay tur, bu kecha Egamizning menga nimalar aytganini senga bildirib qoʻyayin, — dedi Shomuil. — Ayting, — dedi Shoul.

¹⁷Shomuil gapida davom etdi: — Oʻzingni kichik deb sanasang — da, Isroil xalqining yoʻlboshchisi boʻlmadingmi?! Egamiz senga moy surtib tanlab, Isroilga shoh qilmadimi?!

¹⁸U senga: “Bor, oʻsha gunohkor Omolek xalqini butunlay qirib tashla, hammasini yoʻqotmaguningcha, ular bilan jang qil”, deb amr bergan edi — ku.

¹⁹Nega endi Egamizning amriga itoat etmading?! Nima uchun oʻljaga tashlanib, Egamiz oldida qabihlik qilding?!

²⁰— Axir, men Uning amrlariga itoat qildim — ku! — dedi Shoul. — Men, Egamiz amr berganiday, bordim. Omolek shohi Oʻgaxni bu yerga olib keldim. Omolek xalqini esa butunlay qirib tashladim.

²¹Odamlarim qirib tashlanishi kerak boʻlgan oʻljadan faqat eng sara mol — qoʻylarni olishdi, xolos. Bu mol — qoʻylarni Gilgalga olib kelib, Egangiz Xudoga qurbonlik qilishmoqchi.

²²Shomuil shunday javob berdi: “Kuydiriladigan va boshqa qurbonliklardan koʻra, Egamiz itoat etganlardan shod boʻlmasmi?! Ha, itoat etish — qurbonlik soʻyishdan yaxshi, Xudoga itoatkorlik — qoʻchqorlar yogʻidan a’loroqdir.

²³Oʻzboshimchalik sehr — joduga oʻxshab gunohdir, Itoatsizlik esa but — sanamga bosh egish bilan tengdir. Sen Egamizning amrini rad etding, Egamiz ham sening shohligingni rad etdi.”

²⁴— Gunoh qildim! — dedi Shoul. — Ha, Egamizning amriga ham, sizning soʻzlaringizga ham xilof ish tutdim. Xalqdan hayiqqanim uchun ularning gapiga kirdim.

²⁵Endi yolvoraman: gunohimdan oʻting, men bilan birga qaytib boring, Egamizga sajda qilayin.

²⁶— Sen bilan bormayman, — dedi Shomuil. — Chunki sen Egamizning amrini rad etding, Egamiz ham seni rad etib, Isroil taxtidan tushirdi.

²⁷Shomuil burilib, ketmoqchi boʻlgan edi, Shoul uning ridosi etagidan ushlab qoldi. Rido yirtildi.

²⁸— Rido yirtilgani singari, Egamiz ham bugun Isroil shohligini qoʻlingdan tortib olib, sendan koʻra, yaxshirogʻiga berdi, — dedi Shomuil.

²⁹— Isroilning ulugʻvor Xudosi yolgʻon soʻzlamas, fikrini ham oʻzgartirmas. U inson emaski, fikrini oʻzgartirsa.

³⁰— Gunoh qildim, — dedi Shoul, — endi xalqimning oqsoqollari oldida, Isroil xalqi oldida meni beobroʻ qilmang. Shuning uchun men bilan birga qaytib boring, Egangiz Xudoga sajda qilayin.

³¹Shomuil Shoul bilan birga orqaga qaytib bordi. Shoul Egamizga sajda qildi.

³²Shomuil: — Omolek shohi Oʻgaxni mening oldimga olib kelinglar! — deb buyurdi. Oʻgaxni bogʻlangan holda, Shomuilning oldiga olib kelishdi. Oʻgax oʻzicha: “Oʻlim xavfi aniq oʻtib ketdi”, deb oʻyladi.

³³Lekin Shomuil: — Qiliching ayollarni farzandidan qanday judo qilgan boʻlsa, sening onang ham ayollar orasida befarzand boʻlsin! — dedi — yu, Oʻgaxni Egamizning oldida Gilgalda qilich bilan chopib tashladi.

³⁴Shundan soʻng Shomuil Ramaga, Shoul esa Givoga — uyiga ketdi.

³⁵Shomuil umrining oxirigacha Shoulni boshqa koʻrmadi, lekin u Shoulni deb gʻamgin boʻlib yurdi. Egamiz esa Shoulni Isroil shohi qilganidan pushaymon edi.